Skessuhorn - 10.06.2015, Blaðsíða 10

MIÐVIKUDAGUR 10. JÚNÍ 201510
Fyrir nákvæmlega ári síðan, í ann-
arri viku júnímánaðar, færði Skessu-
horn lesendum sínum þau tíðindi
að sláttur væri hafinn á Vestur-
landi. Rætt var við nokkra bænd-
ur í Borgarfirði og Hvalfjarðarsveit
sem staðið höfðu glaðbeittir við
heyannir um nokkurra daga skeið.
Í ár er ljóst að kuldatíðin undan-
farið hefur haft sín neikvæðu áhrif
á grassprettu. Sömu bændur og
Skessuhorn ræddi við þá telja nú að
sláttur hefjist ekki hjá þeim fyrr en
tveimur til þremur vikum seinna en
í fyrra.
Minnir á kulda-
sumarið 1979
Einn þessara bænda er Bjartmar
Hannesson á Norður-Reykjum í
Hálsasveit í Borgarfirði. Fyrir ári
síðan sagðist hann aldrei hafa sleg-
ið jafn snemma og þá, enda sprettu-
skilyrðin glimrandi með raka og
hlýindum. „Það er annað upp á
teningnum núna,“ sagði Bjartmar
þegar haft var samband við hann
á mánudagskvöldið. „Það fór að
spretta þegar rigndi í nótt. Ég sé
stóran mun eftir daginn. Nú þarf
bara að hlýna. Líklega erum við að
tala um að sumarið sé alveg hálf-
um mánuði ef ekki þremur vikum
seinna á ferðinni heldur en í venju-
legu ári. Þetta er svolítið farið að
minna á árið 1979. Þá var svakalega
kalt. Þá var ég að slóðadraga á Jóns-
messu og setti kýrnar inn því það
kom hret. Þetta sumarið sló ég fyrst
19. júlí. Nú í dag er ég að halda upp
á 40 ára búskaparafmæli svo ég man
nú ýmislegt,“ sagði Bjartmar glað-
ur í bragði á búskaparafmælisdegi
hans og Kolbrúnar Sveindóttur
konu hans.
Enginn klaki í jörðu
Annar bóndi sem Skessuhorn ræddi
við er Þórarinn Skúlason á Stein-
dórsstöðum í Reykholtsdal. Í fyrra
sagðist hann aldrei hafa byrjað að
slá jafn snemma en þá byrjaði hann
6. júní. „Nú er hálfur mánuður
í slátt. Ég kvíði því mest að hann
sé lagstur í rigningar. Tunglstað-
an er óhagstæð og sjórinn kaldur.
Þetta fer að minna á fyrri kuldaár
en jákvæði munurinn er þó sá núna
að við erum með klakalausa jörð.
Ef það kæmu aðeins meiri hlýindi
núna þá myndi grasið rjúka upp.“
Sprettur um
leið og hlýnar
Þriðji bóndinn er Haraldur Magn-
ússon í Belgsholti í Hvalfjarðarsveit.
Hann hóf slátt 6. júní í fyrra. „Núna
er að minnsta kosti hálfur mánuður
í slátt. Þetta verður ekki fyrr en ein-
hvern tímann eftir 20. júní. Ég hef
svo sem byrjað það seint áður. Árið
2013 sló ég fyrst 19. júní. Vorið þá
var frekar kalt og blautt. Kuldakast-
ið í lok apríl og byrjun maí hefur
sett sitt strik í reikninginn núna. Ég
var byrjaður að sá korni þá en varð
að hætta vegna næturfrosta. En það
er klakalaust hjá mér svo ég von-
ast til að sprettan taki vel við sér ef
það hlýnar bara,“ sagði Haraldur í
Belgsholti. mþh
Sumarið tveimur til þremur vikum seinna á
ferðinni hjá vestlenskum bændum
Horft heim að Norður-Reykjum í Hálsasveit. Bjartmar bóndi segir sumarbyrjun nú
óneitanlega minna sig á árið 1979. Ljósm. úr safni: KS.
Skemmtiferðaskipið Sea Explorer I
var nýlega á ferð við strendur Snæ-
fellsness. Skipið sigldi inn Breiða-
fjörðinn að norðanverðu, meðfram
ströndinni, svo út Breiðafjörð-
inn að sunnanverðu og lagðist fyr-
ir akkerum fyrir utan Arnarstapa.
Sea Explorer I, sem skráð er í Nas-
sau, er 91 metra langt, 16 metra
breitt og með 4,2 metra djúpristu.
Í áhöfn skipsins eru 88 manns og
voru 104 farþegar ferjaðir í land
á Arnarstapa með slöngubátum.
Þaðan fóru þeir í rútuferðir um
Nesið, þar sem þeir skoðuðu með-
al annars Vatnshelli, Hellnar og
Dritvík. Áætlað er að skipið verði
aftur á ferðinni 12. júní næstkom-
andi.
þa
Sea Explorer við
strendur Snæfellsness
Stór olíuskip hafa tvisvar nú í vor
og sumar komið að olíubryggjunni
í Hvalfirði til að sækja þangað ol-
íufarma úr tönkunum sem standa í
hlíðunum í grennd við Hvalstöðina.
Nú á laugardagskvöld kom Over-
seas Sifnos inn fjörðinn og lagðist
að bryggju. Þetta mikla skip er 183
metrar á lengd, 32 metra breitt og
mælist rúmlega 30.000 rúmlestir.
