Goðasteinn - 01.09.1968, Side 17

Högni í farsælu hjónabandi í 45 ár og eignuðust 17 börn, 8 sonu,
sem allir urðu prestar og 9 dætur. Aðeins ein dóttir þeirra lézt
í æsku, en 16 börn þeirra náðu fullorðins aldri.
Svo herma gamlar sagnir, að sr. Högni hafi eitt sinn sótt
prestastefnu á alþingi ásamt sonum sínum átta, hempuklæddum.
Hefur þetta hlotið að vera sumarið 1760, því að yngsti sonur hans
vígðist í ágúst 1759, en hinn næstelzti dó í janúar 1761. Einnig
segir Finnur biskup Jónsson frá því, að á eftir sr. Högna og átta
prestvígðum sonum hans, öllum hempuklæddum, er gengu til
kirkju á Breiðabólsstað sumarið 1760, hafi komið móðirin með
jafnmargar dætur. Sr. Högni missti konu sfna 1762, og upp frá
því vann hann engin prestsverk, enda þá orðinn lesblindur. En
það sama ár lét hann endurbyggja kirkjuna á Breiðabólsstað frá
grunni og mun sú kirkja hafa staðið í 77 ár eða þar til sr. Tómas
Sæmundsson lét byggja nýja kirkju árið 1839. Um sr. Högna er
mikinn fróðleik að finna í ritgerð dr. Jóns biskups Helgasonar
um Högnaætt, sem prentuð er framan við ævisögu sr. Tómasar
Sæmundssonar eftir hann. Sr. Högni dó árið 1770, en sjö árum áð-
ur hafði hann afhent bæði stað og kirkju sr. Stefáni syni sínum,
sem hafði verið aðstoðarprestur hans allt frá 1748, er hann enn
var á Stafafelli.
Sr. Stefán hélt Breiðabólsstað með mikilli sæmd til 1792. Hann
fær mjög lofsamlegan vitnisburð í vísitasíuskýrslum Hannesar
biskups Finnssonar fyrir mannkosti og kennimannshæfileika, og
Páll amtsskrifari Pálsson segir hann hafa verið fyrirmynd að
öllum prestlegum dyggðum. Hann var og búmaður góður og
fékk tvívegis verðlaun frá landbúnaðarfélagi Dana. Eftir hann
kemur sr. Þórhalli Magnússon, og er hann sagður hafa fengið
Breiðabólsstað í verðlaunaskyni fyrir mikinn dugnað, er hann
hafði sýnt í því að flytja bæ og kirkju í Villingaholti undan
sandágangi. Hann var 1797 dæmdur frá embætti fvrir ótilhlýði-
legt hátterni, en dæmt prestakallið aftur árið eftir. Hann þótti
heldur lítill búhöldur, en fær góðan vitnisburð hjá Geir biskupi
Vídalín.
Þá kemur árið 1818 að Breiðabólsstað sr. Torfi Jónsson prests
í Hruna, Finnssonar biskups. Hann var prófastur í Rangárþingi
Goðasteinn
15