Fréttablaðið - 29.05.2008, Blaðsíða 74
46 29. maí 2008 FIMMTUDAGUR
maturogvin@frettabladid.is
Svavar Knútur Kristinsson segist vera al-
æta á mat. Hann hefur þó ekki mikinn tíma
fyrir eldamennsku.
„Ég er svo mikið á þeytingi að ég hef sjaldan tíma til
að elda. Það er samt eitt það skemmtilegasta sem ég
geri og þegar ég hef tíma til reyni ég að gera
eitthvað gott og hafa það notalegt heima hjá mér,“
segir tónlistarmaðurinn og heimspekingurinn Svavar
Knútur Kristinsson sem hefur heldur betur í mörgu
að snúast þessa dagana. „Ég er búinn að vera að
undirbúa mig undir Steins Steinarr-tónleikana sem
verða í Íslensku óperunni í kvöld og annað kvöld á
dagskrá Listahátíðar og svo erum við í hljómsveit-
inni minni, Hraun, að gefa út plötu 10. júní og
undirbúa útgáfutónleika,“ segir Svavar Knútur sem
vinnur einnig fullt starf sem frístundaráðgjafi.
Spurður um hvaða matur sé í uppáhaldi segist
Svavar ekki vera mikið fyrir flókinn mat. „Ég er
alinn upp í sveit í Skagafirði og þar var alltaf mjög
hefðbundinn íslenskur heimilismatur, eins og
grjónagrautur, slátur, ýsa og soðnar kartöflur. Ég er í
raun mikil alæta og alls ekki mikið fyrir „fancy“
mat, en þegar ég elda ræðst ég í það af áfergju og
nota oft mikið af grænmeti og fersku hráefni.“
„Mér finnst guacamole alveg æðislegt og er gjarn
á að hafa það með öllu sem ég elda. Vinir mínir kalla
mig „guacamole-kónginn“ því ég borða það með
öllum mat, enda finnst mér það virka með bæði með
fisk og kjöti. Það er svo ferskt og suðrænt,“ segir
Svavar en bendir jafnframt á hversu erfitt það sé að
fá mátulega þroskað avocado í matvöruverslunum
hérlendis. „Ég skora bara á íslenskar matvörubúðir
að fara að hugsa sinn gang hvað varðar ferskleika á
grænmeti. Mér finnst skrítið að maður skuli helst
finna mátulega þroskað avocado í Bónus, en yfirleitt
þarf maður að láta það standa á borði í viku áður en
það er tilbúið til matreiðslu,“ segir Svavar sem gaf
okkur uppskrift að sínu heimatilbúna guacamole.
„Ég geri þetta alltaf eftir tilfinningunni, enda á
uppskrift bara að vera beinagrind.“ alma@frettabladid.is
Guacamole með öllum mat
GUACAMOLE AÐ HÆTTI SVAVARS KNÚTS
Fyrir fjóra
2 avocado – þroskuð
8 kirsuberjatómatar
1 vænn rauðlaukur
1 rautt chilli (til að gefa smá ferskleika)
safi úr einu lime og/eða sítrónu
góður hnefi af fersku kóríander
ferskur hvítlaukur og engifer eftir smekk
Maldon-salt og pipar eftir smekk
Avocado afhýdd og stöppuð eins og kartöflumús.
Tómatar og laukur skornir í miðlungsstóra bita og chilli
fínt saxað. Öllu blandað saman og kóríander tætt út í
með höndunum. Lime og/eða sítróna kreist yfir. Hrært
saman. Hvítlaukur, engifer, salt og pipar sett út í eftir
smekk.
AVOCADO ÞARF AÐ VERA MÁTULEGA ÞROSKAÐ Svavar
Knútur segir að það geti verið erfitt að fá avocado í matvöru-
verslunum, sem er tilbúið til matreiðslu. FRÉTTABLAÐIÐ/STEFÁN
Fátt er...
...sumarlegra en að borða fersk
kirsuber. Auk þess að vera
unaðslega bragðgóð innihalda
berin litarefnið antósýanín, en
rannsóknir sýna að það
dregur bæði úr sársauka og
bólgum. Sem sagt: kirsuber
eru bæði holl og góð!
Í nýrri skýrslu viðskiptaráðu-
neytisins, „Ný sókn í neytenda-
málum“, eru ýmsar merkilegar
niðurstöður. Þrátt fyrir smæð og
einangrun er Ísland ekki aftar-
lega á merinni miðað við hin
Norðurlöndin og Frakkland í
fjölbreytileika vöruúrvals. Við
stöndumst þeim snúning í úrvali á
mjólkur- og kjötvörum, en erum
reyndar langt á eftir á einu sviði:
Í úrvali á drykkjarvörum.
