Fréttablaðið - 28.05.2022, Qupperneq 58

Viktor Freyr Joensen mat-
reiðslumaður fór á kostum
í eldhúsinu á dögunum í
þættinum Matur og heimili.
Hann framreiddi sælkera-
máltíð þar sem matarheimur
Íslands og Túnis mættust
með stórkostlegri útkomu
þar sem íslenska lambið og
heimagerð krydd voru í for-
grunni.
sjofn@frettabladid.is
Vinkona Viktors, Safa Jemai frá
Túnis, stofnaði nýverið fyrirtækið
Mabrúka og byrjaði að flytja inn
heimagerð krydd frá heimalandi
sínu sem móðir hennar gerir. Vikt-
or heillaðist strax af kryddheimi
Túnis og leikur sér þessa dagana
að því að matreiða kræsingar úr
íslensku hráefni kryddaðar með
kryddunum frá Mabrúka.
Viktor starfar sem matreiðslu-
maður hjá Kjötkompaníi og hefur
verið þar í sex ár samhliða öðrum
vinnum og pásum.
„Ég fór að læra kokkinn hjá Fisk-
félaginu, en endaði á að hætta við
menntunina og fara að huga að
andlegri heilsu og prófa aðra hluti.
Ég tók að mér alls kyns sjálfboða-
vinnu sem ég gat gefið af mér í,
ferðaðist víðs vegar um heiminn,
hjólaði meðal annars frá Osló
til Rómar. Ég gerði marga hluti
sem hjálpuðu mér að byggja upp
persónuna sem ég er í dag. Seint
á árinu 2021 ákvað ég að brýna
hnífana upp á nýtt og fara aftur
að vinna hjá Kjötkompaníi,“ segir
Viktor.
Ástríðan til staðar frá barnsaldri
„Ástríða mín í matargerð hefur
blundað í mér frá barnsaldri. Pabbi
er lærður matreiðslumaður og
hefur unnið við það nánast allt
sitt líf. Sem krakki var ég alltaf að
stússast í eldhúsinu með pabba,
síðan tóku unglingsárin við og
áhuginn fjaraði út en ég tel að
matarástríðan hafi legið í undir-
meðvitundinni allan tímann.
Árið 2015-16 sótti ég um sem
bílstjóri hjá Kjötkompaníi og
fundu kokkarnir strax fyrir
mikilli ástríðu hjá mér fyrir
matreiðslunni. Einnig fengu þeir
smjörþefinn af því hve forvitinn ég
var um matinn sem við vorum að
framleiða.
Seinna sendu þeir mig af stað inn
í heim matreiðslunnar þar sem ég
gat gjörsamlega gleymt mér. Kunn-
áttan var mjög snögg að koma
enda ástríðan fyrir matargerð búin
að krauma lengi í undirmeðvitund
minni.“
Ákafi Söfu ýtti við mér
Aðspurður segir Viktor að kynni
hans af Söfu hafi í raun komið frá
henni. „Ég fékk símtal frá Söfu einn
daginn þar sem hún segir við mig
að hún hafi fengið númerið mitt frá
vinkonu sinni sem var systir stráks
sem ég vann fyrir og vildi kynna
fyrir mér heimagerðu kryddin
frá Túnis. Ákafinn og brennandi
ástríða hennar fyrir því að koma
kryddunum á framfæri fékk mig
klárlega til að kynna mér þessi
krydd.
Við hittumst mjög fljótt í kjöl-
farið á þessu símtali og ég hafði
ekki hugmynd um að hún hafði
bara búið hér í þrjú ár, talandi
þessa fyrirmyndar íslensku, í
mörgum störfum og búin að gera
ótrúleg hugbúnaðarverkefni og
vildi bæta við kryddfyrirtæki.
Þegar maður fær tækifæri til að
kynnast svona einstakri mann-
eskju hoppar maður strax á
vagninn. Eftir fyrsta fund okkar
höfum við verið að vinna saman
að því að koma þessum kryddum á
markaðinn hér á Íslandi.“
Djúpt bragð
Hvað er það sem þér finnst gera
kryddin frá Mabrúka framúr-
skarandi?
„Það er klárlega hversu djúpt
bragð þau gefa manni. Öll vinnan
og ástríðan sem er lögð í fram-
leiðsluna kemur fram í bragðinu.
