Bændablaðið - 21.09.2023, Qupperneq 4

4 Bændablaðið | Fimmtudagur 21. september 2023
FRÉTTIR
FB Reykjavík
Korngarðar 12
570 9800
FB Selfoss
Austurvegur 64 a
570 9840
FB Hvolsvöllur
Duftþaksbraut 1
570 9850
www.fodur.is
fodur@fodur.is
* Tilboðið gildir september 2023 eða á meðan birgðir endast.
42.390 kr. m/vsk.51.070 kr. m/vsk. 56.950 kr. m/vsk.
TILBOÐ MÁNAÐARINS*
-20% + 2 POKAR AF STALDREN
FYLGJA FRÍTT MEÐ
SAGKÖGGLAR
(500 kg.)
BRETTI AF SAGI
(21 stk.)
BRETTI AF SPÆNI
(21 stk.)
Geitamjaltir:
Heilt sumar eyðilagt hjá
geitabóndanum Höllu
– Beiðni hennar um úttekt á mjólkurvinnslu sinni „féll milli skips og bryggju“
Í síðasta tölublaði Bændablaðsins
greindum við frá því að Halla
Sigríður Steinólfsdóttir, geitabóndi
í Ytri-Fagradal á Skarðsströnd,
hefði ekki fengið úttekt hjá
Matvælastofnun á aðstöðu sinni til
mjólkurvinnslu, þrátt fyrir að hafa
sent inn beiðni þess efnis í lok júní.
Skýringin sem starfsmaður
stofnunarinnar gefur á seinaganginum
er að erindi Höllu hafi „fallið milli
skips og bryggju“ hjá honum.
„Þetta er óvenjuleg umsókn og
hef ég þurft að bíða eftir umsögn
sérfræðinga. Engin slík umsókn
hefur verið afgreidd í mínu
umdæmi áður að mér vitandi.
Vegna sumarfría hefur málið svo
gleymst, sem er mjög bagalegt fyrir
Höllu,“ segir Daníel Haraldsson,
héraðsdýralæknir Matvælastofnunar,
í Norðvesturumdæmi í svari við
fyrirspurn.
Fékk úttekt daginn sem
hún hætti að mjólka
Halla fékk svo starfsmann í
úttekt hjá sér miðvikudaginn 13.
september, daginn sem hún hætti
að mjólka geiturnar, vegna þess að
kindurnar hennar þurfa nú sitt pláss
á ný í fjárhúsunum. Halla segir þetta
alvarlegt mál þar sem heilt sumar
hafi verið eyðilagt hjá henni hvað
varðar sölu á geitamjólkurafurðum
sínum og að öllum líkindum talsverð
verðmæti tapast. Hún segir að allt
stefni í að hún fái leyfi til sölu á
mjólkinni sinni athugasemdalaust.
Það sé hins vegar of seint.
Fullkomlega óásættanleg
málsmeðferð
„Skoðun okkar er að sjálfsögðu sú að
svona meðferð mála er fullkomlega
óásættanleg,“ segir Oddný Anna
Björnsdóttir, framkvæmdastjóri
Samtaka smáframleiðenda matvæla
og Beint frá býli.
„Ég grennslaðist fyrir um þetta
tiltekna mál og virðist meginorsökin
liggja í að sótt var um úttektina í
júní þegar starfsmenn voru að
detta í sumarfrí og hvorki sá sem
fékk umsóknina á sitt borð né sá
sem hann ætlaði að koma henni til
brugðust við þrátt fyrir að Halla hafi
ítrekað spurst fyrir um stöðuna og
henni lofað að brugðist yrði við.
Sumarfrístími er engin afsökun
ef opið er fyrir umsóknir og ekki
tekið fram þegar þær eru mótteknar
að þær verði ekki afgreiddar fyrr
en eftir tiltekna dagsetningu
þegar starfsmenn eru komnir
úr fríi. Vonandi sjá stjórnendur
stofnunarinnar til þess að svona
endurtaki sig ekki í framtíðinni.“
Seinagangur í
afgreiðslu umsókna
„Í gegnum tíðina höfum við heyrt af
alls konar málum sem eru jafnólík
og þau eru mörg og já, hluti þeirra
hefur tengst seinagangi í afgreiðslu
umsókna, að fólk bíði og bíði og
fái engin svör. Það sorglegasta er
hve margir, bæði þeir sem eru ekki
byrjaðir og þeir sem hafa áhuga á að
prófa eitthvað nýtt í sinni starfsemi,
hafa hætt við eða ekki lagt í að fara
út í frumkvöðlastarfsemi, því þeir
upplifa að það þýði að þeir þurfi
að fara í átök við kerfið. Samskipti
frumkvöðla og eftirlits eiga ekki að
þurfa að vera þannig og hef ég nú
sjálf persónulega reynslu af slíkum
slag eftir að við vorum kærð af
Lyfjastofnun fyrir að rækta hamp,
þrátt fyrir að þau vissu fullvel að
við vorum með skriflegt leyfi frá
Matvælastofnun. Þá urðum við
fórnarlamb í valdabaráttu tveggja
stofnana, þar sem hvorki var
gætt meðalhófs né viðhöfð góð
stjórnsýsla,“ segir Oddný.
