Fréttablaðið - 21.05.2004, Side 12

12 21. maí 2004 FÖSTUDAGUR
Sigurjón Þórðarson:
Skilur ekki svar ráðherra
FYRIRSPURN „Ég vona að fjármála-
ráðherra sjái sóma sinn í því að
koma með nýtt svar sem er skilj-
anlegt og einfalt. Reyndar á ég
ekki von á öðru,“ segir Sigurjón
Þórðarson, þingmaður Frjáls-
lynda flokksins, um svar fjár-
málaráðherra við fyrirspurnum
Sigurjóns um Landssímann.
Sigurjón spurði fjármálaráð-
herra meðal annars hvort Lands-
sími Íslands hefði tryggt fjár-
hagslegan aðskilnað á virðisauk-
andi þjónustu eins og internet-
þjónustu, GSM- og NMT-far-
símaþjónustu. Í svari ráðherra
er meðal annars vísað í reglu-
gerð, um bókhaldslega og fjár-
hagslega aðgreiningu í rekstri
fjarskiptafyrirtækja, þar sem
segir að fyrirtæki með umtals-
verða markaðshlutdeild á
ákveðnu sviði almennrar fjar-
skiptaþjónustu eða almennra
fjarskiptaneta skuli aðgreina
kostnað í bókhaldi. Þá kemur
líka fram að Póst- og fjarskipta-
stofnun hafi ekki farið fram á
fjárhagslegan aðskilnað í um-
ræddri starfsemi við Lands-
símann. Sigurjón segir beiðni
um aðskilnað ekki eiga að þurfa
að koma frá Póst- og fjarskipta-
stofnun. Samkeppnisstofnun
hafi gefið fyrirmæli um að svo
skyldi vera og spurt hafi verið
hvort farið væri eftir þeim fyrir-
mælum. ■
300.000 koma til
Þingvella árlega
Fjöldi ferðalanga sem heimsækja Þingvelli eykst ár frá ári. Talið er að um 300.000 gestir sæki þjóð-
garðinn heim árlega, að sögn þjóðgarðsvarðar. Gamli þingstaðurinn hefur mesta aðdráttaraflið.
ÞINGVELLIR Um 300.000 gestir
heimsækja árlega þjóðgarðinn að
Þingvöllum, að sögn Sigurðar K.
Oddssonar þjóðgarðsvarðar.
Sigurður segir Íslendinga álíka
marga og erlenda gesti, en rann-
sóknir hafi sýnt fram á að um
67% útlendinga sem komi í Flug-
stöð Leifs Eiríkssonar sæki Þing-
velli heim.
„Þingstaðurinn gamli hefur
mesta aðdráttaraflið,“ segir Sig-
urður og bætir við að þá sé líka
mikil umferð um Almannagjá.
„Það er líka upplifunin að koma til
Þingvalla og horfa þar yfir Flosa-
gjá, kirkjuna og bæinn.“
Fjöldi ferðamanna á Þingvöll-
um eykst ár frá ári. „Ferðamanna-
straumurinn yfir vetrartímann er
alltaf að aukast,“ segir Sigurður.
„Svo er líka einhver aukning á
sumrin ár frá ári.“ Sigurður segir
straum útlendinga um Þingvelli
ekki síst vera að aukast.
Sigurður hefur þó ekki veru-
legar áhyggjur af ágangi ferða-
manna. „Við getum alveg tekið við
þessum fjölda,“ segir hann. „Við
höfum verið að lagfæra göngu-
stíga og bæta aðgengi fatlaðra.“
Hafist verður handa í haust við að
endurgera veginn niður Almanna-
gjá, sem er orðinn lúinn. „Við
erum að búa okkur undir að taka á
móti fleira fólki og höfum ekki
áhyggjur af því í bili.“
Þóra Einarsdóttir, verslunar-
stjóri þjónustumiðstöðvarinnar á
Þingvöllum, segir sumarumferð-
ina fara rólega af stað í ár. „Það er
búið að vera frekar lítið, en það er
nú að aukast,“ segir Þóra. „Nú fer
allt að fara á fullt.“
Aðspurð segir Þóra umferðina
hafa verið í rólegri kantinum í
vor. „Umferðin fer nú að aukast
smám saman úr þessu. Toppurinn
er í júlí og verslunarmannahelgin
en svo fer umferðin aftur niður.“
helgat@frettabladid.is
Fíll ergir dreng:
Traðkaði
á hjóli
SVÍÞJÓÐ, AP Tíu ára drengur í
bænum Finspaang í Svíþjóð sá á
bak hjóli sínu þegar fíll traðkaði
á því. Drengurinn hafði lagt
hjóli sínu við fílabúrið þegar
hann fór að fylgjast með fjöl-
leikahúsi sem var komið í bæ-
inn. Einn fíllinn tók hjólið þá
upp með rananum, virti það vel
fyrir sér og traðkaði svo á því.