Þar sem ég elska lamb þá er uppá-
haldsblanda mín Fyrir lambið frá
Mabrúka klárlega vinsælust hjá
mér núna. Hún inniheldur zaatar
sem er einnig nýtt uppáhalds hjá
mér.“
Viktor segist njóta sín í mat-
reiðslunni. „Mér hefur alltaf þótt
gaman að gera nýja hluti, eitthvað
sem ég hef aldrei gert áður. Er
mikið að hægelda hráefni núna,
til að mynda nautarifjur sem mér
finnst algjör snilld, svínarifjur og
fleira, smá svona „country style“
fílingur í mér þessa dagana.“
Viktor deilir hér með lesendum
uppskriftum að öllum réttunum
sem hann eldaði í þættinum
Matur og heimili á dögunum,
lambarifjum með mintu-kúskús,
apríkósu-lauksultu, mintu-has-
selback-kartöflum og bökuðum
kirsuberjatómötum.
Mintu-kúskús
Kúskús
5 stönglar minta
3 chili, kjarnhreinsuð
2 stönglar steinselja
250 g vatn
2-4 g salt og pipar, eða eftir smekk
10 g ólífuolía
Kúskús og vatn sett í pott með smá
salti og pipar (Hlutföll: 1 kúskús/1
vatn) Hægt er að steikja kúskúsið
á undan suðu fyrir dýpra bragð.
Einnig er hægt að sjóða með soð-
vatni, til dæmis grænmetissoði eða
nautasoði. Soðið í 10 mínútur eða
þangað til kúskúsið hefur drukkið
í sig vatnið. Skerið mintu, chili og
steinselju í smátt og hrærið saman
með ólífuolíu. Smakkið til með
salti og pipar.
Lambarifjur
6-12 stk. lambarifjur / kótilettur
Lambablanda frá Mabrúka eftir
smekk
Salt og pipar frá Mabrúka eftir
smekk
Ólífuolía, kaldpressuð, eftir smekk
Penslið lambarifjurnar vel með
ólífuolíu. Kryddið þær með
Lambablöndu kryddinu frá
Mabrúka, salti og pipar. Steikið
rifjurnar á rjúkandi heitri pönnu
í fimm mínútur á hvorri hlið (fer
eftir bitum). Einnig er mjög gott að
grilla eða setja í ofn í tíu mínútur
á 180°C hita. Leyfið kjötinu að
standa í fimm til tíu mínútur til að
það taki sig (gott er að undirbúa
meðlætið og svo bera kjötið fram).
Apríkósu-lauksulta
1 sítróna
10-15 þurrkaðar apríkósur
3 laukar
30 g edik
Graslaukur eftir smekk
2 msk. hvítlauksolía
Skerið lauk niður í smáa strimla.
Setjið lauk og hvítlauksolíu í pott
á lágum hita og leyfið lauknum
að svitna (passa að laukurinn
verði ekki brúnaður). Skerið
apríkósurnar á meðan laukurinn
svitnar. Setið edik og sítrónusafa út
í og eldið áfram á lágum hita í tíu
til fimmtán mínútur (eða þangað
til laukurinn er orðinn mjúkur og
sultaður). Blandið apríkósum við,
slökkvið á hitanum leyfið aprí-
kósunum að liggja í lauknum í smá
stund. Skerið graslauk og blandið
honum saman við.
Kirsuberjatómatar
Þurrkaður sítrónubörkur frá Ma-
brúka eftir smekk
Salt og pipar eftir smekk
50 g ólífuolía
50 g hunang
1 askja kirsuberjatómatar
Hitið ofninn í 200°C. Blandið
tómötunum saman við ólífuolíu,
hunang, þurrkaðan sítrónubörk-
inn frá Mabrúka, eða ferskum, salti
og pipar. Setjið tómatana inn í ofn
og bakið í um það bil tíu mínútur.
Mintu hasselback-kartöflur
4- 6 bökunarkartöflur
Best á grænmetið kryddið frá
Mabrúka
Zaatar/minta eftir smekk
Saltflögur eftir smekk
Graslaukur eftir smekk
Hvítlauksolía eftir smekk
Hitið ofninn í 200°C. Skerið kart-
öflurnar í tvennt og skerið síðan
smá rendur niður helminginn á
hverri kartöflu. Smyrjið hvítlauks-
olíu á kartöflurnar. Stráið zaatar/
mintu, Best á grænmetið krydd-
unum frá Mabrúka yfir kartöfl-
urnar ásamt saltflögum. Síðan eru
kartöflurnar bakaðar í ofninum
í 30-40 mínútur eða þar til þær
verða gullinbrúnar. n
Matartöfrar frá Túnis
Viktor Freyr
Joensen og Safa
Jemai vinna vel
saman.
FRÉTTABLAÐIÐ/
VALLI
Glæsilegir réttir hjá þeim Viktori og Söfu.
Mintu hasselback-kartöflur.
Lambarifjurnar líta girnilega út og kitla bragðlaukana.
Hér má sjá kræsingarnar sem Viktor töfraði fram í þættinum Matur og heimili.
6 kynningarblað A L LT 28. maí 2022 LAUGARDAGUR