Fréttablaðið - 20.01.2005, Blaðsíða 2

2 20. janúar 2005 FIMMTUDAGUR
Björgólfur Guðmundsson og Þóra Hallgrímsson:
Stofna minningarsjóð um dóttur sína
MINNINGARSJÓÐUR Hjónin Þóra
Hallgrímsson og Björgólfur Guð-
mundsson hafa stofnað minning-
arsjóð um dóttur sína, Margréti,
og lagt fram stofnfé að upphæð
500 milljónir króna. Markmið
sjóðsins er að stuðla að heilbrigðu
líferni og bættu mannlífi og efla
menntir, menningu og íþróttir.
Sjóðurinn mun styrkja einstak-
linga, verkefni og félög til mennta
og athafna, ekki síst á alþjóðleg-
um vettvangi. Áætlað er að styrk-
veitingar nemi um 75 til 100 millj-
ónum króna á ári.
Margrét Björgólfsdóttir var
fædd árið 1955 en lést af slysför-
um árið 1989. Hún lauk meðal
annars einsöngvaraprófi frá
Söngskólanum í Reykjavík og
lagði stund á nám í austurlenskum
lækningum erlendis. Hún stofnaði
og rak fyrirtæki sem framleiddi
og dreifði hollustuvörum og rak
um tíma matstofu hjá Náttúru-
lækningafélagi Íslands. Eigin-
maður Margrétar var Jónas Sen
píanóleikari.
Stjórn minningarsjóðsins skipa
Björgólfur Guðmundsson, for-
maður, Bentína Björgólfsdóttir og
Þórunn Guðmundsdóttir hæsta-
réttarlögmaður. Sjóðurinn auglýs-
ir tvisvar á ári eftir umsóknum,
nú fyrst í febrúar á þessu ári.
- bs
Opinberir starfsmenn
með rétt á sérkjörum
Samkvæmt útreikningum á Þorsteinn Pálsson, fyrrverandi forsætisráðherra og núverandi sendiherra,
rétt á 630.000 króna eftirlaunum við 65 ára aldur. Það er óháð því hvort hann verður enn í starfi sem
sendiherra. Jón Baldvin Hannibalsson á nú rétt á tæpum 400.000 krónum.
KJARAMÁL Jón Baldvin Hannibals-
son, fyrrverandi utanríkisráð-
herra og núverandi sendiherra í
Finnlandi, hefur rétt á tæplega
400.000 króna eftirlaunum á mán-
uði auk fullra launa vegna sendi-
herrastöðu sinnar, sem nema
tæpri milljón króna sem er að
stórum hluta skattfrjáls. Sjö
fyrrverandi ráðherrar fá greidd
eftirlaun þrátt fyrir að vera í
fullu starfi á vegum ríkisins og
samtals þáðu þeir sautján millj-
ónir í eftirlaunagreiðslur á liðnu
ári.
Lög um eftirlaun sem sam-
þykkt voru á Alþingi í árslok
2003 gera ráð fyrir því að ráð-
herrar og alþingismenn geti farið
á eftirlaun um sextugt. Eftirlaun
þeirra eru þá þrjú prósent af
þingfararkaupi fyrir hvert ár á
þingi og sex prósent af ráðherra-
viðbót fyrir hvert ár á ráðherra-
stóli. Með lögunum voru heimild-
ir til töku eftirlauna rýmkaðar og
aðeins einn þeirra sjö sem nú
þiggja eftirlaun hafði öðlast rétt-
indi til þeirra fyrir gildistöku
nýju laganna.
Þorsteinn Pálsson, sendiherra
í Kaupmannahöfn og fyrrverandi
forsætisráðherra, á nú rétt á
svipuðum eftirlaunum og Jón
Baldvin en um 65 ára aldur á
hann rétt á um 630.000 krónum,
óháð því hvort hann verður enn í
starfi á vegum hins opinbera.
