Morgunblaðið - 17.08.2008, Blaðsíða 20

20 SUNNUDAGUR 17. ÁGÚST 2008 MORGUNBLAÐIÐ
Eftir Freystein Jóhannsson
freysteinn@mbl.is
W
ater, water everyw-
here, not a drop to
drink...“ (Það er
allt á floti alls stað-
ar, ekkert nema
sjór..), söng ljóshærður Englend-
ingur fyrir 52 árum og fylgdi þá fast
eftir lögunum „Singing the Blues“
og „Rebel Rock“ sem höfðu komizt í
fyrsta sæti brezka metsölulistans ár-
ið áður. Tommy Steele var mættur á
sviðið og þar með höfðu Bretar eign-
azt sína fyrstu poppstjörnu.
Thomas William Hicks fæddist í
Bermondsey, Suður-London 17. des-
ember 1936, annar í röð sjö systkina,
en aðeins fjögur þeirra komust á
legg. Foreldrar hans voru Elizabeth
Ellen Bennett og Thomas Walter
Hicks. Thomas William var ekki
hraust barn. Hann lagðist í lungna-
bólgu hvað eftir annað, en virðist
hafa sigrazt á henni, því einsog hann
söng síðar meir var ekki að sjá að
lungun háðu honum hið minnsta.
Tommy og móðir hans voru flutt um
tíma frá London í stríðinu vegna
loftárása Þjóðverja, en mest af þeim
upplifði hann þó í borginni.
Tónlistin tók allt yfir
Þrátt fyrir erfiða bernsku var
Thomas William glaðvært ungmenni
og lét sér fátt fyrir brjósti brenna.
Strax í barnaskóla sýndi hann ríka
frásagnargáfu og þegar hann eltist
langaði hann að leggja skriftir fyrir
sig. Til að safna í reynslusjóð fyrir
rithöfundarferilinn fór hann til sjós.
Hann lenti í sjávarháska og var lagð-
ur inn á spítala, þar sem hann sá gít-
ar í fyrsta skipti. Upp frá því hafði
hann gítar alltaf við hendina og tón-
listin gekk af rithöfundinum dauð-
um, þó ekki alveg, því Tommy Steele
samdi marga af textum sínum sjálf-
ur og skrifaði bækur síðar meir.
Hann spilaði og söng til sjós og þeg-
ar hann kom í land spilaði hann og
söng skiffletónlist á krám og kaffi-
húsum í Soho. Í Bandaríkjunum
heyrði hann tónlist Buddy Holly og
varð ekki samur aftur, rokkið náði
tökum á honum, hann lét af skiffle-
söngnum og gerðist fyrsti brezki
rokkarinn.
Haustið 1956 náði Thomas athygli
umboðsmannsins John Kerry, sem
taldi hann geta orðið svar Breta við
Elvis Presley. Nafninu var breytt í
Tommy Steele; eftirnafnið var sótt
til afa hans, Thomas Stil-Hicks,
skrifað upp á framburðinn og e
skeytt við. Tommy Steele hætti til
sjós og skaust upp á brezka stjörnu-
himininn sem söngvari rokksveit-
arinnar The Steelmen, en komst á
toppinn einn og óstuddur. John
Kerry kom honum á plötusamning
við Decca. Brezkir rokkarar gerðu
talsvert af því að hljóðrita bandarísk
lög og gefa út á plötu áður en banda-
ríska útgáfan barst til Bretlands og
þannig voru mörg af lögum Tommy
Steele tilkomin. Fyrir kom að bæði
bandaríska og brezka útgáfan voru
samtímis á brezka metsölulistanum.
Þótt Tommy Steele ógnaði ekki veldi
Presley varð hann geysivinsæll,
bæði heima fyrir og erlendis, og það
var ekki fyrr en Cliff Richard náði
hátindinum að Steele þokaðist af
toppnum.
