Fréttablaðið - 19.03.2022, Blaðsíða 64

í boði,“ segir Lovísa, sem jafn-
framt er með stúdíó heima við. „Ég
er í mörg ár búin að vera að reyna að
ákveða hvað ég vil verða og undan-
farið hefur verið ákveðin lægð hjá
mér í tónlistinni.“
Þannig týnist tíminn
Lovísa hefur sjálf ekki gefið út efni
lengi en hefur töluvert unnið með
öðrum, Fjallabræðrum, Eyþóri Inga
og hinum og þessum. „Ég hef ekki
gefið út mitt eigið efni frá árinu 2013
en hef þó getað lifað af tónlist með
því að spila undir hjá öðrum og gera
tónlist fyrir til að mynda heimildar-
myndir. Svo hef ég haft nóg að gera
við að syngja lagið sem ég var svo
dásamlega heppin að syngja með
Ragga Bjarna, Þannig týnist tíminn.
Ég er mikið fengin til að syngja það
í brúðkaupum, afmælum og jarðar-
förum og sakna Ragga í hvert sinn.“
Lovísa segir þetta eina lag hafa
breytt áheyrendahóp sínum mikið
og víkkað hann út. „Það breytti svo-
lítið minni vegferð, áður var ég lítið
„mainstream“ en hef svolítið færst
þangað, sem mér þykir frábært því
það opnar alla möguleika fyrir mig.“
Lovísa rifjar upp upphaf ferilsins:
„Ég byrjaði með hráa plötu þar sem
ég kunni ekkert að syngja. Þegar
við vorum að skipuleggja hvað ætti
að prenta marga geisladiska og ein-
hver sagði þrjú hundruð fannst mér
það algjör bilun og svaraði: „Það eru
ekki þrjú hundruð manns að fara
að kaupa geisladiskinn minn! Svo
nokkrum mánuðum síðar var búið
að selja næstum tíu þúsund eintök.
Mig langaði að ganga með börnin
Eins og fyrr segir eiga þær Lovísa og
Agnes tvö börn og gekk Lovísa með
þau bæði.
„Ég var aldrei mikið að spá í barn-
eignum en ég veiktist alvarlega í
kringum tvítugt. Ég fékk hormóna-
heilaæxli sem stafaði af offram-
leiðslu á prolactini sem er mjólkur-
framleiðsluhormón. Æxlið sem var
við heiladingul var tekið en ég hef
alltaf verið í eftirfylgni vegna þessa
hjá hormónalækni. Þegar ég mætti
til hennar í reglubundna skoðun 32
ára gömul spurði hún hvort ég hefði
hugsað mér að eignast börn.“ Lovísa
segist hafa svarað því játandi en hafi
ekki verið búin að leiða hugann að
tímasetningum. „Hún sagði þá að
ég ætti að fara að huga að þessu
þar sem við vissum ekki hvernig
það myndi ganga að verða barns-
hafandi. Þá allt í einu fór þetta að
verða ofarlega í huga okkar og við
ákváðum að skella okkur í þetta.“
Það gekk vel fyrir Lovísu að verða
barnshafandi. „Mig langaði að
ganga með börnin og það gekk rosa-
lega vel, bæði meðganga og fæðing.
Drengurinn fæddist á heilsustofnun
Suðurlands og dóttirin heima.“
Viðstaddar heimafæðinguna voru
auk Lovísu og Agnesar, ljósmóðir,
móðir Lovísu og systir Agnesar.
