Skessuhorn - 13.05.2015, Síða 28

28 MIÐVIKUDAGUR 13. MAÍ 2015
Hin aldna en andlitslyfta hópferða-
bifreið, Soffía II, fór í Jómfrúar-
ferð sína síðastliðinn laugardag eftir
að bíllinn hafði á síðasta hálfu öðru
ári farið í gegnum gagngera end-
ursmíði. Soffía var smíðuð á Bif-
reiðaverkstæði Guðmundar Kjer-
úlf í Reykholti í upphafi sjöunda
áratugar liðinnar aldar á grind úr
Bedford 1940. Soffíuna áttu lengst
af og ráku Guðmundur Kjerúlf og
Guðni Sigurjónsson, en þeir eru
báðir látnir. Elínborg Kristinsdóttir
ekkja Guðna á Soffíu II í dag en bíll-
inn var undir það síðasta orðinn illa
farin, ekki síst eftir að hafa staðið í
nokkur ár á geymslusvæði í Straums-
vík. Elínborg beitti sér fyrir söfnun
til að fjármagna endursmíðina og
hjólin tóku að snúast af krafti þeg-
ar húsnæði fékkst til smíðinnar hjá
Alefli, byggingaverktökum í Mos-
fellsbæ. Einn af eigendum Aleflis er
Arnar Guðnason sonur Elínborgar.
Skessuhorn hefur nokkrum sinnum
sagt frá þessu óvenjulega verkefni.
Nú eru liðnir 18 mánuðir frá því
vinnan við endursmíðina hófst og
síðastliðinn laugardag var búið að
aka bílnum í Borgarnes til þátttöku í
bílasýningu með skoðun án athuga-
semda til 2016.
Sá sem þetta ritar var barn á þeim
árum sem Soffía II var notuð til
skólaaksturs að Kleppjárnsreykjum
á veturna en í fjallaferðir á sumrin.
Taugar til þessa ramm-borgfirska
bíls eru því sterkar hjá undirrit-
uðum. Sömu sögu er að segja af fjöl-
mörgum Borgfirðingum sem fóru
með þessum bíl til og frá skóla. Þeg-
ar stigið var upp í bílinn á laugardag-
inn virtist hann þó minni en minn-
ingin sagði, til dæmis lægra til lofts
og styttra á milli sætanna, en svo er
samt ekki, bíllinn var nákvæmlega
jafn stór og eitthvað allt annað sem
hafði vaxið.
Elínborg Kristinsdóttir fékk
auk fjölskyldu sinnar til liðs við sig
nokkra lykilmenn í endursmíði bíls-
ins. Jafnvel komu að verkinu menn
sem höfðu átt þátt í smíði hans fyrir
ríflega hálfri öld. „Synir mínir Arn-
ar og Sigurjón og synir þeirra komu
að þessu. Stærstan þátt í verkinu á
þó Steindór Rafn Theódórsson frá
Brennistöðum. Án hans hefði þetta
verk aldrei gengið svo fljótt sem
raunin varð og nánast get ég sagt
að verkið hefði bara alls ekki geng-
ið upp án Steinda,“ sagði Elínborg.
Jóhannes Steinsson frá Krossi sá
um sprautun á bílnum og ýmislegt
fleira. Elínborg áætlar að um fjög-
ur þúsund vinnustundir hafi farið í
verkið, en heildarfjöldinn liggi ekki
alveg fyrir. Hún vill koma á fram-
færi þakklæti til allra sem lagt hafa
verkinu lið með einum eða öðrum
hætti.
Steindór Rafn, eða Steindi eins
og hann er jafnan kallaður, segir að
þessar fjögur þúsund vinnustundir
séu svipaður tími og áætlað var í ný-
smíði hópferðabíla hér á árum áður.
Talsverður tími hafi nú farið í að rífa
bílinn og meta hvað hægt væri að
nota og hvað þyrfti að endurnýja.
Margir hafi átt í fórum sínum vara-
hluti sem komið hafi sér vel. Vinnu-
fyrirkomulag hafi verið fastmótað í
upphafi. „Við mættum eftir vinnu
nánast alla mánudaga og miðviku-
daga og síðan klukkan 8 á laugar-
dögum og unnum allan daginn. Með
þessu móti, góðri skipulagningu og
að Ella eldaði fyrir mannskapinn,
þá gekk verkið vonum framar,“ seg-
ir Steindi. Öll vinna við endursmíð-
ina var unnin í sjálboðavinnu. Arnar
Guðnason segir að hægt hafi verið
að nota grindina, fjaðrir, vél og gír-
kassa með lítilsháttar lagfæringum,
en stærstur hluti yfirbyggingar nú
væri nýsmíði sem mest eins og frum-
gerðin. Arnar bætti því við að á sín-
um tíma hafi Soffía II verið smíðuð
án teikningar, hún hafi þannig verið
hönnuð af fingrum fram af körlun-
um á verkstæðinu í Reykholti; föður
sínum, Guðmundi Kjerúlf og starfs-
mönnum hans.
Eftir að búið var að sýna Soffíu
II í Borgarnesi á fornbíla- og Rafta-
sýningunni á laugardaginn var far-
ið í hópferð á heimaslóður rútunn-
ar, í Reykholt. Ekið var eins og leið
lá yfir Hvítárbrú og þaðan í Reyk-
holt. Elínborg bauð aðstandendum
verkefnisins og fleiri gestum með og
var borðað í Reykholti. Eftir það var
farið að bifreiðaverkstæðinu, sem nú
er slökkvistöð, og bíllinn myndaður
við dyrnar sem ekið var út um fyrir
52 árum síðan.
Reikningurinn vegna endurgerðar
Soffíu II er: 0115-26-10720, kenni-
tala: 090741-2689.
mm
Soffía II í Jómfrúarferð í Reykholt eftir endursmíði
Fyrir breytingar. Eftir breytingar, 18 mánuðum síðar.
Sæmundur Sigmundsson og Elínborg Kristinsdóttir. Steindór Rafn Theódórsson yfirsmiður við endursmíðina.
Spáð og spekúlerað. Meðal annarra eru Arnar Guðnason, Björn Jóhannesson og
Haukur Júlíusson.
Jónas Kjerúlf, bróðir Guðmundar heitins, ók upphaflega Bedfordinum árg. 1940
í Reykholt, en á grind þess bíls var Soffían byggð. Hér er Jónas ásamt Arnari
Guðnasyni og Elínborgu Kristinsdóttur.
Ekið í Borgarfjörð og hér farið yfir gömlu Hvítárbrúna.