Fréttablaðið - 05.09.2003, Blaðsíða 17

18 5. september 2003 FÖSTUDAGUR
■ Björgunaraðgerðir
Á TOPPNUM
Keegan Reilly, 22 ára bandarískur fjall-
göngumaður sem lamaðist í bílslysi fyrir
sjö árum, náði tindi Fuji, hæsta fjalls Jap-
ans, í gær. Reilly er fyrsti fatlaði maðurin
sem klífur tindinn. Það tók hann fjóra
daga að vega sig upp með aðstoð sér-
smíðaðs þríhjóls. Vegalengdin er 3.776
metrar og gengur fullfrískt fólk á tindinn á
6 til 7 klukkustundum.
Missti auga en slapp á ótrúlegan hátt án heilaskaða:
Fékk bor gegnum höfuðið
BANDARÍKIN, AP Það gengur
kraftaverki næst að Ron Hunt,
fertugur rafvirki í Reno í
Nevada, skuli vera á lífi. Hunt
féll rúma tvo metra úr stiga þar
sem hann var við vinnu sína.
Hann var að bora með 40 milli-
metra sverum og tæplega hálfs
metra löngum bor þegar stigi
sem hann stóð í fór að riða. Ron
féll úr stiganum en sleppti ekki
taki á bornum. Borinn stakkst í
auga hans og fór alla leið gegn-
um höfuðkúpuna og út um
hnakkann.
„Ég er afar lánsamur. Ég er
hvorki lamaður né dauður,“
sagði Ron Hunt.
Auga Hunts varð ekki bjarg-
að en þótt ótrúlegt megi virðast
smaug borinn framhjá heila
hans og olli engum skemmdum.
Læknar tóku því þá ákvörðun að
snúa borinn hægt úr höfuðkúpu
rafvirkjans og gera að sárum
hans.
Hunt er nú kominn heim af
sjúkrahúsi og fær innan tíðar
glerauga í stað þess sem hann
missti. ■
Stal helmingnum af
tekjum sambandsins
Annar framkvæmdastjóri Fjórðungssambands Vestfjarða í röð hefur
orðið uppvís að fjárdrætti. Hann millifærði hátt í sjö milljónir af reikn-
ingi sambandsins yfir á sinn eigin reikning í heimabanka á Netinu.
LÖGREGLUMÁL Framkvæmdastjóri
Fjórðungssamband Vestfjarða
hefur verið látinn víkja í kjölfar
þess að endurskoðandi sambands-
ins komst að því að hann hafði
dregið sér sjö milljónir króna. Það
jafngildir tæpum helmingi árs-
tekna sambandsins.
Framkvæmdastjórinn, Ingi-
mar Halldórsson, dró sér fé í tug-
um millifærslna á heimabanka á
Netinu frá síðasta ári fram á þetta
ár. Upp komst um fjárdráttinn á
mánudaginn þegar endurskoðandi
sambandsins vann að ársreikningi
fyrir fjórðungsþing sem haldið
verður á morgun í Reykjanesi í
Ísafjarðardjúpi. Ingimar hefur
þegar borgað til baka stærstan
hluta fjárins. Um síðustu áramót
borgaði Ingimar til baka fjárdrátt
ársins 2002, og á mánudaginn
borgaði hann þrjár milljónir til
baka af þeim 4,6 milljónum sem
hann hafði tekið í ár.
Guðni G. Jóhannesson, stjórn-
arformaður Fjórðungssambands-
ins, segir fólk slegið vegna máls-
ins.
„Svona hlutir hvörfluðu ekki
af manni gagnvart svona manni.
Að þetta skuli gerast trekk í
trekk er nánast eins og í bíó.
Menn eru í losti hér fyrir vestan
út af þessu máli. Þetta er fé
skattborgarana sem verið er að
sýsla með.“
Ingimar skilaði lyklum að húsi
fjórðungssambandsins í gær.
Hann baðst afsökunar á fram-
ferði sínu og skrifaði undir loforð
um endurgreiðslu á þeim 1.600
þúsundum sem eftir stóðu.
Ákveðið hefur verið að kæra
framkvæmdastjórann.
Forveri Ingimars í starfi
framkvæmdastjóra varð einnig
uppvís að fjárdrætti árið 2001.
Ákveðið var að kæra ekki það
mál, heldur semja við hann um
endurgreiðslu hluta fjárins.
