Morgunblaðið - 16.02.2006, Qupperneq 10

10 FIMMTUDAGUR 16. FEBRÚAR 2006 MORGUNBLAÐIÐ
FRÉTTIR
LÖGREGLAN hefur óskað eftir
samstarfi við netfyrirtæki hér á landi
í því skyni að setja upp netsíum sem
koma í veg fyrir að viðskiptavinir geti
skoðað vefsíður sem innihalda barna-
klám. Þetta kom fram í máli dóms-
málaráðherra, Björns Bjarnasonar, á
Alþingi í gær. Hann sagði að verið
væri að skoða nánar alla þætti þessa
máls, m.a. þá sem snúa að vernd per-
sónuupplýsinga og öðrum lagalegum
þáttum. „Vonast er til að þetta sam-
starf verði að veruleika á næstu vik-
um og mánuðum,“ sagði hann.
Sandra Franks, varaþingmaður
Samfylkingarinnar, var málshefjandi
umræðunnar. Hún sagði að daglega
heyrðust fregnir af barnaklámi á net-
inu og að fáum blandaðist hugur um
að möguleikar nýrrar tækni hefðu
stóraukið umsvif glæpamanna sem
misnotuðu saklaus börn. „Til marks
um það nefni ég að Barnaheillum hafa
borist ógrynni ábendinga um barna-
klámsíður á netinu,“ sagði hún.
Sandra sagði að stjórnvöld hefðu
vissulega gripið til varna, m.a. væri
fólki bannað samkvæmt hegningar-
lögum að hlaða niður barnaklámi á
tölvur sínar, en þrátt fyrir það hefði
sigið hratt á ógæfuhliðina. „Á nýlegri
ráðstefnu Barnaheilla kom fram að
tæknilega er nú hægt að taka upp sér-
stakar netsíur sem myndu hindra að-
gang Íslendinga að vefsvæðum sem
innihalda barnaklám. Norðmenn hafa
tekið upp netsíur í þeim tilgangi. Mér
finnst það mjög athyglisvert og er
þeirrar skoðunar að íslensk stjórn-
völd eigi að gera slíkt hið sama.“
Sandra sagði að í Noregi fengju
netþjónustur lista yfir ólöglegar vef-
síður frá yfirvöldum, og að þeim væri
síðan lokað. Þar með væri ekki hægt
að komast inn á þær frá Noregi. „Í
stað þess að síðan opnist kemur ein-
faldlega gluggi sem segir að viðkom-
andi hafi reynt að komast inn á ólög-
lega vefsíður. Í Noregi hafa mælst allt
að sjö þúsund tilraunir daglega til að
komast inn á þannig síður. Það er hins
vegar engin skrá haldin yfir þá sem
reyna slíkt enda væri það fráleitt að
mínum dómi og í andstöðu við stjórn-
arskrá og persónuverndarlög.“
Ýmsar leiðir kannaðar
Sandra tók fram að hún aðhylltist
þá grundvallarreglu að ríki og hið op-
inbera ættu að hafa sem allra minnst
afskipti af persónulegum högum og
einkalífi fólks. „Í þessu tilviki er ég þó
þeirrar skoðunar að það sé réttlæt-
anlegt að ríkið grípi inn í með þessum
hætti. Afstaða mín byggist á því að
það er óhjákvæmilegt að líta svo á að
notendur barnakláms séu þátttak-
endur í þeim glæpum sem eru for-
sendan fyrir framleiðslu þess. Þeir
eiga því aðild að kynferðisbrotum
gegn börnum, þó þau fari fram ann-
ars staðar í heiminum. Ég tel að það
felist svo ríkir hagsmunir í því að
stöðva þau brot að það réttlæti fylli-
lega að ríkið grípi til aðgerða af þessu
tagi til að hindra þau.“ Hún spurði
ráðherra því næst hvort til greina
kæmi að setja upp umræddar netsíur.
Ráðherra svaraði því til, eins og áð-
ur sagði, að lögreglan hefði óskað eft-
ir samstarfi við netfyrirtæki hér á
landi til að koma upp slíkum netsíum.
Hann sagði mikilvægt að leita allra
leiða til að stemma stigu við barna-
klámi á netinu. Lögreglan undir for-
ystu embættis ríkislögreglustjóra
hefði verið að kanna ýmsar leiðir í
þeim efnum. Hún hefði m.a. kynnt sér
hvað lögregluyfirvöld í nágrannalönd-
um okkar hefðu verið að gera. Þá
hefði hún átt gott samstarf við Barna-
heill.