Samkvæmt skýrslunni bjóðast
okkur 57 tegundir af drykkjum á
meðan í Noregi eru 71 tegundir í
boði og allt upp í 142 tegundir af
drykkjum í Frakklandi.
Annaðhvort eru Íslendingar
svona íhaldssamir og áhugalausir
um nýjar drykkjarvörur, eða að
hér eru gríðarleg sóknarfæri í
nýjum drykkjum. Heimurinn er
fullur af alls konar gosdrykkjum.
Hvað með steinabláberja-rjóma-
sóda, kaffikóla, rótarbjór eða
engiferöl? Möguleikarnir eru
endalausir. Nú er bara að sjá
hvort fátæklega íslenska úrvalið
tekur stakkaskiptum – eða ekki.
Fátæklegt
drykkjarúrval
GOSDRYKKJATEGUNDIR SKIPTA ÞÚS-
UNDUM Í HEIMINUM En hér fást 57
tegundir. Áhugaleysi eða sóknarfæri?
Hvaða matar gætirðu síst verið án? Kjötsúpunnar hennar
mömmu.
Besta máltíð sem þú hefur fengið? Hvítlaukshumarinn
hans Andra, mannsins míns, sem er borinn fram með
fersku salati og hvítvíni, til dæmis frá Chile. Andri hefur
þetta „touch“ til að halda humrinum safaríkum þegar
hann eldar. Annars fæ ég hinar mestu veislumáltíðir
hjá systkinum mínum sem eru allt listakokkar frá
náttúrunnar hendi.
Er einhver matur sem þér finnst vondur? Slepjuleg-
ur fiskur. Ég get samt alveg hugsað mér skötusel og
lúðu þótt þeir fiskar séu ófríðir ásýndar.
Leyndarmál úr eldhússkápnum: Eiginmaður-
inn er leyndamálið því hann matreiðir hina
girnilegustu rétti úr því sem er til í eldhús-
skápunum! En mitt hlutverk er að versla inn í eldhússkápana.
Hvað borðar þú til að láta þér líða betur? Ekta dökkt
súkkulaði og mjólk.
Hvað áttu alltaf til í ísskápnum? Mjólk, mjólk og meiri
mjólk.
Ef þú yrðir föst á eyðieyju, hvað tækirðu með þér? Lifr-
arpylsu, núðlur og súkkulaðikökuna hans Andra – allt orkurík
fæða.
Hvað er það skrítnasta sem þú hefur borðað? Hum-
arpitsa hjá Óðni frænda á Hótel Höfn. Hún er alveg
hrikalega góð, enda er landsfrægt að Hornfirðingar
eiga besta humarinn. Svo er ekki verra að láta svo
góðan kokk eins og Óðin móðurbróður minn elda ofan
í sig svona gott hráefni.
MATGÆÐINGURINN INGIBJÖRG GUÐJÓNSDÓTTIR, EINSÖNGVARI OG SÖNGKENNARI
Borðaði humarpitsu á Höfn í Hornafirði
Nú er grilltíminn runninn upp.
Unaðsleg lykt af steiktu kjöti
líður yfir bæi og búsældarlegur
landinn stendur yfir teinunum.
Góð grillsósa fylgir góðum grill-
mat eins og nótt fylgir degi. Það
þarf enga snilldarkokka til að
búa til góða grillsósu. Hér til
hliðar er ein sú einfaldasta og
önnur aðeins flóknari, en svo má
bara prófa sig áfram eða hrein-
lega kaupa grillsósu úti í næstu
búð, þar sem þær fást í miklu
úrvali. Í guðanna bænum,
gleymið bara ekki grillsósunni!
EINFÖLD GRILLSÓSA
Hrærið saman:
1 dós af sýrðum rjóma (tíu prósent)
2-3 msk. af Sharwood‘s mango
chutney bengal spice.
Úr þessu fæst sósa sem er góð með
öllum grillmat.
FLÓKNARI GRILLSÓSA
Hráefni:
½ rauðlaukur
3-5 sveppir
1/3 paprika
hvítlauksrif (pressað)
örlítið smjör
örlítill rjómi
½ dós rjómaostur með hvítlauk
½ dós rjómaostur með sólþurrkuð-
um tómötum
1 dós sýrður rjómi
sítróna
Aðferð: Skerið grænmetið mjög
smátt niður og steikið upp úr
smjörinu. Kryddið með smá salti
og svörtum pipar. Hellið pínulitl-
um rjóma saman við. Bíðið þar
til suðan kemur upp og setjið þá
rjómaostinn út í og látið hann
bráðna alveg.
Hrærið svo blöndunni saman
við sýrða rjóman og endið svo á
að kreista sítrónusafa út í eftir
smekk.
Grillsósan mikilvæga
GOTT KJÖT Á GRILLI Enn betra með
góðri grillsósu.