Morgunblaðið - 19.07.2019, Blaðsíða 29

MENNING 29
MORGUNBLAÐIÐ FÖSTUDAGUR 19. JÚLÍ 2019
Gs import ehf | S. 892 6975 | www.gsimport.is
Mikið úrval
Borðbúnaður
fyrir veitingahús og hótel
Paul McCartney semur tónlist og
söngtexta fyrir söngleikjaútgáfu af
kvikmyndinni It’s a Wonderful
Life. Handritshöfundur söngleiks-
ins og meðtextahöfundur er Lee
Hall, sem þekktastur er fyrir kvik-
myndirnar Billy Elliot og Rocket-
man sem fjallar um Elton John.
Samkvæmt frétt The Guardian er
þetta í fyrsta sinn sem McCartney
vinnur að söngleik, en áætluð
frumsýning er síðla næsta árs.
Breski leikhúsframleiðandinn Bill
Kenwright sem stendur að baki
uppfærslunni keypti sýningarrétt-
inn og setti sig í samband við
McCartney fyrir þremur árum.
„Það hafði aldrei höfðað til mín að
vinna að söngleik, en við Bill fund-
uðum með Lee Hall og þá kviknaði
áhugi minn. Ég sannfærðist um að
þetta gæti verið skemmtilegt,“
segir McCartney.
It’s a Wonderful Life í leikstjórn
Frank Capra, sem frumsýnd var
1946, er ein vinsælasta jólamynd
kvikmyndasögunnar. James Stew-
art leikur þar mann sem íhugar að
svipta sig lífi á aðfangadag eftir að
hafa ranglega verið sakaður um að
svindla á viðskiptavini í bankanum
þar sem hann vinnur. Máttarvöldin
senda honum verndarengil sem
sýnir honum hvernig heimurinn
hefði orðið ef ítrekaðra góðverka
hans hefði ekki notið við.
Hress Paul McCartney á tónleikum.
Paul McCartney vinnur að söngleik
Ljósmynd/Raph PH
Scheize, Liebe, Sehnsucht nefnist
sýning Ragnars Kjartanssonar
sem opnuð verður í Kunst-
museum í Stuttgart á morgun og
stendur fram í október. Sam-
kvæmt upplýsingum frá i8 er um
að ræða umfangsmestu yfirlits-
sýningu Ragnars í Þýskalandi til
þessa. Til sýnis verða mynd-
bandsinnsetningar, málverk og
teikningar, en mörg verkanna
hafa ekki verið
sýnd opinber-
lega áður.
Lykilþemu í list
hans verða
áberandi á sýn-
ingunni, allt frá
myndbands-
seríunni Me and
My Mother
(2000; 2005;
2010; 2015) til nýrra verka á vorð
við myndbandsinnsetninguna
Death Is Elsewhere (2019) og
Tod einer Dame (2019), sem er
unnið sérstaklega inn í eitt rým-
anna í safninu.
Umfangsmesta
yfirlitssýningin í
Þýskalandi
Ragnar Kjartansson
Stjórnendur Louvre-safnsins í París
hafa ákveðið að fjarlægja nafn banda-
rísku Sackler-fjölskyldunnar af álmu
með austurlenskum forngripum rúm-
um tuttugu árum eftir að merkingin
var sett upp. Þetta gerist í kjölfarið á
mótmælum sem bandaríski ljósmynd-
ari Nan Goldin hefur staðið fyrir.
Hluti Sackler-fjölskyldunnar á lyfja-
fyrirtækið Purdue Pharma sem fram-
leiðir ópíóíðalyfið OxyContin sem
þúsundir manna hafa orðið háðir,
þeirra á meðal Goldin. Hún hefur
staðið fyrir mótmælum við söfn í
Bandaríkjunum og Bretlandi sem
þegið hafa styrki frá fjölskyldunni
með þeim afleiðingum að stjórnendur
safna á borð við Metropolitan-safnið í
New York og Tate-safnið í London
hafa ákveðið að hætta að taka við
fjárstyrkjum frá Sackler-fjölskyld-
unni.
Samkvæmt frétt The Guardian
kemur í tilkynningu frá Louvre fram
að ástæða þess að nafn fjölskyld-
unnar sé fjarlægt nú skýrist af því að
samningur þar um hafi runnið sitt
skeið. Einnig er áréttað að safnið hafi
ekki tekið við fjárstyrkjum frá
Sackler-fjölskyldunni síðan 1997.
„Þetta sýnir að mótmæli borga sig.
Söfn tilheyra almenningi og listafólki,
ekki þeim sem styrkja söfnin,“ segir
Goldin og tekur fram að safngestir
eigi að geta notið listar án þess að
komast í snertingu við „óhreint fé“.
AFP
Mótmæli Mótmælendur fyrir framan Louvre-píramídann kunna í París.
Louvre fjarlægir nafn
Sackler eftir mótmæli
Rósa Margrét Tryggvadóttir
rosa@mbl.is
List af öllu tagi hefur blómstrað í
Seyðisfjarðarbæ þessa vikuna þar
sem listahátíðin LungA er nú haldin
í nítjánda sinn. Hápunktur hátíðar-
innar, sem hófst síðasta sunnudag,
verður núna um helgina þegar
haldnir verða tvennir stórtónleikar
og listasmiðjusýning þar sem upp-
skera listamanna úr listasmiðjum
vikunnar verður sýnd.
Björt Sigfinnsdóttir, fram-
kvæmdastjóri LungA, segir að hátíð-
in hafi hingað til gengið ótrúlega vel
og vonum framar þrátt fyrir tölu-
verða rigningu.