Sambandið tapaði tveimur
milljónum á málinu.
Á fjórðungsþingi um helgina
verða greidd atkvæði um hvort
samvinna milli Fjórðungssam-
bandsins og Atvinnuþróunarfé-
lags Vestfjarða verður aukin.
Verði fyrirliggjandi samningar
þess efnis samþykktir á þinginu
mun atvinnuþróunarfélagið sjá
um rekstur sambandsins og ger-
ist þá ekki þörf á því að ráða nýj-
an framkvæmdastjóra.
jtr@frettabladid.is
Drekkti syni sínum:
Lífstíð óháð
geðklofa
NEW YORK, AP Christine Wilhelm, 39
ára New York-búi var í gær dæmd í
50 ára til lífstíðarfangelsi fyrir
morð og morðtilraun. Wilhelm
drekkti í fyrra fjögurra ára syni
sínum í baðkeri á heimili þeirra og
gerði að auki tilraun til að drekkja
öðrum syni sínum, þá 5 ára göml-
um. Wilhelm var greind með of-
sóknarbrjálæði og geðklofa en
dómari sagðist ekki sjá ástæðu til
að sýna henni neina miskunn í mál-
inu.
„Hún á skilið sömu miskunn og
hún sýndi sonum sínum tveimur,“
sagði Patrick McGrath dómari þeg-
ar hann kvað upp dóminn. ■
KÝR Á BEIT
Umframframleiðsla mjólkur var milljón lítr-
um minni síðasta árið en árið áður. Um-
framframleiðsla er þó undantekning síð-
ustu tíu árin.
Mjólkurframleiðsla:
Milljónir
lítra út
LANDBÚNAÐUR Afurðastöðvar þurfa
að flytja út rúmar fjórar milljónir
lítra af mjólkurafurðum á næst-
unni. Um er að ræða mjólkur-
framleiðslu umfram þær 106
milljónir lítra sem mjólkurbænd-
ur höfðu kvóta fyrir á síðasta
kvótaári og lögum samkvæmt ber
að flytja þá framleiðslu úr landi
sé ekki hægt að nota hana hér.
Pálmi Vilhjálmsson, fram-
kvæmdastjóri Samtaka afurða-
stöðva í mjólkuriðnaði, segir ein-
hverjar tekjur upp úr þessu að
hafa en ekki þannig að menn geri
út á þessa umframframleiðslu.
„Þetta er fyrst og fremst mjólkur-
duft sem er flutt út, en líka eitt-
hvað af smjöri,“ segir Pálmi.
Bændur fá engar beingreiðslur
með umframframleiðslu. ■
SMAUG FRAMHJÁ HEILANUM
Röntgenmynd af höfði rafvirkjans Rons
Hunts segir allt sem segja þarf. Læknar
tóku þá ákvörðun að skrúfa borinn rólega
úr höfði Hunts. Auga hans varð ekki bjarg-
að en hann slapp að öðru leyti við varan-
legan skaða.
HEIMKOMAN
Björgunarþyrlurnar komnar til landsins á
ný eftir verkefni í Sierra Leone og Líberíu.
Þreyttir en glaðir:
Heim frá
Afríku
BJÖRGUNARSTÖRF Þrjár björgunar-
þyrlur varnarliðsins og hluti
þeirra 65 liðsmanna björgunar-
sveitarinnar sem sendir voru í
verkefni í Sierra Leone og Líberíu
sneru aftur til Keflavíkurflugvall-
ar síðastliðinn mánudag.
Þar veitti björgunarsveitin
liðsmönnum Bandaríkjahers að-
stoð og sá um sjúkraflutninga á
meðan á dvölinni þar stóð.
Varnarliðsmennirnir sögðust
fegnir að koma heim eftir 50 daga
törn og lýsti yfirmaður deildar-
innar, David Duke undirofursti,
yfir gleði að sjá alla heilu og
höldnu. ■
Gripaflutningabíll:
Furðuleg
afgreiðsla
SÓTTVARNIR „Það er sjálfsagt að
refsa mönnum, sekta þá eða veita
áminningu en ekki að stunda aðra
eins vitleysu eins og að senda bíl-
inn úr landi og dýralækni á eftir
honum. Hvers vegna í ósköpunum
geta þeir ekki sótthreinsað bílinn
hér?“ spyr Sigurjón Þórðarson,
þingmaður Frjálslynda flokksins,
og furðar sig á þeirri ákvörðun
landbúnaðarráðherra að láta flytja
gripaflutningabílinn úr landi.
