Skessuhorn - 09.05.2018, Blaðsíða 14

MIÐVIKUDAGUR 9. MAÍ 201814
Þriðjudaginn 1. maí voru tímamót
hjá Hestamannafélaginu Dreyra. Þá
var skrifað undir samning um bygg-
ingu nýrrar reiðhallar á svæði félags-
ins á Æðarodda við Akranes. Félagið
er nú eitt fjögurra hestamannafélaga
í landinu sem enn er án reiðhallar
eða annarrar aðstöðu til tamningar
og þjálfunar. Hin þrjú félögin eru öll
fámennir klúbbar í samanburði við
Dreyra. Akraneskaupstaður verð-
ur eigandi reiðhallarinnar, en hún
verður byggð fyrir um sextíu millj-
óna króna framlag frá Akraneskaup-
stað auk afsláttar af gatnagerðar-
gjöldum, tíu milljóna króna fram-
lag kemur frá Hvalfjarðarsveit auk
vinnuframlags frá félögum í hesta-
mannafélaginu. Áætlaður heildar-
kostnaður við bygginguna er um
97 milljónir króna, ef gatnagerð-
argjöld eru talin með. Skrifað var
undir samning síðdegis á afmælis-
dag hestamannafélagsins 1. maí að
lokinni firmakeppni. Til stendur að
byggja límtréshús og á það að vera
tilbúið eftir eitt ár. Skessuhorn hitti
að máli Ásu Hólmarsdóttur, for-
mann Dreyra, og ræddi við hana um
þær framkvæmdir sem framundan
eru.
Þurfa deiliskipulags-
breytingu
Í gildandi deiliskipulagi fyrir Æð-
arodda er gert ráð fyrir byggingar-
reit fyrir reiðhöll á flötinni sunn-
an við fyrstu hesthúsin í hverfinu.
Hugur hestamanna stefnir þó í þá
átt að byggja reiðhöllina sunnan við
og sem næst félagsheimilinu á Æð-
arodda, sem heitir Oddinn. „Okk-
ur líst best á að byggingin rísi þar
sem hestakerrum hefur verið lagt
fram að þessu. Því þarf að breyta
deiliskipulagi fyrir svæðið áður en
framkvæmdir geta hafist,“ segir
Ása. Hún segir að byggt verði 1.125
fm. hús sem verður 25 metra breitt
og 45 metra langt. Sambærilegar
reiðhallir er til að mynda að finna á
Flúðum og Selfossi. „Við erum hins
vegar ekki með í býgerð dýra bygg-
ingu. Gólfflöturinn verður vissu-
lega góður en þetta verður ekki hús
með mikilli áhorfendaaðstöðu, fáir
bekkir og engin stúka. Húsið er þó
ekki enn fullteiknað en við urðum
að ákveða stærð þess til að getað
aflað verðhugmynda í bygginguna.
Fengum svo verð úr forútboði frá
Límtré-Vírneti í límtréshús sem
okkur líst afar vel á. Þá er góð reynsla
af reiðhöllum sem byggðar hafa
verið úr einingum frá Límtré-Vír-
neti. En þar sem Akraneskaupstað-
ur verður formlegur eigandi hússins
getur verið að byggingin þurfi að
fara í formlegt útboð. Það á eftir að
koma í ljós. Við Dreyrafélagar lítum
á það sem kost að reiðhöllin verði
staðsett sem næst félagsheimilinu.
Bæði mun það auka nýtingu á hús-
unum og hægt verður t.d. að sam-
nýta hreinlætisaðstöðu sem fyrir er
í félagsheimilinu. Það er afar mikil-
vægt fyrir okkur að Akraneskaups-
staður eigi reiðskemmuna rétt eins
og öll önnur íþróttahús á Akranesi.
Eignarhaldið er í raun ákveðin yfir-
lýsing um hestamennsku sem íþrótt
á Akranesi og á starfsemi félagsins.“
Aðstöðuleysið hamlandi
Ása dregur ekki dul á að það hamli
faglegri reiðkennslu og keppnis-
þjálfun hjá Dreyra að hafa ekki að-
gang að reiðhöll. „Það eru einung-
is fjögur hestamannafélög á land-
inu sem eru án aðstöðu af þessu
tagi. Dreyri er langfjölmennasta fé-
lagið án reiðhallar, en félagafjöld-
inn hjá okkur er nú um 240. Félagið
er fimmta fjölmennasta aðildarfélag
Íþróttabandalags Akraness og því
má segja að tími hafi verið kominn
á að ÍA og Akraneskaupstaður létu
röðina koma að okkur hvað fjár-
frekar framkvæmdir varðar.“
Ása segir að þótt umræðan um
reiðhöll á Æðarodda hafi ver-
ið í gangi í mörg ár, hafi það gerst
fremur snögglega að hún komst
upp úr þeim fasa og á framkvæmda-
stig. „Þetta var hálfgert póker-
spil á síðustu metrunum milli full-
trúa úr sveitarstjórnum á félags-
svæðinu okkar, þ.e. Hvalfjarðarsveit
og Akraneskaupstað. Dálítið eins
og Dreyri væri skilnaðarbarn þar
sem koma þurfti foreldrunum til að
tala saman,“ segir Ása og hlær. „En
það er bara frábært að ná lendingu
í svona máli fyrir sveitarstjórnar-
kosningar. Eftir þær kemur nýtt fólk
í sveitarstjórnir sem mun taka tíma
að setja sig inn í stöðuna áður en
byrjað verður að ákveða dýrar fram-
kvæmdir. Þar að auki hefur það því
miður verið að þannig undanfarinn
áratug að hestmennskan er fjarlæg-
ur heimur fyrir flesta sem hafa starf-
að í sveitarstjórnum á okkar svæði
og er það líka fyrir þá nýju sem nú
munu taka sæti í sveitarstjórnun-
um eftir kosningar. Við höfum því
á liðnum mánuðum verið með það
sem kalla mætti kynningarþrýsting
í málinu. Höfum haldið fólkinu í
sveitarstjórnunum vel upplýstu,
farið í kynningarferðir með það
og verið fylgin í þeirri staðföstu
trú okkar að reiðhöll muni nýtast
mörgum, ekki bara hestamönnum.
