Fréttablaðið - 10.10.2015, Blaðsíða 10

„Tilraunin með ohf.-fyrirbærinu er sú
að reyna að líkja eftir því fyrirkomu-
lagi sem er á einkamarkaði. Ríkisút-
varpið á ekki að reyna að líkja eftir
því. Það á ekki að reyna að lúta þeim
lögmálum sem rekstur annarra fjöl-
miðla lýtur,“ segir Illugi Gunnars-
son, mennta- og menningarmála-
ráðherra. Þetta var meðal þess sem
fram kom í Föstudagsviðtali Frétta-
blaðsins sem hlusta má á í heild sinni
inni á Vísir.is. Þar ræddi Illugi meðal
annars tengsl sín við Orku Energy og
samskiptin við fjölmiðla.
Hann minnist á deilur um skipan
stjórnar RÚV eftir síðustu kosningar.
„Það stóð til að breyta því hvernig
stjórnin yrði skipuð. Hagsmuna-
samtök úti í bæ áttu að eiga fulltrúa
í stjórn og annað slíkt. Ég var þeirrar
skoðunar að eini aðilinn sem ætti að
skipa fólk í þá stjórn væri Alþingi.
Ábyrgðin væri stjórnmálamann-
anna. Og þeir væru kosnir og hefðu
ábyrgð gagnvart kjósendum, fólkinu
sem borgar þetta með skylduáskrift.“
Framlagið skiptir ekki öllu
Illugi segir að RÚV eigi ekki að vera
í samkeppni við aðra miðla á aug-
lýsingamarkaði. „Það er vaxandi
vandamál. Það sem er að gerast á
fjölmiðlamarkaðinum er að dreifing
á efni er að verða önnur en hún var.
Sjáið fyrirbæri eins og Netflix sem
er að koma á markaðinn. Ég spái
því að stóru breytingarnar verði
þegar fyrirbæri eins og Facebook
og Google fara að verða efnisveitur
af alvöru. Þá held ég að það muni
þróast þannig að það verði komið
framboð af efni sem er miklu meira
en við þekkjum í dag. Þá er spurning
hver verði staða Ríkisútvarpsins í því
samhengi. Ég held að það sé miklu
stærri spurning sem við verðum að
fást við og ræða heldur en kannski
akkúrat hvort framlagið til RÚV sé
þessum milljónum hærra eða lægra.“
Hann segist þó þeirrar skoðunar
að enn sé þörf á almannaútvarpi og
-sjónvarpi, einkum -útvarpi. „Ég held
að þessi þróun muni hafa þau áhrif
að kaup Ríkisútvarpsins á til dæmis
erlendu afþreyingarefni hljóta að
dragast fljótt saman. Ég get ekki
ímyndað mér að það geti verið hlut-
verk Ríkisútvarpsins að bjóða upp
á slíkt. Það er augljóst hvað mun
gerast, línulegt áhorf svokallað, þar
sem fólk sest niður þegar það ætlar
að horfa á eitthvað, fer minnkandi og
mun fara hratt minnkandi á næstu
árum.“ Hann heldur áfram: „Þá
finnst mér að Ríkisútvarpið eigi að
sinna frekar því hlutverki að búa til
íslenskt efni. Það er kjarnahlutverk
Ríkisútvarps.“
Hann segir að einnig megi velta
fyrir sér fréttastofunni. „Það má
benda á að magn af fréttum í dag er
margfalt meira en var fyrir örfáum
árum. Aðgengi okkar að erlendum
fréttamiðlum er allt annað og meira
en áður var. Eins líka eru möguleikar
til þess að koma á framfæri skoðun-
um orðnir aðrir en var hér þegar eina
leiðin var í gegnum Ríkis útvarpið og
flokksmálgögn. Nú geta allir komið
sínum skoðunum fram með marg-
víslegum hætti. Ég held að þessar
breytingar séu það sem við þurfum
að ræða.“
Hann segir alltaf hafa verið miklar
pólitískar deilur um RÚV. „En ég ætla
að leyfa mér að hafa þá von í brjósti
að við getum rætt um framtíðina án
þess að lenda strax í skotgröfum.“
Illugi segir RÚV taka of mikið pláss
á auglýsingamarkaði.