„Við látum það ekki hafa mikil
áhrif. Stemningin er rosalega góð,“
segir Björt og bætir við að sem betur
fer sé búist við þurru veðri í kvöld.
Listasmiðjurnar seldust upp
Hún segir að mikil og góð þátttaka
hafi verið á öllum viðburðum hátíð-
arinnar.
„Við erum búin að vera með pakk-
aða dagskrá af allskonar viðburðum,
sýningum, gjörningum og fyrir-
lestrum,“ segir Björt en að hennar
sögn seldist upp í allar níu listasmiðj-
urnar sem í boði voru á hátíðinni, á
innan við klukkutíma. Í boði voru til
að mynda smiðjur í grafískri hönnun,
spuna, dansi og lagasmíðum.
„Við erum með alveg 130 þátttak-
endur í smiðjunum og svo hátt í ann-
að hundrað listamenn sem koma
fram, annaðhvort á sýningum, við
stjórn á listasmiðjum eða á tónleik-
unum,“ segir Björt og bætir við að
með tónleikunum séu hátíðargestir
líklega á milli þrjú og fjögur þúsund.
Ekki er því að undra að tjaldsvæðið á
Seyðisfirði hafi fyllst á miðvikudag-
inn.
Sjálf segir Björt að listasmiðju-
sýningin, sem verður opnuð kl. 17 í
dag, sé að hennar mati hápunktur
hátíðarinnar, ásamt tónleikunum.
„Þetta er uppskerusýning þar sem
þátttakendur í smiðjunum munu
sýna að hverju þeir eru búnir að vera
að vinna alla vikuna. Það er alltaf
ótrúlega flott að sjá hvað fólk nær
langt á þessum stutta tíma,“ segir
Björt.
Hún segir að mikil eftirvænting
liggi einnig í loftinu eftir tónleik-
unum um helgina, en fyrri tónleik-
arnir verða haldnir í kvöld og þeir
seinni annað kvöld.
„Þarna kemur fram rjóminn af
íslenskum hljómsveitum í bland við
nokkrar góðar og vel valdar danskar
og bandarískar hljómsveitir,“ segir
Björt en meðal þeirra sem stíga á
svið eru GDRN, Mammút, Hatari,
Bríet og hin bandaríska Kelsey Lu.
„Við erum með þema í ár sem heit-
ir framtíðarsýn. Í gegnum það erum
við að skoða hvernig kynslóðir fram-
tíðarinnar munu horfa til baka á okk-
ur, hvað við munum skilja eftir okk-
ur og hver okkar arfleifð verður,“
útskýrir Björt sem segir að fyrir-
lestrar sem í boði voru á hátíðinni
fyrr í vikunni hafi fylgt þessu þema.
Jafnframt segir hún að opnunarsýn-
ing hátíðarinnar hafi verið unnin út
frá þessu þema en val á tónlistinni
tengist því einnig óbeint.
Boðskapur í takt við þemað
„Við völdum bæði hljómsveitir
sem eru að gera spennandi hluti akk-
úrat núna og við erum líka með mikið
af pönkhljómsveitum sem eru með
ákveðinn boðskap sem okkur finnst
passa vel við þemað,“ úrskýrir Björt
sem segist vonast til að stemningin
verði frábær á tónleikunum og að
fólk skemmti sér varlega.
„Það hefur nú yfirleitt verið mjög
góð stemning og afskaplega lítið um
ólæti. Við vonum bara að það haldi
áfram,“ segir Björt.
„Svo fögnum við 20 ára afmæli á
næsta ári og þá gerum við eitthvað
stórkostlegt. Við vitum ekki hvað en
það verður eitthvað,“ fullyrðir hún
og hlær. Allar nánari upplýsingar
eru á vefnum lunga.is.
Ljósmyndir/Hrefna Björg
Hápunktur Mikil stemning var á tónleikunum á LungA í fyrra og hún virð-
ist ekki vera minni í ár enda færir tónlistarmenn sem stíga á svið.
Listamenn Sköpunargleðin er í há-
marki hjá mörgum á listahátíðinni.
Listaveisla á LungA
 Rjóminn af íslensku tónlistarfólki á LungA  Framtíðar-
sýn er þemað í ár  „Stemningin er rosalega góð“
Saksóknari í
Massachusetts-
ríki í Bandaríkj-
unum hefur fellt
niður mál gegn
leikaranum Kev-
in Spacey þar
sem hann var
sakaður um að
hafa þuklað á 18
ára pilti á bar í
London 2016.
Ákvörðunin var tekin eftir að ungi
maðurinn neitaði að afhenda rann-
sóknaryfirvöldum síma sinn, en
verjendur Spaceys fullyrtu að sím-
inn gæti sannað sakleysi leikarans.
Unga manninum var gert að bera
vitni í málinu í seinasta mánuði og
sagðist þá hafa týnt símanum. Verj-
endur Spaceys fullyrða að ungi
maðurinn hafi eytt skilaboðum í
símanum sem sannað gætu sakleysi
umbjóðanda þeirra.
Spacey hefur verið yfirheyrður
vegna nokkurs fjölda ásakana um
kynferðis- og blygðunarsemisbrota
sem hann á að hafa framið í Bret-
landi á árunum 1996 til 2013. Mörg
þeirra mála eru enn til rannsóknar.
Vegna ásakananna ákváðu stjórn-
endur hjá Netflix að hann ætti ekki
lengur að leika Frank Underwood í
sjónvarpsþáttaröðinni House of
Cards og senur með honum voru
einnig klipptar út úr kvikmyndinni
All the Money in the World og þær
teknar upp á nýtt með Christopher
Plummer í hlutverkinu.
Eitt málanna gegn
Spacey fellt niður
Kevin Spacey