Þarna verður til aðstaða sem hægt
verður að nýta fyrir margt annað
en hross og hestamenn,“ segir Ása.
Hún vill þakka þeim sveitarstjórn-
arfulltrúum sem staðið hafa þéttast
við bakið á hestamönnum í þess-
ari baráttu. Nefnir hún sérstaklega
Ólaf Adólfsson og Einar Brandsson
frá Akraneskaupstað ásamt Sæv-
ari Frey Þráinssyni bæjarstjóra, en
auk þeirra var Björgvini Helgasyni
og Stefáni Ármannssyni sveitar-
stjórnarfulltrúum og Skúla Þórð-
arsyni sveitarstjóra í Hvalfjarðar-
sveit mjög umhugað að klára þetta
mál. Í samningi um reiðhöllina er
sérstaklega getið þess að Dreyri
opni félagsstarf sitt meira gagn-
vart almennum íbúum sveitarfélag-
anna. „Við skuldbindum okkur til að
kynna hestamennsku sérstaklega og
hér verður opið hús a.m.k. á hverju
ári. Allt verður gert til að nýtingin
verði sem best á reiðhöllinni.“
Virkjum félagsmennina
Af 97 milljónum sem reiðhöllin er
talin kosta leggur Akraneskaup-
staður fram 62,33%, Hvalfjarðar-
sveit 10,28% og Dreyri 27,39%.
Ása segir að framlag hestamanna-
félagsins verði bæði í formi fjár-
magns og einnig í formi mikillar
vinnu við byggingu hússins og því
verði það afar mikilvægt að félags-
menn verði virkir í þeirri vinnu
sem framundan er.
Rækta þarf sprotana
„Þetta verður bylting, það er ekki
hægt að nota hófstilltari orð,“ seg-
ir Ása um þann aðstöðumun sem
skapast þegar reiðhöllin verður
tekin í notkun. „Það er ekki allt-
af logn á Æðarodda og það vita til
dæmis reiðkennarar sem hafa neit-
að að koma til okkar vegna aðstöðu-
leysis. Þannig má segja að félag okk-
ar hafi verið mjög aftarlega á mer-
inni. Nýverið buðum við t.d. upp
á reiðnámskeið fyrir börn á Skáney
og niðurgreiddum verulega kostn-
að þeirra við þátttöku. Skemmst er
frá því að segja að tæplega 30 börn
nýttu sér þetta boð og ber það vott
um líflegt æskulýðsstarf hjá okk-
ur þrátt fyrir allt. En við þurfum að
vera á tánum. Ef aðstaðan hjá okkur
hefði áfram verið með þessum hætti
sæjum við bara eftir börnunum yfir
í aðrar tómstundir. Dreyri eins og
önnur íþróttafélög þurfa alltaf að
vera á tánum og hlúa að sprotunum.
Með þessari nýju reiðhöll komumst
við að hlið flestra félaga í landinu
sem fyrir löngu eru búin að byggja
upp góða aðstöðu þar sem hægt er
að stunda þjálfun og tamningar allan
ársins hring. Þetta er því líka spurn-
ing um atvinnumennina í hesta-
mennsku sem eftir ár geta rétt eins
búsett sig á félagssvæði Dreyra eins
og annarsstaðar þar sem aðstaðan er
í lagi.“
Agalega hamingjusöm
Næstu skref í undirbúningi bygg-
ingar reiðhallar er deiliskipulags-
breyting sem áætlað er að taki um
fjóra mánuði. Skóflustunga að bygg-
ingunni verður tekin í haust og efn-
ið í húsið komið í nóvember. „Ef
yleiningahús verður fyrir valinu gæti
það risið fyrir áramót ef allt gengur
að óskum og vígsla á 72 ára afmæli
Dreyra 1. maí 2019.“ Ása Hólmars-
dóttir kveðst stolt á þessum tíma-
mótum í sögu félagsins. „Ég er aga-
lega hamingjusöm með að ná þessu
í gegn á minni vakt sem formaður
Dreyra.“
mm
Reiðhöll verður byggð á Æðarodda
Formaður Dreyra líkir væntanlegum aðstöðumun hestafólks í Dreyra við byltingu
Ása Hólmarsdóttir formaður hestamannafélagsins Dreyra.
Fulltrúar Dreyra, Akraneskaupstaðar, Hvalfjarðarsveitar og Íþróttabandalags
Akraness við undirritun samnings síðdegis 1. maí. F.v. Hrafn Einarsson, Sævar
Freyr Þráinsson, Ása Hólmarsdóttir, Skúli Þórðarson og Marella Steinsdóttir.
Tekist í hendur að lokinni undirritun byggingasamnings.
Áformað er að deiliskipulagi verði breytt og reiðhöllin reist sunnan við félagsheimilið, þar sem hestakerrur standa nú