Láti ríkisframlag sér nægja
„Dagskrárgerðin endurspeglar það.
Að menn séu að horfa eftir áhorfinu
til þess að geta náð sér í auglýsinga-
tekjurnar. Á síðasta kjörtímabili
horfði maður á hlutfall auglýsinga-
tekna og síðan ríkisframlagsins,
hlutfall auglýsingatekna hækkaði
töluvert. Það er ekki jákvætt. Spurn-
ingin sem menn standa frammi fyrir
er hvort fólk sé tilbúið til að halda
RÚV í sama umfangi, en taka það út
af auglýsingamarkaði. Bæta við frá
skattgreiðendum því sem munar.
Geta menn séð fyrir sér að RÚV
þyrfti að færa rekstur sinn niður í
bara ríkisframlagið? Ég vil gjarnan
sjá þá þróun.“
Illugi vill sjá minna af rekstrarfé
RÚV koma frá auglýsingum. „Ég held
að við hljótum öll að geta verið sam-
mála um það. Ég tel að RÚV eigi ekki
að vera í samkeppni við einkaaðila
um efni.“
Breytist mikið á næstu árum?
„Við skulum bíða niðurstöðu
nefndar sem sett var á laggirnar í vor
og er að skoða rekstur og rekstrar-
umhverfi RÚV. Þar mun væntan-
lega koma fram einhver mynd á það
hvernig við höfum komist á þennan
stað sem við erum á í dag í rekstrin-
um. Ég held að í framhaldinu þurfum
við að efna til þessa samtals um hvert
við viljum stefna.“
RÚV eigi ekki að keppa við aðra miðla
Illugi Gunnarsson segir Ríkisútvarpið taka of stórt pláss á auglýsingamarkaði. RÚV eigi ekki að líkja eftir fyrirtækjum á einkamarkaði.
Illugi segir hljóta að draga úr kaupum RÚV á erlendu afþreyingarefni.
Fréttablaðið/Anton Brink
Geta menn séð fyrir
sér að RÚV þyrfti
að færa rekstur sinn niður í
bara ríkisframlagið? Ég vil
gjarnan sjá þá þróun.
Illugi Gunnarsson,
mennta- og menningarmálaráðherra
ROKIÐ REYNIST VEL
Nú hafa vindmyllur Biokraft í Þykkvabæ snúist í heilt ár
með frábærum árangri. Á tímabilinu október 2014 - sep-
tember 2015 framleiddu vindmyllurnar 4.425 MWh. af
rafmagni. Meðalnýtingin er 42,1% en til samanburðar
er meðalnýting á heimsvísu á bilinu 28-30%.
Þessi raforka dugar til að:
• knýja 920 heimili árlega
• keyra rafbíl 610 sinnum umhverfi s jörðina
• fullhlaða nýjustu rafhlöðu iPhone 6s í
423.000.000 skipti!
ORKA NÁTTÚRUNNAR
Bæjarhálsi 1, 110 Reykjavík · Sími 591 2700 · www.on.is · on@on.is
Orka náttúrunnar er annað
stærsta orkufyrirtæki
landsins. Fyrirtækið
byggir á mikilli þekkingu
og reynslu í orkuvinnslu.
Leiðarljós okkar er
að bjóða rafmagn á
samkeppnishæfu verði til
allra landsmanna.
Ólöf Skaftadóttir
olof@frettabladid.is
Viktoría Hermannsdóttir
viktoriah@365.is
1 0 . o k t ó b e r 2 0 1 5 L A U G A r D A G U r10 f r é t t i r ∙ f r é t t A b L A ð i ð