Svavar Gestsson, fyrrverandi
ráðherra og núverandi sendi-
herra í Svíþjóð, á rétt á um
350.000 krónum á mánuði í eftir-
launagreiðslur meðfram um
milljón króna sendiherralaunum.
Ekki hafa fengist upplýsingar um
hvort þessir einstaklingar hafa
þegar nýtt sér rétt til eftirlauna.
Halldór Blöndal, forseti Al-
þingis, mælti fyrir frumvarpinu
á sínum tíma og sagði að eitt af
markmiðum þess væri að draga
úr sókn gamalla þingmanna í
embætti í stjórnkerfinu. Sam-
þykkt laganna var umdeild á sín-
um tíma og taldi forusta Alþýðu-
sambands Íslands að aukin rétt-
indi ráðherra og þingmanna
væru ekki í réttu hlutfalli við það
sem almenningur ætti að venjast.
ghg@frettabladid.is
Ófært víða:
Margir fastir
á Hellisheiði
ÓFÆRÐ Hjálparsveit skáta í Hvera-
gerði var kölluð út um hádegi í gær
til að aðstoða bíla sem voru í vand-
ræðum á Hellisheiði. Margir bílar
lentu í vandræðum í gær vegna
ófærðar. Þá voru björgunarsveitar-
menn úr Hveragerði beðnir um að-
stoð innanbæjar í Hveragerði við að
koma skólabörnum til síns heima og
aðstoða heilbrigðisstarfsfólk við að
komast leiðar sinnar.
Hellisheiði var lokað í gær vegna
ófærðar og þæfingsfærð var á
Sandskeiði, í Þrengslum og víða á
Suðurlandi. Þá var stórhríð á
Kleifaheiði og vonskuveður á Stein-
grímsfjarðarheiði. - bs
SPURNING DAGSINS
Skúli, hitti skrattinn þarna
ömmu sína?
„Nei, þetta var bara einhver aulabrand-
ari hjá 10-11.“
Skúli Einarsson, formaður Matsveinafélags Ís-
lands, hefur mótmælt auglýsingum verslana 10-
11 þar sem segir að Guð hafi skapað lambakjöt
en djöfullinn kokka og segist ekki vera getinn af
djöflinum frekar en aðrir kokkar.
JÓN BALDVIN
HANNIBALSSON
Sendiherra í Finnlandi. Þingmaður Al-
þýðuflokks 1982 til 1998, fjármála-
ráðherra 1987 til 1988 og utanríkis-
ráðherra 1988 til 1995. Eftirlaunarétt-
ur um 370.000 krónur.
ÞORSTEINN PÁLSSON
Sendiherra í Kaupmannahöfn. Þing-
maður Sjálfstæðisflokksins 1983 til
1999. Fjármálaráðherra 1985 til 1987,
forsætisráðherra 1987 til 1988, sjávar-
útvegsráðherra og dómsmálaráðherra
1991 til 1999. Núverandi eftirlauna-
réttur um 360.000 krónur. 42 pró-
senta skerðing til 65 ára aldurs. Eftir
það verður eftirlaunarétturinn um
630.000.
FRIÐRIK SOPHUSSON
Forstjóri Landsvirkjunar. Þingmaður
Sjálfstæðisflokksins 1978 til 1998.
Iðnaðarráðherra 1987 til 1988 og fjár-
málaráðherra 1991 til 1998. Eftir-
launaréttur um um 330.000 krónur.
SVAVAR GESTSSON
Sendiherra í Svíþjóð. Þingmaður Al-
þýðubandalags og Samfylkingar frá
1978 til 1999. Viðskiptaráðherra 1978
til 1979, félags- og heilbrigðismála-
ráðherra 1980 til 1983 og mennta-
málaráðherra 1988 til 1991. Núver-
andi eftirlaunaréttur um 350.000
krónur. 24 prósenta skerðing til 65
ára aldurs.
GUÐMUNDUR BJARNASON
Framkvæmdastjóri Íbúðalánasjóðs.