„Þetta var dásamleg stund, Fróði
svaf á meðan hún kom í heiminn í
laug inni í svefnherbergi.“
Fékk nýtt nafn átta ára
Faðir Lovísu er upprunalega frá
Sri Lanka en flutti ungur að árum
til London þar sem hann svo síðar
kynntist móður Lovísu. „Þau bjuggu
þar saman þar til ég er tveggja og
hálfs árs þegar mamma flutti heim
með mig. Hún var aðeins 21 árs og
við bjuggum tvær næstu árin. Hún
stóð sig rosalega vel og kynntist svo
manni þegar ég var sjö ára og hann
gekk mér í föður stað. Ég á því tvo
pabba og er í góðu sambandi við
pabba minn úti.“
Aðspurð segist Lovísa ekki enn
hafa heimsótt Sri Lanka en það sé
klárlega á stefnuskrá fjölskyldunn-
ar. „Föðuramma mín er í London en
það eru margir fluttir frá Sri Lanka
eða látnir.“
Lovísa f lutti til Íslands eins og
fyrr segir tveggja og hálfs árs en þá
hét hún Louise Elizabeth Ganeshal-
ingam. „Ég á til dæmis minningar
um að fara á skólabókasafnið þegar
ég var sex, sjö ára og bókasafnsvörð-
urinn kunni ekki að skrifa nafnið
mitt og ekki ég heldur. Það var líka
verið að stríða mér, hvort sem það
var tilfallandi eða að ég var aðeins
dekkri en hinir.“
Fjölskyldan skipti svo um hverfi
og stakk móðir hennar þá upp á að
Lovísa skipti um nafn. „Hún vildi
gefa mér nýtt upphaf og íslenskaði
nafn mitt með mínu samþykki og úr
varð Lovísa Elísabet Sigrúnardóttir.
Ég hugsa oft um hvernig það væri í
dag ef ég væri enn Louise Elizabeth,
en ég man eftir að hafa verið kölluð
það og er enn Louise, eða Lou hjá
föðurfjölskyldunni. Mér fannst
spennandi að skipta um nafn, hitt
stóð oft í fólki og maður fékk aðeins
meiri athygli.“
Lovísa, Lou og Lay Low
Ég bendi Lovísu á að í raun eigi hún
þannig þrjú nöfn sem öll tengjast
einhverjum vissum hliðum lífs
hennar. Lovísa er nafnið sem flestir
nota og hún tengir sterkast við, hún
heitir Lou í huga föður síns og Lay
Low er landsþekkt tónlistarkona.
„Lay Low átti aldrei að verða
sviðsnafnið mitt. Ég hafði sett lag
eftir mig á MySpace undir nafninu
Lovísa og útgáfufyrirtæki hafði
samband og vildi að ég spilaði á
einhverjum tónleikum. Þeir spurðu
svo hvaða nafn þeir ættu að setja
á plakatið og ég og vinkona mín
svöruðum í flýti: Lay Low. Ég ætlaði
aldrei að verða sólóartisti, ætlaði
bara að vera í tónlist og jafnvel ekki
syngja sjálf. En allt í einu var ég úti
um allt í fjölmiðlum sem Lay Low .
Það var alls engin djúp pæling á bak
við þetta. Mér hefur alltaf fundist
smá aftenging að vera Lay Low hér á
Íslandi, enda erlent nafn og íhugaði
2009 að hætta að nota þetta, en það
virðist vera fast.“
Kynhneigðin er bara skali
En að sambýliskonunni og ástinni,
Agnesi, henni kynntist Lovísa í
gegnum sameiginlega vini árið
2009.
Aðspurð hvort þær séu ólíkar,
bókarinn og tónlistarkonan, þá
hlær Lovísa.
„Hún er eiginlega betri söngkona
en ég. Hún hefur oft sungið með mér
og hefur lokið námi frá FÍH. Hún
tekur mig stundum í söngþjálfun en
hefur ekki haft sig mikið í frammi.
Nú er hún bara komin í húsasmíði
líka og komin vel á veg með að klára
húsið okkar.“
Lovísa vill ekki setja stimpil á
kynhneigð sína. „Eftir á að hyggja
þá var þetta alltaf partur af mér,
stóra issjúið var kannski að segja
frá, en það er svo yndislegt í dag
að sjá hvað það er lítið mál. Það er
mikið stökk frá því þegar ég var ung
og fannst það hádramamóment að
segja fólki. Í dag er enginn að spá í
það hvað fólk er. Maður veit sjálfur
ekkert hvað maður er. Þetta er bara
skali. Mér finnst mjög erfitt þegar
fólk er að spyrja hvort ég sé lesbía,
ég hef alveg verið í sambandi með
manni og var gift manni. Í mínu
tilfelli snýst þetta bara um aðilann
sem ég verð ástfangin af.“
Gifti sig nítján ára
Aðspurð segist Lovísa hafa gifst
manninum þegar hún var aðeins
19 ára gömul, það hafi verið ein-
hver tíska í vinahópnum að gifta sig.