Dagur með Presley
Allt fram á þetta ár var talið að
Elvis Presley hefði aðeins einu sinni
gist Bretland og þá staldrað við á
flugvelli í Prestwick, þar sem ým-
islegt er haft uppi við af því tilefni. Í
útvarpsviðtali í vor skýrði leik-
húsmaðurinn Bill Kenwright frá því
að Presley og Steele hefðu talazt við
í síma 1958 og Presley í framhaldinu
komið til London og eytt þar degi
með Tommy Steele. Steele staðfesti
söguna með semingi og sagðist hafa
heitið Presley því að þegja: „Við vor-
um tveir ungir menn sem elskuðum
báðir tónlist. Ég lofaði að láta aldrei
neitt uppi um þessa samveru okkar
og vona að mér fyrirgefist að sagan
er komin fram í dagsljósið.“ For-
ráðamenn Prestwickflugvallar hafa
krafizt þess að fá í hendur sönn-
unargögn um þessa Lundúnaferð
Presley, að öðrum kosti halda þeir
fast við sérstöðu flugvallarins sem
eini staður í Bretlandi sem Presley
hafi stigið fæti á.
Úr rokki í söngleiki
Þegar Tommy Steele fann á sjö-
unda áratugnum að rokkið var að
fjara út, færði hann sig farsællega
yfir í söngleiki, þar sem hann átti
bæði í West End og á Broadway
ekki síður góðan feril en í rokkinu.
Hann lék líka í kvikmyndum og hélt
vinsældum sínum og vel það, þótt
þær væru með svolítið öðrum blæ en
þegar rokkóðir aðdáendur þyrptust
að honum.
Eitt frægasta söngleikjaframtak
hans er að koma söngleiknum
Syngjandi í rigningunni (Singin’in
the Rain) á svið í West End 1983,
þrjátíu árum eftir að kvikmyndin
var frumsýnd vestanhafs. Þar með
skaut Steele Bandaríkjamönnum ref
fyrir rass, sem létu sér nægja orð
Gene Kelly fyrir því að ekki væri
hægt að setja verkið upp á sviði, þar
sem aðalleikarinn yrði holdvotur í
aðalatriðinu og hann gæti ekki mætt
þannig í næsta atriði!
Tíu árum síðar dró Steele sig í hlé
frá öðrum leikhúsverkefnum en
Kvöldi með Tommy Steele, sem er
sá einleikur sem lengst hefur gengið
á brezku leiksviði. En 2003 birtist
hann aftur sem annar en hann sjálf-
ur, í hlutverki Ebeneezer Scrooge í
söngleiknum Skröggur og endurtók
leikinn á tveimur næstu jólum, fyrst
í Manchester og síðar í London Pal-
ladium. Fyrr á þessu ári, kominn á
72. aldursár, lék hann Dagfinn dýra-
lækni í samnefndum söngleik.
Morgunblaðið/Ómar
Listin Elanor Rigby, stytta gerð af Tommy Steele árið 1982 til heiðurs Bítlunum.
Tommy Steele varð ekki
samur aftur, þegar hann
heyrði tónlist Buddy Holly,
rokkið kom yfir hann, hann
kastaði skifflesöngnum
fyrir róða og gerðist fyrsti
brezki rokkarinn.
Syngjandi sæll og glaður
Í HNOTSKURN
»Á söngferlinum söng Tommy Steele inn á 11 plöturmeð The Steelmen og 22 á sólóferli sínum. Hann lék í
12 kvikmyndum.
»Meðal söngleikja sem Tommy Steele kom fram í viðhvað beztan orðstír og eru ekki nefndir í greininni
eru H.C. Andersen, Half A Sixpence, Cinderella og Some
like it hot.
»Þetta er frá okkur (brezku þjóðinni), sagði ElísabetEnglandsdrottning, þegar hún sæmdi Steele heiðurs-
orðunni OBE.
»Upp úr 1970 skrifaði Steele skáldsögu; The FinalRun, sem fjallar um flóttann frá Dunkirk. Hann skrif-
aði einnig sögu fyrir börn; Quincy, sem var kvikmynduð
1979 og lék Steele þá titilhlutverkið.
»Tommy Steele hefur líka getið sér orð sem málari ogmyndhöggvari og eru frægustu höggmyndir hans
Bermondseystrákurinn og Eleanor Rigby, sem hann
gerði til heiðurs Bítlunum og gaf Liverpoolborg.
»Sjálfsævisaga Steele, Bermondseystrákurinn: Minn-ingar um horfinn heim, kom út 2006.
»Tommy Steele kvæntist Ann Donoghue 1960. Húnvar dansmær frá Yorkshire og þau Steele kynntust
baksviðs í Chiswick Empire. Þau eiga eina dóttur; Emmu
Elizabeth Hicks; f. 27. marz 1969.
© Hulton-Deutsch Collection/CORBIS
Leikarinn Í hlutverki Skröggs á leiksviði í London.