Sigurjón segir óskiljanlegt að
ráðuneytið hyggist standa svona
að málum og segir dýralæknis-
embættið fara offari. Annað
dæmi um það sé þegar köttur er-
lendra ferðamanna var aflífaður í
sumar eftir að komið var með
hann hingað til lands. ■
GUÐRÚN VERÐI TÆMD
Norsku strandgæslunni hefur
verið fyrirskipað að tæma alla
olíu úr flaki Guðrúnar Gísladótt-
ur þar sem skipið liggur á hafs-
botni. Yfirvöld í Noregi eru sögð
hafa gefist upp á tilraunum eig-
enda skipsins til að lyfta því og
ætla að greiða fyrir olíutæming-
una.
ÍSAFJÖRÐUR
Almenningur fyrir vestan er sleginn í kjölfar fregna um að framkvæmdastjóri Fjórðungs-
sambands Vestfjarða hafi dregið sér tæpan helming af tekjum sambandsins.
FR
ÉT
TA
B
LA
Ð
IÐ
/R
Ó
B
ER
T
NIIGATA, AP „Farið heim, farið
heim,“ kyrjuðu hundruð Japana
þegar farþegaferja frá Norður-
Kóreu lagðist að bryggju í Niigata
í norðurhluta Japans í gær. Sam-
skipti þjóðanna hafa verið stirð í
langan tíma vegna kjarnorkuáætl-
unar Norður-Kóreumanna og
mannrána þeirra, en Norður-
Kóreumenn hafa viðurkennt að
hafa rænt hundruðum eða þús-
undum Japana á áttunda og ní-
unda áratug síðustu aldar. Talið er
að 100 Japanar séu enn í haldi í
Norður-Kóreu, meirihlutinn börn.
Mótmælendur í Niigata báru
skilti með myndum af Kim Jong-
il, leiðtoga Norður-Kóreu, og Kim
Il-sung, föður hans, en búið var að
krota yfir andlit þeirra. Að
minnsta kosti tíu varðbátar voru
sendir til móts við ferjuna og
1.200 lögregluþjónar stóðu vörð á
bryggjunni en óttast var að skær-
ist í odda.
Mangyongbong-92 farþega-
ferjan er eina farþegaferjan sem
gengur milli landanna og hefur
gert það í 40 ár. Hún flytur meðal
annars vistir til Norður-
Kóreumanna og er því líflína
þeirra. Japanar halda því fram að
með samgöngunum sé lífi haldið í
kommúnistastjórn sem fyrir
löngu hefði átt að steypa. ■
Japanar mótmæla ferjusiglingum frá Norður-Kóreu:
Vilja banna siglingarnar
HEIM MEÐ YKKUR
Hundruð Japana mótmæltu þegar farþegaferja frá Norður-Kóreu lagðist að bryggju í Nii-
gata í Japan í gær. Margir báru skilti með yfirstrikuðum myndum af Kim Jong-il, leiðtoga
Norður-Kóreu, og föður hans og fyrrum leiðtoga, kim Il-sung.
Sérsveit lögreglunnar:
Tekinn með
leikfanga-
byssu
HANDTAKA Sérsveit lögreglunnar
var kölluð til á mánudagskvöld
vegna manns sem veifaði byssu.
Miklubraut var lokað frá Löngu-
hlíð að Snorrabraut. Lögreglu-
mönnunum tókst að yfirbuga
manninn. Vopnið reyndist vera
leikfangabyssa. ■
Ólafsfjarðarvegur:
Árekstur
á einbreiðri
brú
ÁREKSTUR Harður árekstur varð
við Hörgárbrú á Ólafsfjarðarvegi
í gærmorgun. Tveir bílar komu úr
gagnstæðri átt að einbreiðri brú
og stöðvuðu báðir áður en þeir
fóru yfir. Þriðja bílinn bar að og
var honum ekið aftan á annan
hinna kyrrstæðu. Fimm manns
leituðu læknis. Enginn reyndist
alvarlega slasaður. Bílarnir voru
mikið skemmdir og voru fjar-
lægðir með kranabíl. ■