Fréttablaðið - 21.06.2003, Qupperneq 14

14 21. júní 2003 LAUGARDAGUR
Omar Kitmitto, sendifulltrúi Palestínumanna, er enn vongóður um að hægt verði
að koma á friði fyrir botni Miðjarðarhafs með aðstoð vegvísisins. Hann segir að
Ísraelar og Palestínumenn verði að fylgja friðaráætluninni úr hlaði í sameiningu.
Við berum
sameiginlega
ábyrgð á friði
Þrátt fyrir átök síðustu daga áVesturbakkanum og Gaza-
ströndinni er vegvísirinn til friðar
ennþá raunhæf lausn á deilum
Palestínumanna og Ísraela, að
mati Omar Kitmitto, formanns
sendinefndar Palestínu í Noregi
og á Íslandi. „Það ber að hafa í
huga að vegvísirinn er verkfæri
en ekki samningur. Það er ekki
hægt að ætlast til þess að annar
aðilinn hafi frumkvæðið að því að
hrinda honum í framkvæmd.“
Kitmitto ítrekar að Ísraelar og
Palestínumenn verði að vera sam-
taka í því að leggja niður vopn.
„Við erum á sama báti og berum
sameiginlega ábyrgð á því að
koma á friði á svæðinu.“
Sendifulltrúinn hefur efasemd-
ir um raunverulegan vilja Ariel
Sharon, forsætisráðherra Ísraels,
til að taka þátt í framkvæmd veg-
vísisins. „Þegar friðaráætlunin
var á afar viðkvæmu stigi gerðu
Ísraelar tilraun til þess að ráða af
dögum leiðtoga Hamas-samtak-
anna. Eins og við mátti búast kall-
aði þetta á hefnd samtakanna.“
Palestínumenn hafa fallist á
vegvísinn en Ísraelar hafa ýmis-
legt við hann að athuga. „Banda-
rísk stjórnvöld lýstu því yfir að
engar breytingar kæmu til greina
og við samþykktum áætlunina á
þeim forsendum,“ segir Kitmitto.
Ríkisstjórn Sharon hefur einnig
lagst hart gegn ályktun Samein-
uðu þjóðanna sem kveður á um
það að palestínskir flóttamenn
eigi að fá að snúa aftur til Ísraels.
Um er að ræða hátt í fjórar millj-
ónir manna sem búsettar eru víðs
vegar í heiminum. „Ég get ekki
svarað því hvers vegna Ariel
Sharon leggst svo hart gegn því að
flóttamennirnir fái að snúa til
baka. Ég hef heldur enga trú á því
að allt þetta fólk kæri sig um að
snúa aftur.“
Ríkisstjórn George W. Bush
Bandaríkjaforseta hefur gegnt
lykilhlutverki í friðarumleitunum
fyrir botni Miðjarðarhafs og það
er hún sem stendur á bak við veg-
vísinn. Kitmitto viðurkennir að
bandarísk stjórnvöld séu ekki að
öllu leyti hlutlaus milligönguaðili
en telur þó að þátttaka þeirra hafi
mikið að segja. „Ég hef fulla trú á
því að Bush sé alvara með yfir-
lýsingum sínum. Hann verður þó
að vera tilbúinn að beita ísraelsk
stjórnvöld þrýstingi ekki síður en
okkur Palestínumenn.“ Kitmitto
segist jafnframt fagna því ef
Bandaríkin ákveði að senda frið-
argæslulið til Ísrael.
Omar Kitmitto ber traust til
Mahmoud Abbas forsætisráð-
herra. „Abbas er afbragðsstjórn-
málamaður og hann nýtur stuðn-
ings þingsins, sem kosið er af
palestínsku þjóðinni. En það er
mjög erfitt fyrir hann að reyna
að semja við Hamas-samtökin á
meðan Ísraelar halda áfram að
ráðast gegn liðsmönnum samtak-
anna og jafna hús þeirra við
jörðu. Það er ekki hægt að ganga
til samninga við slíkar aðstæður.“
Aðspurður segir Kitmitto að
Hamas-samtökin njóti mikils
stuðnings meðal palestínsku þjóð-
arinnar. „Ítrekaðar árásir ísraelska
hersins gegn Palestínumönnum
hafa aukið stuðning almennings við
Hamas-samtökin. Fólkið sjálft hef-
ur orðið vitni að ofbeldinu og legg-
ur traust sitt á þá sem leita
hefnda.“
Mahmoud Abbas forsætisráð-
herra hefur boðið Hamas-samtök-
unum aðild að ríkisstjórn Palestínu
en ekki hefur náðst samkomulag
þar um. „Við viljum auðvitað að all-
ir flokkar fái tækifæri til þess að
taka þátt í stjórn landsins. Ef
Hamas-samtökin afþakka þátttöku
munum við líta á þau sem pólitísk-
an andstæðing. Við sættum okkur
aftur á móti ekki við það ef aðrar
þjóðir ætla að segja okkur hverjir
eiga að stjórna landinu. Það er okk-
ar að ákveða,“ segir Kitmitto.
brynhildur@frettabladid.is
PALESTÍNUMENN MÓTMÆLA
Ísraelsk stúlka með hlekkjaðar hendur tekur þátt í mótmælagöngu í bænum Nablus á
Vesturbakkanum til stuðnings palestínskum föngum í ísraelskum fangelsum.
OMAR KITMITTO
Formaður aðalsendinefndar Palestínu-
manna í Noregi og á Íslandi var staddur
hér á landi í tilefni af þjóðhátíðardeginum
17. júní. Kitmitto er búsettur í Noregi og er
giftur norskri konu. Sonur þeirra hjóna á
íslenska eiginkonu og eiga þau saman
tveggja ára gamalt barn.
HEFT FERÐAFRELSI
Ísraelskur hermaður hindrar för palestínskra kvenna og barna út úr borginni Hebron á
Vesturbakkanum.