Hún segir mikilvægt að báðir
aðilar, framleiðandi og eftirlitsaðili,
fari inn í ferlið með það markmið að
vera lausnamiðaðir. „Þetta á ekki að
vera slagur, þar sem annar vinnur
og hinn tapar; heldur einlægur
vilji beggja að gera vel og finna
leiðir til að láta verkefnið ganga
upp um leið og matvælaöryggi og
velferð dýra er tryggð. Ef það væri
alltaf gert, væru vandamálin ekki
svona mörg. Svo er rétt að nefna
að í fjölmörgum tilfellum gengur
ferlið, þessi samskipti, mjög vel og
eftirlitsaðilar bæði lausnamiðaðir
og afgreiða málin hratt og vel. Það
er jú þannig að við heyrum helst af
þeim málum þar sem illa gengur,
ekki þeim málum sem ganga hratt
og vel fyrir sig.“ /smh
Huðnur hafa verið mjólkaðar í sumar í Ytri-Fagradal en ekki hefur enn mátt selja mjólkina þaðan. Mynd / Aðsend
Halla Sigríður Steinólfsdóttir, geitabóndi í Ytri-Fagradal. Mynd / smh
Oddný Anna Björnsdóttir.
Land og Skógur:
Ágúst verður forstöðumaður
Ágúst Sigurðsson hefur verið
skipaður forstöðumaður Lands
og skógar, nýrrar stofnunar sem
verður til við sameiningu Land-
græðslunnar og Skógræktarinnar.
Í tilkynningu frá matvæla­
ráðuneytinu segir að Ágúst hafi
verið sveitarstjóri Rangárþings ytra
frá árinu 2014 til 2022 og rektor
við Landbúnaðarháskóla Íslands frá
2004 til 2014, þar sem hann stýrði m.a.
sameiningu Landbúnaðarháskólans
á Hvanneyri, Rannsóknastofnunar
landbúnaðarins og Garðyrkjuskóla
ríkisins. Þá starfaði Ágúst sem
lands ráðsnautur í búfjárerfðafræði
og hrossarækt hjá Bændasamtökum
Íslands frá árinu 1996 til 2004.
Ágúst hefur setið í stjórnum, ráðum,
nefndum og hópum tengdum meðal
annars landbúnaði, landgræðslu,
hrossarækt og háskólamálum. Hann
hefur ritað fjölda vísindagreina í
alþjóðlegum ritrýndum vísinda­ og
ráðstefnuritum ásamt greinum í
fagtímarit og blöð.
Land og skógur tekur formlega
til starfa 1. janúar 2024. /sá
Ágúst Sigurðsson. Mynd / Aðsend
Skeljungur kaupir Búvís
Samningar hafa tekist um kaup
Skeljungs á öllu hlutafé í Búvís.
Bæði fyrirtækin hafa verið öflug
í sölu tilbúins áburðar, rúlluplasti
og rekstrarvörum.
Búvís er í eigu bræðranna Einars
Guðmundssonar og Gunnars Guð­
mundarsonar. Þeir stofnuðu fyrirtækið
árið 2006 og hafa rekið síðan þá.
Einar, framkvæmdastjóri Búvís, segir
helstu ástæðuna fyrir sölunni vera þá
að bræðurnir séu komnir af léttasta
skeiði. Einar er 62 ára og er Gunnar
tveimur árum yngri. Jafnframt
finnst þeim Skeljungur hafa svipaða
framtíðarsýn og þeir varðandi Búvís.
Einar reiknar með að salan gangi
í gegn fljótlega, en hún sé háð
samþykki Samkeppniseftirlitsins.
Hann á ekki von á öðru en það
gangi í gegn þar sem samanlögð
markaðshlutdeild þessara fyrirtækja
sé ekki yfir mörkum.
Aðspurður telur Einar að Búvís
hafi verið með átján til tuttugu og
tveggja prósenta markaðshlutdeild
á tilbúnum áburði, sem sé svipuð
hlutdeild og Skeljungur hafi náð.
Búvís hefur flutt sinn áburð frá
Eistlandi á meðan áburðurinn hjá
Skeljungi kemur frá Bretlandseyjum.
Hann gerir ráð fyrir að Skeljungur
haldi áfram áburðarsölu undir
merkjum Búvís.
Búvís rekur verslun á Akureyri og
starfa sex starfsmenn hjá fyrirtækinu.
Auk rekstrarvara selur Búvís hey­
og jarðvinnutæki, áburðardreifara,
vagna og ýmislegt annað. Einar
telur Skeljung hafa alla burði til
að efla Búvís, en til standi að reka
fyrirtækið að mestu í óbreyttri
mynd. „Skeljungur er með öflugt og
sterkt fyrirtæki og ég held að þeir
hafi alla burði til að gera þetta vel í
framtíðinni,“ segir Einar. /ÁL
Rekstur Búvís verður áfram að mestu í óbreyttri mynd. Bræðurnir Einar (t.h.)
og Gunnar (t.v.) hafa rekið fyrirtækið frá stofnun 2006. Mynd / Aðsend