Morgunblaðið - 15.02.2001, Blaðsíða 16

LANDIÐ
16 FIMMTUDAGUR 15. FEBRÚAR 2001 MORGUNBLAÐIÐ
Egilsstöðum - Ráðstefna um þróun
ferðaþjónustu á Austurlandi var
haldin á Egilsstöðum fyrir
skemmstu. Ráðstefnan, sem stóð
daglangt, fjallaði einkum um ferða-
þjónustu að vetrarlagi, markaðs-
setningu, samstarf og skipulags-
mál innan ferðaþjónustugeirans.
Nokkrir vinnuhópar störfuðu á
ráðstefnunni og leituðu leiða til að
skilgreina sölulegar hugmyndir í
ferðaþjónustu og markaðssetningu
þeirra.
Fram kom m.a. að leggja mætti
ríka áherslu á íslenska matar-
menningu, með því t.d. að nýta
sumarið til að kenna grasatínslu til
matreiðslu og lækninga. Haustin
ætti að tengja meðhöndlun á af-
urðum náttúrunnar, svo sem saft-,
sultu- og víngerð, og farið yrði í
sveppatínslu og veiði og elda-
mennsku á villibráð. Ferðir um
slóðir Hrafnkelssögu, ættfræðiat-
huganir tengdar Vestur-Íslending-
um og dagskrá tengd vetrarmyrkri
komu einnig til umræðu.
Veiðitengd ferða-
þjónusta veltir fimm
þúsund milljörðum árlega
Hópur um vetrarferðaþjónustu
benti á að markaðssetja ætti veið-
ar. Skúli Magnússon, sem m.a. er
þekktur fyrir brautryðjendastarf í
fasanaræktun, sagði í því samb-
andi að innan Evrópska efnahags-
svæðisins velti ferðaþjónusta
tengd veiði árlega um 5000 millj-
örðum íslenskra króna en Íslend-
ingar tækju engan skerf af kök-
unni. Hann sagði Íslendinga sitja
uppi með fremur óheppilega veiði-
löggjöf sem væri nokkurs konar
náttúruvísindarannsóknalöggjöf,
eins og hann komst að orði, og
kæmi hún í veg fyrir skynsam-
legan veiðikvóta. Skúli sagðist vel
geta ímyndað sér að eitt til tvö
hundruð Austfirðingar gætu haft
atvinnu af veiðitengdri ferðaþjón-
ustu á hverju hausti ef lög og
reglugerðir yrðu ekki sú fyrirstaða
sem nú er.
Auk fjölmargra hugmynda um
afþreyingu að vetrarlagi kom fram
hugmynd um heimsmeistarakeppni
í mannraunum. Menn myndu
borga fyrir að reyna með sér í því
að bjarga sér úr háska, svo sem að
sofa í draugahellum, klífa, síga og
svelta við einhverjar tilteknar að-
stæður. Þá taldi Arngrímur Her-
mannsson, framkvæmdastjóri
ferðaskrifstofunnar Addís, að ferð-
ir á hreindýrasleðum væru borð-
leggjandi markaðsvara en hann
flutti erindi um vetrarferðaþjón-
ustu.
Önnur erindi ráðstefnunnar
fjölluðu um aldamótabæinn Seyð-
isfjörð, lengingu ferðamannatíma-
bilsins á landsbyggðinni og mark-
aðssetningu landsvæða í
ferðaþjónustu.
Jón Björn Hákonarson, upplýs-
inga- og kynningarfulltrúi Fjarða-
byggðar, tók saman helstu niður-
stöður ráðstefnunnar og sagði
hana hafa verið afar gagnlega.
„Það er áríðandi að muna, að ekki
er tjaldað til einnar nætur, heldur
tekur í það minnsta frá þremur til
fimm árum að markaðssetja ferða-
þjónustu.“ Samstöðuleysi innan
greinarinnar var nokkuð til um-
ræðu. „Við verðum að líta á ferða-
þjónustu sem alvöru atvinnugrein.
Víða um land er litið á þetta sem
tómstundagaman sem menn grípa
í og eru ekki tilbúnir til að leggja
peninga í reksturinn því þeir gætu
tapast. Menn eru ekki heldur til-
búnir til að koma á fundi eða nám-
skeið til að mennta sig. Fólk í
ferðaþjónustu þarf að fara að líta á
sig sem atvinnurekendur í alvöru
atvinnugrein og vinna að uppbygg-
ingu til framtíðar. Lykilorðið hér
er samstarf og skilgreind sérstaða.
Austurland þarf að markaðssetja
sem eina heild og því þarf sam-
vinnu alls staðar að úr fjórðungn-
um.“
Haft var í flimtingum að úr því
að Arngrímur í Addís gæti selt
vonda veðrið á Íslandi til útlend-
inga gæti ferðaþjónustan eystra
sjálfsagt selt vonda þjónustu. Nú
þyrfti nauðsynlega að koma til
samstillts gæðaátaks í fjórðungn-
um.
Jóhanna Gísladóttir, fram-
kvæmdastjóri Markaðsstofu Aust-
urlands, sagði að búið væri að
setja saman vinnuhóp með fólki af
öllu Austurlandi og væri stefnt að
því að hann ynni áfram með hug-
myndir þingsins og frekari þróun
sameiginlegrar markaðssetningar.
14 þúsund manns vilja
koma í vikulangt
vetrarfrí til Austurlands
Ráðstefnunni lauk á því að Elías
Gíslason kynnti könnun sem
Ferðamálaráð gerði í desember sl.
um ferðavenjur Íslendinga. 1218
manna slembiúrtak var gert úr
þjóðskrá og af þeim svöruðu 830
manns 52 spurningum. Fram kom
að 81% ferðuðust innanlands árið
2000 og fóru að meðaltali 5 ferðir á
ári. Fyrsta ferðin spannaði að
meðaltali 5,3 daga og meðaleyðsla
á hverja fjölskyldu miðað við tvo
fullorðna með 2 börn var 35.900
krónur.