Stjórnendur fjölleikahússins
sögðust enga ábyrgð geta tekið á
atvikinu. Pabbi piltsins kærði
málið þá til lögreglu, sem velkt-
ist í vafa um hvernig ætti að
taka á því. Lögreglan ætlar að
athuga hvort fjölleikahússmenn
hafi ekki haft nægar gætur á fíl
sínum. ■
SANCHEZ OG ABIZAID
Báru vitni fyrir þingnefnd sem rannsakar
misþyrmingar á föngum í Írak.
Yfirmenn í Írak:
Gáfum ekki
skipanir
WASHINGTON, AP Æðstu yfirmenn
Bandaríkjahers í Írak, hershöfðin-
gjarnir Ricardo Sanchez og John
Abizaid, sögðu þingnefnd sem
rannsakar misþyrmingar á
íröskum föngum að þeir bæru
ábyrgð á því að hermenn hafi mis-
þyrmt íröskum föngum en
þvertóku fyrir að hafa fyrirskipað
eða heimilað slíkar misþyrmingar.
Sanchez sagði að rannsókn á
misþyrmingunum myndi beinast
að allri tignarröðinni innan hers-
ins. „Þeirra á meðal mér.“
Abizaid sagði að lítið hefði ver-
ið um misþyrmingar á föngum í
Afganistan og á Guantanamo. ■
Rauf skilorð með
brotum sínum:
Síbrotamað-
ur í fangelsi
DÓMSMÁL Hæstiréttur staðfesti
átta mánaða fangelsisdóm Hér-
aðsdóms Reykjavíkur yfir sí-
brotamanni. Maðurinn var sak-
felldur fyrir fjögur þjófnaðarbrot
og tilraun til þjófnaðar.
Maðurinn hefur áður hlotið
fimmtán refsidóma. Hann rauf
skilorð með brotum sínum. ■
SIGURJÓN ÞÓRÐARSON
Sigurjón vill meðal annars vita hvort
Landssíminn hafi farið að fyrirmælum
Samkeppnisstofnunar um fjárhagslega
aðgreiningu innan fyrirtækisins
Brjóstakrabbamein:
Líkamsfita
eykur líkur
HEILBRIGÐISMÁL Stórum konum er
hættara við að fá brjóstakrabba-
mein og greinileg tenging hefur
fundist milli líkamsfitu og
brjóstakrabbameins í rannsókn
sem þýskir vísindamenn gerðu.
Því meiri sem fitan er því líklegri
eru konur til að fá krabbamein í
brjóst síðar á ævinni. Yfir 180
þúsund konur víðs vegar frá Evr-
ópu tóku þátt í rannsókninni og
þykir hún vel marktæk.
Vísindamenn segja að þetta
staðfesti að konur í yfirvigt geti
nú sjálfar haft áhrif á líkindi þess
að fá brjóstakrabbamein með því
að huga að mataræðinu. ■
ÞINGVELLIR
Um 300.000 gestir sækja Þingvelli heim ár hvert.
ÞÓRA EINARSDÓTTIR
Verslunarstjóri þjónustumiðstöðvarinnar á Þingvöllum segir sumarumferðina
hafa farið rólega af stað.
UPPREISNARMAÐUR Í HLEKKJUM
Kínverskt barn virðir fyrir sér mynd af upp-
reisnarmanni í hlekkjum sem grafin hefur
verið í stein. Áletrunin „Byltingarherinn“
hefur auk þess verið grafin í steininn.