Þingmaður Framsóknarflokksins frá
1979 til 1999. Heilbrigðisráðherra
1987 til 1991. Landbúnaðar- og um-
hverfisráðherra 1995 til 1999. Núver-
andi réttur um 330.000 krónur. 24
prósenta skerðing til 65 ára aldurs.
EIÐUR
GUÐNASON
Sendiherra í
Kína. Þingmaður
Alþýðuflokks
1978 til 1993.
Umhverfisráðherra
frá 1991 til
1993. Eftir-
launaréttur
um 250.000
krónur.
SIGHVATUR BJÖRGVINSSON
Framkvæmdastjóri Þróunarsamvinnu-
stofnunar Íslands. Þingmaður Alþýðu-
flokks og Samfylkingar 1974 til 1983
og 1987 til 2001. Fjár-
málaráðherra 1979 til
1980, heilbrigðis-
ráðherra 1991 til
1993 og 1994 til
1995 og viðskipta-
ráðherra 1993 til
1995. Núverandi
eftirlaunaréttur
um 290.000
krónur. Tólf pró-
senta skerðing
til 65 ára aldurs.
KJARTAN JÓHANNSSON
Sendiherra í Belgíu. Þingmaður Al-
þýðuflokks frá 1978 til 1989. Sjávarút-
vegsráðherra 1978 til
1979 og sjávarút-
vegs- og viðskipta-
ráðherra 1979 til
1980. Eftirlauna-
réttur um
210.000 krónur.
TÓMAS INGI OLRICH
Sendiherra í Frakklandi. Þingmaður
Sjálfstæðisflokks frá 1991 til 2003.
Menntamálaráðherra
2002 til 2003. Nú-
verandi eftirlauna-
réttur um 150.000
krónur. Átján pró-
senta skerðing til 65
ára aldurs.
MARGRÉT BJÖRGÓLFSDÓTTIR
Margrét lést af slysförum aðeins 33 ára
gömul. Hún var listhneigð og var annt um
heilsu og vellíðan sína og annarra.
Nígeríumaður látinn laus:
Fór strax
úr landi
LÖGREGLA Nígeríumaður sem
handtekinn var í tengslum við inn-
flutning á tæpu kílói af kókaíni
fyrir tveimur vikum hefur verið
látinn laus. Sá sem flutti kókaínið
inn er tæplega þrítugur Ungverji
en hann situr enn í gæsluvarð-
haldi.
Ekki þótti ástæða til að halda
Nígeríumanninum lengur og var
hann látinn laus á þriðjudags-
morgun. Hann fór úr landi strax
sama dag. Rannsókn málsins
stendur enn yfir.
Met var sett í magni innvortis-
innflutnings þegar efnin komu til
landsins en Ungverjinn hafði
þurft að gleypa hluta þeirra aftur
eftir að pakkningarnar höfðu skil-
að sér niður úr honum.
- hrs
Eþíópíumaður dæmdur:
Fjögurra
mánaða
fangelsi
DÓMSMÁL Eþíópíumaður með
sænskt ríkisfang var í dag dæmd-
ur í fjögurra mánaða fangelsi
fyrir að aðstoða par frá Eþíópíu
við að komast ólöglega inn í land-
ið. Maðurinn var handtekinn í
Leifsstöð skömmu fyrir áramót
ásamt fólkinu sem kom hingað frá
Osló, en ferðinni var heitið áfram
vestur til Bandaríkjanna.
Parið var dæmt í mánaðarlangt
fangelsi fyrir viku en maðurinn
með sænska ríkisfangið var
dæmdur í fjögurra mánaða fang-
elsi fyrir sinn þátt í málinu.
Eyjólfur Kristjánsson, lögfræð-
ingur hjá sýslumannsembættinu á
Keflavíkurflugvelli, segir að fólk-
ið verði sent til heimalanda sinna
að lokinni afplánun. -bs