Bændablaðið - 21.07.2022, Side 48

48 Bændablaðið | Fimmtudagur 21. júlí 2022
Við höldum okkur við grillið og
hér er gamla góða lambið mætt í
sumarboðið.
Lamb er eflaust uppáhalds­
grillsteik landans enda gæðavara
og mikilvægur þáttur í mataræði
þjóðarinnar í gegnum tíðina. Við
notum hér framhryggjarsneiðar
en að sjálfsögðu er lítið mál að
skipta þeim út fyrir aðra bita af
lambakjöti. Minna nýttir bitar
eins og framhryggjarsneiðar eru
bragðmiklar og innihalda töluverða
fitu sem skilar sér í safaríkri steik.
Vegna fitunnar er mjög mikilvægt
að passa grillið og fylgjast með til
að kjötið brenni ekki.
Íslenskt grænmeti er svo algjört
skylduatriði í grillveisluna. Hnúðkál
er afurð sem er á markaði í örfáar
vikur sem má mæla með í einföld
salöt eða eitt sér, það nýtur sín vel
með ögn af sítrónusafa og góðri
olíu, eða með mildu ediki. Sveppi
má líka grilla, okkur finnst best að
leyfa þeim að fara beint á grillið og
brúna þá vel þar, án þess að fylla þá.
Vilji fólk ost með sveppunum sínum
er tilvalið að rífa góðan ost yfir þá
að lokinni eldun. Chimmichurri
er suður­amerísk grillsósa sem
er í grunninn byggð á jurtum,
sítrónusafa eða ediki og olíu. Við
leyfum okkur að stílfæra hana að
íslensku sumri og sól, með rabarbara
og skessujurt úr garðinum. Svo
er jú öruggara að enda þetta með
skotheldri majonessósu, enda
þurfa Íslendingar vel af sósu með
grillmatnum.
Grillaðar
lambaframhryggjarsneiðar
4 vænar framhryggjarsneiðar
2 kvistar blóðberg
1 hvítlauksgeiri
1 msk. matarolía
Kremjið og saxið hvítlaukinn
og blandið í olíuna ásamt
garðablóðbergi.
Berið á kjötið og látið standa í
stofuhita í 1­2 klst. Hitið grillið og
saltið kjötið, eldið að eigin smekk.
Við kjósum meðaleldun (e. medium)
fyrir lamb.
Grillað grasker
½ grasker
2 msk. matarolía

Við notum hér frekar smátt grasker
sem kallast Butternut Squash
á ensku. Skrælið með beittum
hníf og kjarnhreinsið. Skerið í
þverhandarþykkar sneiðar, penslið
með olíu og grillið með kjötinu þar
til er mjúkt í gegn. Athugið að eftir
nokkurra mínútna eldun er betra að
færa graskerið á eldfastan bakka
og klára eldunina á óbeinum hita á
grillinu.
Grillaðir sveppir
1 box Flúða kastaníusveppir
1 msk. matarolía
Grillpinnar
Leggið grillpinnana í bleyti, þræðið
sveppina á og penslið með matarolíu
fyrir eldun.
Hnúðkálssalat
1­2 hnúðkál
½ sítróna, börkur og safi
1 msk. matarolía
Graslaukur

Íslenskt ferskt og gott hnúðkál er nú
komið í verslanir og þess ber að njóta
á meðan framboð er á því fram til
hausts. Skrælið og skerið í þunnar
sneiðar, rífið börk af sítrónu, kreistið
safann yfir og blandið saman við kálið
ásamt ögn af söxuðum graslauk og
berið fram strax.
Grænpipar majones
3 dl gott majones
1 dl grísk jógúrt
1 msk. grænpipar (niðursoðinn)
1 msk. hunang
Sítrónusafi

Notið niðursoðinn grænpipar, sem er
í vatni og fæst ýmist í litlum krukkum
eða niðursuðudósum. Saxið fínt
helminginn af piparnum og hrærið
saman við majones, jógúrt og hunang.
Smakkið til með salti og sítrónusafa.