Þá kom í ljós að 70% Íslendinga
myndu nýta sér vikulangt vetrarfrí
og 33% þeirra til ferðalaga innan-
lands sem eru ca. 70 þúsund
manns. 15% þeirra, eða um 14 þús-
und manns, töluðu um Austurland
í því samhengi og taldi Elías að
Austfirðingum myndi muna tölu-
vert um það í ferðaþjónustu fjórð-
ungsins.
Leiða leitað til að skilgreina hugmyndir og markaðssetningu í ferðaþjónustu á Austurlandi
Séríslenskar
hefðir vænlegar í
markaðssetningu
Jón Björn Hákonarson, upplýsinga- og kynningarfulltrúi Fjarðabyggð-
ar, tók saman niðurstöður ráðstefnunnar.
Jóhanna Gísladóttir, fram-
kvæmdastjóri Markaðsstofu
Austurlands, og Hannibal Guð-
mundsson, hjá Ferðaskrifstofu
Austurlands, á ráðstefnunni.
Morgunblaðið/Steinunn Ásmundsdóttir
Frá ráðstefnu á Egilsstöðum um ferðaþjónustu á Austurlandi.
Húsavík - Olíufélagið Esso mun
verða einn af aðalstyrktaraðilum
meistaraflokks Völsungs í knatt-
spyrnu þetta árið. Samningur þar
um var undirritaður nýlega á Húsa-
vík. Samninginn undirrituðu þeir
Valgeir Guðmundsson formaður
knattspyrnudeildar Völsungs og Jó-
hann P. Jónsson deildarstjóri mark-
aðs og kynningardeildar Ol-
íufélagsins hf.
Valgeir og þeir Olíufélagsmenn
Jóhann P., Sigurður Bjarnason
svæðisstjóri á Norðurlandi og Garð-
ar Jónasson umboðsmaður á Húsa-
vík voru ánægðir með samninginn
og vonuðust til að báðir aðilar
hefðu sem mestan hag af honum.
Jónas Hallgrímsson mun þjálfa
lið Völsungs áfram, liðið er núna í
fjórðu deild. Valgeir segir að
stefnan væri sjálfsögðu að fara
upp, en sú stefna yrði að vera
raunhæf og hvort það tækist á
þessu ári eða síðar kæmi í ljós. Lið-
ið verður að mestu byggt á ungum
heimamönnum en styrkt með 2–3
Júgóslövum. Yngri flokkar félags-
ins hafa verið mjög góðir und-
anfarin ár og verður spennandi að
sjá hverju það skilar á komandi ár-
um.
Esso styður húsvíska
knattspyrnumenn
Morgunblaðið/Hafþór Hreiðarsson
Frá undirskrift samningsins f.v. Garðar Jónasson, Valgeir Guðmunds-
son, Jóhann P. Jónsson og Sigurður Bjarnason.
FRAMHALDSSKÓLINN í Vest-
mannaeyjum, Nýherji og Tölvun
skrifuðu í nóvember sl. undir víð-
tækan samstarfssamning um net-
væðingu og uppbyggingu tölvu-
kerfis skólans. Frá þeim tíma
hefur verið unnið að uppsetningu
örbylgjunets í húsnæði Fram-
haldsskólans í Vestmannaeyjum og
jafnframt hafa flestir kennarar
skólans og hluti nemendahópsins
eignast eða leigt fartölvur sem
tengst geta þessu öfluga neti.
Tölvustofa og allar vinnustöðvar
skólans eru einnig tengd Netinu.
Örbylgjunetið gefur nemendum
og kennurum sem eru með fartölv-
ur og þráðlaust netkort möguleika
á að tengjast Netinu með allt að
11Mbps samskiptahraða sem er
sambærilegur hraði og er á hefð-
bundnu staðarneti fyrirtækja og
stofnana. Kerfið tryggir jafnframt
að fartölvur nemenda eru stöðugt í
sambandi við Netið þó svo þeir
færi sig milli skólastofa. Nemend-
ur og kennarar sem staðsettir eru
á framhaldsskólasvæðinu geta
tengst hinu þráðlausa neti frá
heimilum sínum.
Hluti af Eyjanetinu
Út á við tengist skólinn síðan ör-
bylgjuneti því sem fyrirtækið
Tölvun hefur verið að koma upp í
Eyjum en það er hluti af Eyjanet-
inu. Framhaldsskólinn tengist
Netinu með 2Mbps tengingu í
gegnum Eyjanetið en það gefur
einnig möguleika á hraðvirkum
tölvusamskiptum milli allra skóla-
stofnana í Vestmannaeyjum.
Formleg afhending og opnun á
netbúnaðinum var 8. febrúar sl.
Net- og fartölvuvæðing skólans er
unnin í samvinnu við Nýherja hf.
og Tölvun. Nýherji gaf alla örbylg-
jusendana og býður hagstæða
samninga um tölvukaup í gegnum
IBM-leasing og hefur Íslands-
banki-FBA séð um að innheimta
leigugjöld af nemendum fyrir
Framhaldsskólann, segir í frétta-
tilkynningu. Tölvun hefur séð um
uppsetningu örbylgjukerfisins auk
uppbyggingar á tölvukerfi skólans.
Morgunblaðið/Sigurgeir Jónasson
Nýja kerfið tryggir að fartölvur nemenda séu stöðugt í sambandi við
Netið þó svo að þeir færi sig milli skólastofa.
Þráðlaust netkerfi
í framhaldsskólann