Lögmannablaðið - 2020, Blaðsíða 18

18 LÖGMANNABLAÐIÐ TBL 04/20
„GÆI KÝLDI MIG
MÁ ÉG EKKI ÖRUGGLEGA KÝLA HANN TIL BAKA?“
LÖGFRÆÐINÖRDAR VINSÆLIR Á FACEBOOK
Á FACEBOOK ER SÍÐAN LÖGFRÆÐINÖRDAR MEÐ 3562 MEÐLIMUM.
ÞAR SKIPTAST LÖGFRÆÐINGAR Á SKOÐUNUM UM HIN ÝMSU MÁL
AUK ÞESS SEM ALMENNINGUR SENDIR FYRIRSPURNIR UM
LÖGFRÆÐILEG MÁLEFNI. OFT ER LÍFLEGT Í ÞESSUM HÓPI OG Í
NÓVEMBER MÁNUÐI EINUM KOMU ALLS 28 FYRIRSPURNIR EÐA
UMFJALLANIR, EÐA AÐ JAFNAÐI EIN Á DAG. ALLTAF ER ÞAÐ
EINHVER SEM SVARAR EN DÆMI ERU UM AÐ HÁTT Í 30 UMMÆLI VIÐ
EINA FÆRSLU, BÆÐI FRÁ LÖGFRÆÐINGUM OG ALMENNINGI.
LÖGMANNABLAÐIÐ RÆDDI VIÐ BÖRK I. JÓNSSON LÖGMANN,
ANNAN AF STOFNENDUM SÍÐUNNAR.
Það voru þeir Börkur I. Jónsson og Ragnar Tjörvi Baldursson
sem að stofnuðu hópinn árið 2014 en að sögn Barkar fannst
þá vanta vettvang þar sem lögfræðingar gætu spjallað sín
á milli um lögfræðileg málefni og almenningur komið
með fyrirspurnir. „Við settum fram reglur um að tilgangur
hópsins væri að ræða lögfræðitengd álitaefni og að innlegg
og ummæli yrðu ávallt að vera málefnaleg,“ sagði Börkur.
Voruð þið með einhverja fyrirmynd, íslenska eða erlenda?
Já, það er hópur á Facebook sem heitir Markaðsnördar sem
er vettvangur fyrir alla þá sem hafa áhuga á markaðsmálum
í víðum skilningi. Við höfðum áhuga á að búa til einhvern
sambærilegan stað fyrir lögfræðinördana.
Það er greinilegt að síðan er mjög vinsæl, finnst ykkur hún hafa
gegnt hlutverki sínu vel?
Já, þetta hefur verið af hinu góða. Síðan þjónar eiginlega
tvennum tilgangi. Annars vegar er þetta vettvangur fyrir
lögfræðinörda sem eru að spá í hinu og þessu tengt
lögfræðinni og svo fyrir almenning til að spyrja einfaldra
spurninga sem lögmenn/lögfræðingar úti í bæ svara. Þá
hafa einhverjir aflað sér viðskipta í gegnum síðuna.
Hvaða reglur gilda á síðunni?
Öllum meðlimum er gert að gæta kurteisi í skrifum sínum
og hatursorðræða er stanglega bönnuð. Ef reglur eru
brotnar getur það leitt til þess að innlegg eru fjarlægð og
viðkomandi er vikið úr hópnum. Það hefur þó ekki verið
mikið um það og við reynum að halda í að fólk hafi málfrelsi
svo framarlega að það er kurteist og málefnalegt.
Er mikil vinna að stjórna síðu sem þessari?
Það fylgir þessu auðvitað ákveðin vinna en við höfum
fengið til liðs við okkur fimm aðra lögfræðinga sem eru
stjórnendur síðunnar auk okkar Ragnars. Það eru þeir Pálmi
Rögnvaldsson, Andri Axelsson, Pétur Fannar Gíslason,
Hafliði Gunnar Guðlaugsson og Ingi Freyr Ágústsson.
Samþykkið þið alla sem biðja um aðgang að Lögfræðinördum?
Við höfum hópinn opinn fyrir alla en samþykkjum þó ekki
erlend nöfn sem hafa ekki tengsl við Ísland.
Að lokum, hafið þið fengið viðbrögð við síðunni hjá lögmönnum?
Já, margir lögmenn eru í hópnum og þó nokkrir mjög
virkir. Í gegnum tíðina hefur verið umræða um að lögmenn
væru ragir við að vera með mjög djúpar pælingar þar sem
í hópnum eru líka ólöglærðir. Því tókum við okkur til og
stofnuðum annan hóp á Facebook sem heitir einfaldlega
„Lögmenn“ og í hann er eingöngu hleypt lögmönnum
með virk réttindi hjá LMFÍ. Þar eru um 280 lögmenn og
er umræðan nokkuð virk bæði hvað varðar lögfræðileg
álitaefni sem og praktísk atriði varðandi lögmannastarfið.
EI