Rabarbara „Chimmichurri“
2­3 stilkar rabarbari
Lófafylli af steinselju
5­6 blöð skessujurt
½ laukur
1 hvítlauksrif
1 dl eplaedik
2 dl matarolía

Saxið rabarbara og hvítlauk, lauk
í smáa bita,steinselja og skessujurt
söxuð fínt. Blandið saman og smakkið
til. Sósan má gjarnan fá nokkrar klst. í
kæli til að brjóta sig og ná fram fullu
bragði.
Á bænum Birnustöðum á Skeiðum búa
hjónin Jóna Þórunn Ragnarsdóttir og
Ólafur Hafliðason, sem reka holdakúabú
með myndarbrag.
Býli: Birnustaðir, Skeiðum.
Staðsett í sveit: Í hlíðum Vörðufells.
Ábúendur: Ólafur Hafliðason og Jóna
Þórunn Ragnarsdóttir.
Fjölskyldustærð (og gæludýra):
Við hjónin, Sigurjón Tristan, 13 ára,
Elín Viktoría, 10 ára, Steinunn Birna, 1 árs
og Herdís Vala, 3 mánaða.
Hundurinn Vaskur og kötturinn Tommi.
Stærð jarðar: Um 350 hektarar,
þar af 40 hektarar í túni.
Gerð bús: Holdakúabú.
Fjöldi búfjár: 20 kýr auk uppeldis
og 30 naut í eldi. 3 reiðhross.
Hvernig gengur hefðbundinn vinnu-
dagur fyrir sig á bænum? Nautin hirt
kvölds og morgna. Önnur verk velta á
árstíð, útigangi gefið, vélum klappað eða
heyskap sinnt.
Skemmtilegustu/leiðinlegustu bústörfin?
Skemmtilegast þegar kálfarnir skoppa
um en leiðinlegast að gera við eða þegar
skepnur veikjast.
Hvernig sjáið þið búskapinn fyrir ykkur á
jörðinni eftir 5 ár? Kýrnar orðnar ríflega 30
talsins, nautin um 100 og að við þurfum ekki
að stunda svona mikla vinnu utan bús. Vonandi
verður búið að banna lausagöngu sauðfjár svo
við getum nýtt hagana eingöngu fyrir okkar
gripi og mögulega farið í smá skógrækt.
Hvar teljið þið að helstu tækifærin séu
í framleiðslu á íslenskum búvörum?
Heilnæmar og hreinar íslenskar afurðir eiga
alltaf upp á pallborðið. Við þurfum að sýna
neytendum betur að dýravelferðin sé okkur
bændum mikilvæg.
Hvað er alltaf til í ísskápnum? Mjólk, smjör,
ostur. Ef vel ætti að vera þyrfti bóndinn að
mjólka eins og eina kú til að standa undir
mjólkurþambinu.
Hver er vinsælasti maturinn á heimilinu?
Það fúlsar enginn við nautasteik þó Tristan
myndi kjósa hamborgara í öll mál.

Eftirminnilegasta atvikið við bústörfin?
Við höfum brallað ýmislegt misgáfulegt en
ætli það sé ekki þegar kýrin Góla bar sínum
fyrsta kálfi og var heldur illskeytt þegar við
komum að merkja hann (settum met í 100
metra hlaupi).
Uppáhaldstæki/vél eða áhald? Óli: Fífi!
(New Holland L85) Jóna: Finnst það gott frí
að fá að raka á Júdasi (New Holland TS100).
Hvað finnst fólki gaman að gera þegar
það er ekki í vinnunni? Frí? Hvað er það?
LÍF&LYST – BÆRINN OKKAR
Birnustaðir Skeiðum
MATARKRÓKURINN
Grillaðar lambaframhryggjarsneiðar
Hafliði & Halldór
haflidi@icelandiclamb.is
Grillaðar lambaframhryggjarsneiðar með grilluðu graskeri og sveppum, hnúðkálssalati og grænpiparmajonesi.
Rabarbara „Chimmichurri“.