„En ég held við séum flest fráskilin í
dag,“ segir hún í léttum tón.
„Við vorum bara orðin bestu vinir
og erum enn í dag mjög góðir vinir.
Ég sé ekkert eftir þessu, við vorum
líka svo ung að það var ekkert beint
í húfi, maður hefði getað gert margt
verra. Við hlæjum oft að þessu, við
eigum enn brúðkaupsmyndirnar
og horfum bara á þessa krakka og
hlæjum að þeim,“ segir Lovísa, sem
hefur unnið töluvert að tónlist með
fyrrum eiginmanninum og voru
þau meðal annars saman í hljóm-
sveitinni Benny Crespo's Gang.
Þetta verður ævintýri
En fram undan er stóra stundin,
Eurovision-keppnin í Turon á Ítalíu
um miðjan maí. Stórfjölskyldan
er búin að bóka miða og hús og
er ætlunin að vera á Ítalíu í tvær
vikur. „Þetta verður ævintýri,“ segir
Lovísa. „Mér finnst gaman að vera
á kantinum, ég elska ekkert sviðs-
ljósið en finnst gaman að vera með.
Við náum líka allar vel saman svo
þetta verður bara mjög gaman.
Aðspurð um neikvæðniraddir
sem heyrðust eftir keppnina frá
þeim sem vildu að Reykjavíkur-
dætur sigruðu, segist Lovísa ekki
taka þær nærri sér.
„Það snertir mig ekki eins mikið
og ég hélt að það gæti gert. Ég var
búin að hugsa fyrir fram að það
væri alltaf betra að vera í öðru sæti
– frekar en að vera liðið „sem stelur
einhverju af einhverjum.“
Í rauninni hefði það verið þægi-
legra enda hefðum við verið sáttar
við annað sætið. Þó það sé rosalega
gaman að fara út þá var það ekki
endamarkmiðið. Mér fannst óþægi-
legt þegar fólk fór að kvarta yfir að
eitthvað hefði klikkað í símakosn-
ingunni og spurði út í það á RÚV þar
sem þeir sannfærðu mig um að við
hefðum hlotið afgerandi kosningu.
Milli okkar og Reykjavíkurdætra
er ekkert nema vinskapur og virð-
ing. Þessi umræða er ekki frá þeim
komin, þá hefði mér liðið illa. En ég
skil þetta alveg 100 prósent, ég er í
jafn miklu sjokki og allir aðrir. Fólk
vildi greinilega íslenskt rólegt lag
núna og það verður þá bara djörf
og áhugaverð tilraun hjá þjóðinni
að velja svona lag til að fara út. Lag
sem setur íslenska stemningu inn í
keppnina, sýnishorn af því sem er
að gerast á Íslandi,“ segir Lovísa að
lokum, til í slaginn. n
Lovísa svarar þremur nöfnum sem öll tengjast vissum hliðum lífs hennar. Lovísa er nafnið sem flestir nota og hún
tengir best við, í huga föður síns er hún Louise eða Lou og svo er það Lay Low sem er landsþekkt tónlistarkona.
Sigga, Elín og Beta Eyþórsdætur báru sigur úr býtum í Söngvakeppninni um
síðustu helgi með lagi Lay Low, Með hækkandi sól. MYND/RÚV
Ég var aldrei mikið að
spá í barneignum en ég
veiktist alvarlega í
kringum tvítugt.
Mér hefur alltaf fundist
smá aftenging að vera
Lay Low hér á Íslandi,
enda erlent nafn og
íhugaði 2009 að hætta
að nota þetta, en það
virðist vera fast.

32 Helgin 19. mars 2022 LAUGARDAGURFRÉTTABLAÐIÐ