Björn sagði ennfremur að í dóms-
málaráðuneytinu væri verið að vinna
að lagabreytingum til að íslenska rík-
ið gæti uppfyllt skuldbindingar sínar
á grundvelli samningi Evrópuráðsins
um tölvubrot frá 23. maí 2001. Hann
sagði að í samningnum væri m.a.
ákvæði varðandi barnaklám og að þar
væri gert ráð fyrir úrræði sem tæki
mið af þeirri hættu að hægt væri að
breyta tölvugögnum sem hefðu að
geyma sönnun fyrir broti. Þau ákvæði
samningsins kölluðu á lagabreytingu
hér á landi. Sagðist hann stefna að því
að leggja fram frumvarp í þessa veru
á yfirstandandi þingi.
Fagna samstarfi um netsíur
Fleiri þingmenn tóku þátt í um-
ræðum. Valdimar L. Friðriksson,
þingmaður Samfylkingarinnar, sagði
að barnaklám væri í sínum huga ein
stærsta skömm sem hvíldi á mann-
kyninu og Hlynur Hallsson, varaþing-
maður Vinstri grænna, fagnaði því að
verið væri að vinna að þessum málum
í dómsmálaráðuneytinu. Guðlaugur
Þór Þórðarson, þingmaður Sjálfstæð-
isflokks, Siv Friðleifsdóttir, þingmað-
ur Framsóknarflokks, og Össur
Skarphéðinsson, þingmaður Sam-
fylkingarinnar, tóku í sama streng.
Þau tvö síðarnefndu fögnuðu því sér-
staklega að unnið væri að því að ná
samkomulagi um netsíur.
Þingmenn ræða margvíslegar leiðir til að koma í veg fyrir barnaklám á netinu
Lögreglan vill samstarf við
netfyrirtæki um netsíur
Eftir Örnu Schram
arna@mbl.is
Morgunblaðið/Brynjar Gauti
Þuríður Backman heilsar hér upp á Söndru Franks. Á milli þeirra sést glitta í Ágúst Ólaf Ágústsson.
TÍU þingmenn Sjálfstæðisflokksins hafa lagt fram á Alþingi
frumvarp um að launagreiðendum verði skylt að aðgreina út-
svar og tekjuskatt á launaseðli launamanns. Fyrsti flutnings-
maður frumvarpsins er Guðlaugur Þór Þórðarson.
Í greinargerð frumvarpsins segir m.a. að útsvarsprósenta sé
misjöfn á milli sveitarfélaga og að mikilvægt sé að almenn-
ingur sé ávallt vel upplýstur um álagningu skatta og opin-
berra gjalda.
„Flutningsmenn telja að með aðgreiningu á útsvari og tekju-
skatti á launaseðli sjái launamaður hvernig staðgreiðsla skatta
skiptist á milli ríkis og sveitarfélaga.“
Skylt verði að greina á milli
útsvars og tekjuskatts
ALÞINGI hefur samþykkt frumvarp um breytingu á lögum um
stöðu, stjórn og starfshætti þjóðkirkjunnar. Samkvæmt því bætist
við ákvæði í lögin um að kirkjuþing ákveði skipan umdæma vígslu-
biskupa.
Ennfremur bætist eftirfarandi ákvæði við lögin: „Kirkjuþings-
fulltrúar eru kosnir leynilegri kosningu til fjögurra ára í senn.
Kirkjuþing ákveður skipan kjördæma kirkjuþings og fjölda
kirkjuþingsmanna. Á kirkjuþingi skulu leikmenn vera fleiri en
vígðir.“
Frumvarpið var samþykkt með 33 samhljóða atkvæðum. Lögin
öðlast þegar gildi.
Kirkjuþing ákveði skipan
umdæma vígslubiskupa
ÞORGERÐUR K. Gunnars-
dóttir menntamálaráðherra
fagnaði á Alþingi í gær yfirlýs-
ingu forystu
Kennara-
sambands
Íslands og
aðildarfélaga
þess, en í yf-
irlýsingunni
kemur m.a.
fram að að-
ildarfélögin
standi að
samkomu-
lagi mennta-
málaráðherra og KÍ um tíu
skref til sóknar í skólastarfi.
„Það er ljóst að kennarafor-
ystan gengur samstiga í þessu
máli eins og yfirlýsing Kenn-
arasambandsins frá því í morg-
un ber augljóslega með sér,“
sagði ráðherra, en Björgvin G.
Sigurðsson, þingmaður Sam-
fylkingarinnar, var málshefj-
andi umræðunnar.