Skipið hélt aftur frá Hvalfirði með
olíufarm á mánudagskvöld. Sam-
kvæmt heimildum Skessuhorns
munu nú allir tankar í Hvalfirði vera
tæmdir eftir þessar skipakomur.
Blaðamaður Skessuhorns var
staddur efsti í botni Litlasandsdals
Þyrils þegar Overseas Sifnos sigldi
inn fjörðinn. Meðfylgjandi mynd
er tekin þaðan sem sjá má ferlík-
ið síga inn í fylgd dráttarbáta Faxa-
flóahafna. Myndin er tekin út dal-
inn. Sjá má olíutanka og sjálfa olíu-
bryggjuna við Miðsand í Hvalfirði.
Fjær og handan fjarðar er Hvamms-
vík og Reynivallaháls. Akrafjall er
svo í fjarska fyrir miðri mynd.
mþh
Olíuskip hafa tæmt allar
birgðir í Hvalfirði
Slökkvilið Grundarfjarðar var kall-
að út klukkan hálf níu á sunnudags-
kvöldið. Þá hafði eldur komið upp
í 20 ára gömlu heyi í hlöðu á bæn-
um Grund, rétt austan við Grund-
arfjörð. Slökkviliðsmenn voru fljótir
að ráða niðurlögum eldsins. Að sögn
lögreglu eru upptök eldsins rakin til
þess að verið var að moka heyi út úr
hlöðunni og talið að kviknað hafi í
heyinu út frá heitu púströri á gröfu
sem notuð var til verksins.
Slökkvilið Grundarfjarðar var
einnig kallað út á laugardaginn. Þá
lék grunur um að kviknað væri í
sumarbústað í sveitinni. Svo reynd-
ist þó ekki vera, því í ljós kom að
verið var að brenna rusli. Vart þarf
að taka það fram að slíkt er bannað.
mm/ Ljósm. tfk.
Slökktu eld í gömlu heyi
Eins og Skessuhorn greindi frá fyr-
ir rúmum mánuði var fyrsta skóflu-
stungan tekin að fyrirhuguðum nátt-
úrulaugum og veitingastað við Deild-
artunguhver í Borgarfirði. Það eru
hjónin Bára Einarsdóttir og Dag-
ur Andrésson í Gróf og Jóna Est-
er Kristjánsdóttir og Sveinn Andrés-
son í Víðigerði sem standa að fram-
kvæmdunum. Þeir bræður, Dagur og
Sveinn, eru einmitt frá Deildartungu
II. Blaðamaður heimsótti þau Báru,
Dag og Jónu á byggingarsvæðið síð-
astliðinn föstudag og spjallaði við þau
um framkvæmdirnar. Náttúrulaug-
arnar og öll starfsemi sem þeim fylgja
hafa fengið nafnið Krauma. „Nafn-
giftin hafði nokkuð langan aðdrag-
anda en að endingu sóttum við nafnið
og lógóið í hverinn sjálfan,“ segja þær
Bára og Jóna Ester.
Aðspurðar um gang mála segja þær
hlutina hafa gerst mjög hratt undan-
farnar vikur og miklu hafi verið áork-
að á skömmum tíma. „Þetta hef-
ur gengið ótrúlega hratt hjá honum
Sigga,“ segir Bára en það er Sigurð-
ur Árni Magnússon húsasmíðameist-
ari sem vinnur verkið ásamt sínum
starfsmönnum. Sigurður er heima-
maður og að sögn þeirra Báru og
Jónu eru ýmsir menn úr sveitinni í
kring sem koma að verkinu. „Fyrsta
skóflustungan var tekin 26. apríl og
allar framkvæmdir eru vel á áætl-
un, þetta gengur allt mjög vel,“ seg-
ir Bára. „Það er búið að steypa fótinn
og einn fjórða af sökklunum,“ bæt-
ir Dagur við. Alls verður gólfflötur
bygginganna um 550 fermetrar þegar
allt er talið. „Það á eftir að skipta um
jarðveg undir minni byggingunum og
laugunum sjálfum en það verður gert
á næstu dögum, líklega bara núna eft-
ir helgi,“ segir Jóna Ester. „En nú er
bara að halda áfram að steypa, allt á
þetta svo að vera risið í september og
búið að loka húsunum fyrir veturinn,“
segir Dagur.
Byggingarnar eru rétt ofan við
Deildartunguhver og laugarnar að-
eins nokkra metra frá húsinu. Á suð-
urhlið hússins verða stórir gluggar og
útsýni yfir hverinn og nærumhverfi
hans úr veitingasalnum og frá barn-
um. „Svo ætlum við að leggja stíg frá
náttúrulaugunum niður að hvernum
og veita afrennsli lauganna meðfram
honum svo gufa stígi upp,“ segir Bára
að lokum.
kgk
Allar framkvæmdir vel á áætlun hjá Krauma
Þrjú þeirra fjögurra sem standa að
framkvæmdum í Deildartungu. F.v.
Jóna Ester Kristjánsdóttir, Bára Einars-
dóttir og Dagur Andrésson. Á myndina
vantar Svein Andrésson, eiginmann Jónu
Esterar.
Laugarnar sjálfar verða til vinstri í mynd. Að sögn Jónu stóð til að
skipta um jarðveg undir þær eftir helgina.
Sigurður Árni Magnússon smiður til vinstri og Jónmundur
Magnús Guðmundsson höfðu í nógu að snúast þegar blaðamann
bar að garði.