Fréttablaðið - 31.12.2008, Blaðsíða 14

14 31. desember 2008 MIÐVIKUDAGUR
UM ÁRAMÓT
Árið sem nú er að líða verður lengi í minnum haft. Banka-
hrunið á eftir að móta þjóðfélag
okkar næstu árin. Fram undan
eru erfiðleikar í rekstri heimila
og fyrirtækja, skerðing á opin-
berri þjónustu og gríðarleg
skuldasöfnun ríkisins.
Við sem erum á besta aldri
höfum ekki fyrr séð jafnerfiða
stöðu í efnahagslífinu. En það er
ástæðulaust og gagnslaust að
vera með bölmóð og svartsýni.
Þrátt fyrir allt er framtíðin full
af spennandi tækifærum. Við
þurfum að vinna okkur í gegnum
þessa erfiðleika. Það getum við
gert á fáum árum. Ég trúi því að
þá munum við standa sterkari
eftir og getum haldið áfram að
byggja hér upp samfélag í
fremstu röð.
Fyrsta verkefnið er að endur-
reisa traust í samfélaginu. Þar
skiptir miklu máli að aðdragandi
hrunsins verði rannsakaður með
gagnsæjum og trúverðugum
hætti. Þjóðin á rétt á því að öllum
spurningum verði svarað og ekk-
ert undan dregið.
II
Það er vont að vita til þess að rík-
isstjórnin og ýmsar mikilvægar
stofnanir í samfélaginu eru ekki
trúverðugar – hvorki í augum
almennings í landinu né alþjóða-
samfélagsins. Undanfarnar vikur
hefur hik og ráðleysi einkennt
ríkisstjórnina og mikilvægur
tími hefur farið til spillis.
Enn er ekki nema að litlu leyti
búið að upplýsa það hvað gerðist
á stjórnarheimilinu í aðdraganda
hrunsins. Miðað við yfirlýsingar
seðlabankastjóra hafði ríkis-
stjórnin sterkar vísbendingar um
að hrun væri yfirvofandi en þær
vísbendingar voru hunsaðar. Það
er nauðsynlegt að hreinsa loftið
af þessum alvarlegu ásökunum.
Þjóðin finnur að það skortir
trausta forystu úr forsætisráðu-
neytinu. Almenningur er farinn
að draga í efa að ríkisstjórnin
ráði við verkefnið. Það skortir
traust og heilindi í samstarf Sam-
fylkingarinnar og Sjálfstæðis-
flokksins, og nú kemur það ríkis-
stjórninni að engu gagni að hún
styðst við stærri þingmeirihluta
en nokkur önnur ríkisstjórn í
sögu lýðveldisins.
III
Það er langt síðan ég fór að tala
fyrir því að við Íslendingar leit-
uðum leiða til að skipta um gjald-
miðil. Eins og fleiri hafði ég
áhyggjur af því að það væri of
áhættusamt að halda úti minnsta
sjálfstæða gjaldmiðli heims og
treysta honum til að fljóta eins og
korktappa á stórsjó hins alþjóð-
lega fjármálaheims. Nú er komið
á daginn að þær áhyggjur voru á
rökum reistar – því miður.
Nú í janúar heldur Framsókn-
arflokkurinn flokksþing og tekin
verður afstaða til spurningarinn-
ar um aðild Íslands að Evrópu-
sambandinu. Í dag er það enn þá
skýrara en áður, að mínu mati, að
rétt er að við látum á það reyna
hvaða kostir bjóðast í aðildarvið-
ræðum við ESB. Að sjálfsögðu
þurfum við að fá tryggingu fyrir
innlendum yfirráðum yfir auð-
lindum okkar og undirbúa okkur
vandlega fyrir aðildarviðræður.
Við framsóknarmenn höfum lagt
góðan grunn að undirbúningnum
í okkar flokksstarfi mörg undan-
farin ár.
Margir hafa áhyggjur af full-
veldi okkar og þjóðlegum gildum
ef við göngum inn í Evrópusam-
bandið. Gömlu gildin eru mikið
til umræðu núna og það er vel.
Gömul gildi þýða hins vegar ekki
að við eigum að hverfa til fortíð-
ar. Við eigum frekar að byggja á
því sem vel hefur tekist og nýta
þá reynslu til framsækinnar upp-
byggingar. Ísland er eitt þeirra
landa sem vegna legu sinnar er
háð samskiptum við aðrar þjóðir.
Fyrir okkur felast meiri tækifæri
í því að auka slík samskipti en í
því að loka landinu og hverfa til
búskaparhátta fortíðarinnar.
Eins og staðan er núna er
afskaplega mikilvægt fyrir okkur
að auka útflutning á okkar góðu
framleiðsluvörum og skapa verð-
mæti og gjaldeyri. Á sama hátt er
mikilvægt að íslenskir neytendur
geti keypt innfluttar vörur án
þess að þurfa að greiða óhófleg
gjöld og að íslensk atvinnufyrir-
tæki þurfi ekki að borga of hátt
verð fyrir aðföng til fjárfesting-
ar eða framleiðslu.
IV
Á flokksþingi okkar framsóknar-
manna 16.-18. janúar verður
kosin ný forysta fyrir Framsókn-
arflokkinn. Fjöldi öflugra ein-
staklinga gefur kost á sér í því
kjöri og það er mikið gleðiefni.
Mikilvægt er að þessu ágæta
fólki takist að snúa bökum saman
eftir að niðurstaða liggur fyrir og
vinna sameiginlega að því fyrir
flokkinn að snúa vörn í sókn. Það
er mikilvægt að Framsóknar-
flokkurinn komi að því uppbygg-
ingarstarfi sem fram undan er í
íslensku samfélagi. Ég finn það á
mörgum að þeir sakna þess að
hafa ekki Framsóknarflokkinn í
ríkisstjórn. Fólk veit að fram-
sóknarmenn leggja höfuðáherslu
á að byggja upp og tryggja
atvinnu í landinu. Því miður tala
fáir fyrir þeim sjónarmiðum í
þessari ríkisstjórn. Vonandi verð-
ur breyting þar á sem fyrst.
Ég óska landsmönnum öllum
gleðilegs nýs árs og þakka
ánægjuleg kynni og samskipti á
árinu sem er að líða.
Höfundur er formaður Framsókn-
arflokksins.
Öllum spurningum verði svarað
VALGERÐUR SVERRISDÓTTIR
Afgreiðslutími útibúa
2. janúar 13 - 16
Ráðgjafa- og þjónustuver 410 4000
2. janúar 13 - 16
3. janúar (laugardagur) 11 - 16
Starfsfólk Landsbankans óskar viðskiptavinum og landsmönnum
öllum nær og fjær gleðilegs nýs árs og bjartrar framtíðar.
Það er opið hjá okkur
föstudaginn 2. janúar