Morgunblaðið - 06.11.2004, Page 53

Einar Örn og Benedikt í fræðslusetri Smekkleysu þar sem hátt er til lofts og vítt til veggja.
FYRIR tveimur vikum var opnuð ný-
stárleg plötubúð á vegum Smekk-
leysu í kjallara í Kjörgarði við Lauga-
veg. Húsnæðið er þó allt annað en
þröng kjallarahola því hátt er til lofts
og vítt til veggja. Búðin er í einu
horni húsnæðisins og sýningin Hum-
ar og frægð tekur upp stóran hluta
plássins en í henni er saga Smekk-
leysu rakin. Líka er rými þar sem
hljómsveitir fá tækifæri til að troða
upp og í dag eru það Ske og Jan
Mayen sem stíga á stokk klukkan
þrjú.
„Smekkleysa hefur aldrei verið
sýnileg. Þetta er í fyrsta skipti sem
þú getur komið og séð Smekkleysu,
séð hvað er í gangi hjá okkur,“ segir
Einar Örn Benediktsson, sem verður
fyrir svörum.
„Það sem okkur langaði til að gera
var að setja upp fræðslusetur. Sýn-
ingin er fræðsla um dægurmenningu,
sem tengist Smekkleysu á einhvern
hátt. Það er ákveðin eftirspurn eftir
því að fá upplýsingar og fræðslu um
þetta tímabil,“ segir hann og er þá að
tala um síðustu tuttugu ár eða svo.
„Í húsnæðinu er sýningaraðstaða,
stefnt er á að halda tónleika á föstu-
dögum og laugadögum og síðan geta
skólar bókað sýningartíma en farið
er í gegnum sýninguna með nem-
endum. Bæði Íslendingar og ferða-
menn hafa leitað eftir þessum upp-
lýsingum. Með því að hafa þetta
heilsárssýningu fáum við ferðamenn
meira inn á sumrin og síðan eru það
skólarnir á veturna,“ segir hann.
„Þetta er í grunninn sama sýning
og var í Hafnarhúsinu en við erum að
bæta við nýjum sýningarhlutum. Til
dæmis er strax kominn hingað bún-
ingur úr „Who is it“, nýju myndbandi
með Björk. Við ætlum að bæta stöð-
ugt við og breyta. Þetta á að vera lif-
andi sýning og hreyfanleg,“ segir
hann.
„Við erum ekki búin að skipuleggja
allt húsnæðið. Búðin er bara í einum
tíunda hluta húsnæðisins. Við höfum
alla tíð haldið úti stöðugri vefverslun
en núna erum við búin að opna vef-
verslunina í búðinni. Við erum ennþá
að vinna í þessu,“ segir Einar Örn.
„Við erum að fara að vinna í því að
hérna niðri verði líka aðstaða til að
taka upp atburði sem eru að gerast
hérna inni og senda þá út á Netinu.
Hugsanlega verður hluti af skrifstof-
unni hérna,“ segir hann.
Í búðinni liggur fyrir öll Smekk-
leysuútgáfan, bæði gömul og ný. Líka
stendur Smekkleysa fyrir innflutn-
ingi á plötum frá útgáfum á borð við
XL Recordings, Warp, 4AD, Sub
Pop, Touch and Go, Rough Trade,
One Little Indian og fleirum og er því
fjölbreytt úrval í búðinni.
Elís Pétursson úr Ghostigital vinn-
ur í búðinni, ásamt Benedikt Reyn-
issyni auk þess sem Einar Örn er
með annan fótinn þarna. Benedikt,
sem oft er kenndur við Karate, út-
varpsþáttinn, sem hann stjórnar á X-
inu, segir að viðbrögðin við búðinni
hafi verið mjög góð. „Það hafa allir
verið mjög ánægðir. Fólk er hissa að
sjá þetta, búðin er svolítið falin og
kemur fólki á óvart.“
Morgunblaðið/RAX
Sýninguna Humar og frægð er að
finna í búðinni og sífellt bætist eitt-
hvað nýtt við hana.
Smekkleysa | Útgáfan opnar plötubúð og sýningarsal við Laugaveg
Nýtt andlit Smekkleysu
Plötubúð Smekkleysu er í Kjörgarði
við Laugaveg 59. Opið mán. til fim.
12–18, fös. 12–19 og lau. 12–18.
Hljómsveitirnar Ske og Jan Mayen
spila í búðinni í dag kl. 15.
ingarun@mbl.is
MORGUNBLAÐIÐ LAUGARDAGUR 6. NÓVEMBER 2004 53