Ráðherra sagði að það skipti
mestu að menntamálaráðu-
neytið og kennaraforystan
gengju samstiga að því verki
sem fram undan væri. „Við
munum halda áfram að starfa í
samræmi við það samkomulag
sem var undirritað af mér og
formanni Kennarasambands-
ins,“ sagði hún. „Við munum
[...] vera samstiga í þeirri við-
leitni okkar að gera skólakerfið
enn betra en það er í dag.“
Ráðherra sagði að farið yrði í
allsherjar endurskipulagningu
og endurskoðun á allri skóla-
löggjöfinni; þ.e. leikskólalög-
gjöfinni, grunnskólalöggjöfinni
og framhaldsskólalöggjöfinni.
Það yrði að sjálfsögðu gert í
samráði við kennarasamfélag-
ið.
Ráðherra sagði aukinheldur
að í þeirri vinnu sem fram und-
an væri þyrfti líka að líta til
samræmdra prófa. „Það er afar
líklegt í ljósi þess sem tengist
breyttri námskipan til stúd-
entsprófs að það fyrirkomulag
muni breytast.“
Fagnar
yfirlýsingu
KÍ og að-
ildarfélaga
Þorgerður Katrín
Gunnarsdóttir
ÞINGFUNDUR Alþingis hefst kl.
10.30 í dag. Á dagskrá eru umræð-
ur um sveitarstjórnarmál og raf-
orkumál.
STURLA Böðvarsson samgönguráð-
herra lýsti yfir miklum vonbrigðum
með það á Alþingi í gær að samráðsferli
við íbúa hvort sínum megin við Klepps-
víkina í Reykjavík vegna fyrsta áfanga
Sundabrautar skyldi ekki vera hafið.
Umhverfisráðherra staðfesti úrskurð
Skipulagsstofnunar í byrjun nóvember
sl. um mat á umhverfisáhrifum vegna 1.
áfanga Sundabrautar, en setti um leið
skilyrði um samráð við íbúa í Hamra-
hverfi og við hafnaryfirvöld og hags-
munaaðila í Sundahöfn.
Guðlaugur Þór Þórðarson, þingmað-
ur Sjálfstæðisflokks, var málshefjandi
umræðunnar á þingi í gær og spurði
ráðherra um stöðu mála vegna fyrir-
hugaðrar Sundabrautar.
„Formlegt samráð er samkvæmt
mínum upplýsingum ekki hafið,“ sagði
ráðherra, „og verð ég að lýsa miklum
vonbrigðum mínum með að tíminn
skyldi ekki hafa verið nýttur frá því í
byrjun nóvember til þess að leita allra
leiða til góðs samkomulags við íbúana á
svæðinu, eins og úrskurðurinn gerir
ráð fyrir,“ bætti ráðherra við og hélt
áfram:
„Framkvæmdasvið Reykjavíkur-
borgar gengur þarna á undan í und-
irbúningi þessa verkefnis og Vegagerð-
in kemur síðan að sjálfsögðu að þessu
verki og ber ábyrgð á endanlegri hönn-
un þegar allir þættir liggja fyrir. Hönn-
un vegna þessa fyrri áfanga er ekki bú-
in, eins og nærri má geta, þar sem ekki
er búið að ákveða endanlega legu veg-
arins. Hönnunin verður sett af stað
strax og samráðsniðurstaðan er feng-
in.“
Ráðherra sagði að undirbúningur
vegna hönnunar og útboðsgagna gæti
tekið nærri tvö ár. „Rétt er að geta þess
að vinna við umhverfismatsskýrslu
vegna annars áfanga er þegar hafin,
þ.e. frá Hallsvegi og upp á Kjalarnes.
Sú vinna gæti tekið tæpt ár eða svo,“
sagði ráðherra enn fremur.
Fjölmennt á opinn fund
Eiríkur Hjálmarsson, aðstoðarmaður
borgarstjóra, sendi frá sér tilkynningu í
gærkvöldi þess efnis að ekki sé rétt að
engin samráðsfundur hafi verið haldinn.
Hinn 17. nóvember hafi um 300 manns
sótt opin fund framkvæmdaráðs borga-
innar um málefni Sundabrautar og lítur
Reykjavíkurborg svo á að fundurinn sé
þáttur í samráðsferli vegna lagningar
brautarinnar. Á fundinum, sem haldin
var á Grand Hótel, komu fram sjón-
armið íbúa beggja vegna við Kleppsvík-
ina og héldu meðal annarra erindi Guð-
mundur Arason sem lýsti sjónarmiðum
íbúasamtaka Laugardals og Elísabet
Gísladóttir sem viðraði sjónarmið íbúa-
samtaka Grafarvogs. Spurningar úr sal
voru einnig teknar niður og svarað skil-
merkilega á vefsvæði framkvæmdaráðs.
Vonbrigði með að samráð
skyldi ekki vera hafið