Ársrit Torfhildar - 01.11.1990, Qupperneq 61

Jón Kaldal
CHARLES BUKOWSKI
Stutt kynning á höfundi
Henry Charles Bukowski fæddist í Þýskalandi 16. ágúst 1920.
Móðir hans var þýsk en faðirinn bandarískur, íyrrverandi
hermaður sem hafði orðið strandaglópur í Evrópu eftir lok
heimsstyrjaldarinnar fyrri.
Á árunum 1922-1923, þegar gengishrun þýska marksins var í
algleymi, ákvað Bukowski fjölskyldan að flytjast búferlum til
heimalands föðurins. Það átti því ekki eftir að liggja fyrir hinum
unga Bukowski að verða vitni að uppgangi og falli þriðja ríkisins
heldur að alast upp í einu af úthverfum Los Angeles, borginni
sem hann hefur búið í svo til allar götur síðan og átti eftir að leika
stórt hlutverk í fjölda verka hans.
Ekki fer mörgum sögum af uppvexti Bukowski en þó má geta
þess að fjölskyldan var ekki vel efnum búin og má ætla að það
hafi verið ein ástæða þess að hann sveigði snemma af braut
akademískra fræða og skráði sig í háskóla lífsins.
Bukowski var 24 ára gamall þegar verk hans fóru fyrst að sjást
opinberlega. Um skeið birtust prósaverk hans í ýmsum
minniháttar neðanjarðartímaritum í Los Angeles en eftir ár á
þeim vettvangi hvarf hann af sjónarsviðinu. Sumir segja að hann
hafi hreinlega hætt að skrifa, að minnsta kosti sást ekki stafur á
prenti eftir hann í 10 ár.
59