Sjómannablaðið Víkingur - 01.04.2011, Qupperneq 40

40 – Sjómannablaðið Víkingur
Eflaust hafa lesendur blaðsins verið
uppteknir undanfarna mánuði við
að blaða í gegnum alla bæklingana sem
þeir náðu sér í á sjávarútvegssýning-
unni og því kominn tími til að hvíla
sig á þeim og líta á nokkrar heima-
síður. Það verður víða farið að þessu
sinni.
Fyrsta síðan er bandarísk og fjallar
um Military Sealift Command. Slóðin á
síðuna er www.msc.navy.mil en þar er að
finna upplýsingar um starfsemina sem og
þau skip sem tilheyra Sealift Command.
Þessi hluti flotans eru þjónustu, aðstoð-
ar- og rannsóknarskip sem ekki eru
mönnuð sjóliðum heldur óbreyttum
borgurum. Sum skipa þeirra koma árlega
við hér á landi en það eru oftast
rannsóknarskip.
Næsta síða er mikil uppspretta upp-
lýsinga um fiskiskip og reyndar hef ég
áður minnst á þessa síðu en hún hefur
nú tekið miklum breytingum. Slóðin á
hana er www.fiskerforum.dk sem er í
raun nafn síðunnar. Þar er ógrynni af
myndum af evrópskum fiskiskipum sem
og annarra þjóða skipum. Þetta er síða
sem tekur meira en kvöldstund að fara í
gegnum en sannarlega áhugaverð og
skemmtileg.
Margan manninn dreymir um að eign-
ast snekkju. Ég rakst á síðu sem er
hreint augnakonfekt fyrir áhugasama á
slóðinni www.oceanindependence.com en
þar má reyndar líka finna snekkjur sem
til sölu eru.
Það eru ekki mörg ár síðan við fylgd-
umst með smíði risafarþegaskipsins
Oasis of the Seas á netinu sem og í um-
fjöllun blaðsins á vettvanginum Utan úr
heimi. Nú eru skipin orðin tvö og önnur
tvö slík skip í smíðum sem væntanleg
eru í rekstur á næstu árum. Á síðunni
www.allureoftheseas.com er hægt að sjá
allar þær lystisemdir sem í boði eru á
þessum glæsifleyjum sem mun örugglega
leiða til þess að einhverjir fara að skoða
heimasíður þar sem hægt er að kaupa
ferðir með skipunum.
Fyrir þá sem telja verðið of hátt fyrir
ferð á Allure of the Seas er hægt að finna
ögn ódýrari ferðir á slóðinni www.dublin.
iwai.ie. Hér er fjallað meðal annars um
síkjaferðir á Írlandi þar sem hægt er að
leigja sér báta til skemmtisiglinga sem og
skemmtiferðir á stærri skipum. Ögn
ódýrari pakki.
Kannski er bara best að gleyma
skemmtiferðum og hugsa bara um vinn-
una. Þá er að velta því fyrir sér hvort
ekki væri bara leið að kaupa sér eins og
eitt skip. Eða þá að komast að því hvort
skipið sem þið eruð á sé hugsanlega
komið á söluskrá. Slóðin www.janson.no
leiðir okkur á fund við norskan skipasala
og þar má sjá mörg kunnugleg skip list-
uð. Reyndar er þar líka verið að bjóða
kvóta og þar með talið á makríl. Ekki
ónýtt það.
Ef við erum að sigla til Norðursjávar-
hafna Þýskalands og gleymdum að verða
okkur úti um flóðatöflur þá er ekki öll
nótt úti ef við erum nettengd. Á slóðinni
www.bsh.de/aktdat/wvd/wahome.htm er
hægt að sjá sjávarföll á þessu svæði sem
getur komið að góðum notum.
Mörgum hefur þótt nóg um allar hin-
ar nýjar skammstafanir sem eru farnar
að heyrast í tengslum við menntun og
þjálfun sjómanna. STCW, ARPA, DP og
ECDIS hafa hljómað í eyrum manna nú
allra síðustu ár og sumir þeir eldri sem
búnir eru að vera í landi um áraraðir átta
sig engan veginn á því um hvað er verið
að tala. ECDIS er í stuttu máli skamm-
stöfun á rafrænum sjókortum og upplýs-
ingakerfum en þau skip sem búin eru
slíkum búnaði verða að hafa skipstjórn-
endur með viðeigandi skírteini til að
mega starfrækja búnaðinn. Á slóðinni
www.ecdisfit.com er að finna upplýsingar
um reglur og kröfur sem gerðar eru til
skipstjórnarmanna og hvet ég alla þá
sem eru að vinna í að endurnýja pappír-
ana sína að kynna sér kröfurnar og sækja
sér þá menntun í þessum efnum sem
krafist er. Skipstjórnarskólinn býður upp
á Ecdis námskeið.
Ein síða sem höfðar til höfundar er að
finna á slóðinni www.noreq.no og er
framleiðandi að björgunarbúnaði fyrir
skip og borpalla. Þessir hafa þróað ýmsar
gerðir báta og eru búnir að gefa tóninn
um línuna sem framundan er í þeim efn-
um. Það líður þó eflaust einhver tími þar
til við fáum að sjá þessar nýjungar birt-
ast á okkar skipum en þá verða þær
orðnar gamaldags.
Lokasíðan að þessu sinni er íslensk og
er netútgáfan af Útvegsblaðinu. Slóðin
www.utvegsbladid.is leiðir okkur á síður
blaðsins en ritsjóri þessi er fyrrum rit-
stjóri Sjómannablaðsins Víkings. Þar
kennir ýmissa grasa í fréttum af sjávar-
útveginum.
Læt ég nú staðar numið og minni
ykkur, lesendur góðir, á að ef þið rekist á
góðar heimasíður sem gætu glatt og frætt
okkur hin að senda mér slóðina á net-
fangið iceship@heimsnet.is.
eftir Hilmar Snorrason