Sjómannadagsblaðið - 01.06.1975, Blaðsíða 43

í litlu hvítu húsi á Oddeyrinni á
Akureyri býr lorenz Halldórsson,
sjómaður ásamt konu sinni. Börnin
eru fyrir löngu komin upp. Það er
orðið langt síðan hann flutti hingað
í þetta hús með konuna og börnin
og þótt húsið sé næstum inn í
miðbænum, þá er hér friðsælt, ró
og friður.
Lorenz er 71 árs að aldri, hann er
fæddur á Eskifirði 1904, en settist
að á Akureyri árið 1927. Lorenz fór
snemma að stunda sjóinn, eða að-
eins 11 ára gamall á opnum bátum
á Eskifirði, en 14 ára gamall fór
hann í siglingar út í heim, er hann
réði sig sem dekksdreng á danska
skonnortu.
Lorenz missti föður sinn aðeins
fimm ára gamall. í þá daga urðu
börnin að bjarga sér sjálf og reyna
að standa á eigin fótum sem fyrst
og ekki síst munaðarleysingj-
ar. Lorenz var eitt ár í burtu í
fyrstu reisunni út í heiminn stóra,
kom síðan heim aftur, en hélt síðan
í siglingar á ný og þá með Norð-
mönnum og síðar sigldi hann á
skipum Eimskipafélags íslands. Svo
kom hann heim og settist að á
Akureyri rúmlega tvítugur að aldri
(23 ára).
Lorenz er kunnur maður á
Akureyri, einkum fyrir afskipti af
félagsmálum, en hann sat um ára-
bil í stjórn Sjómannafélagsins og
sjómannadagsráði. Við hittum
hann að máli á dögunum og erind-
ið var einkum að ræða um Sjó-
mannadaginn á Akureyri, og hann
hafði þetta að segja um störf sin.
Allt nema Bretavinna
— í hana fór ég aldrei.
— Ég kom til Akureyrar árið
1927 og hefi verið hér síðan og hefi
lengst af stundað sjóinn, en unnið í
landi á milli eins og gengur. Mitt
fyrsta starf var að vinna við bygg-
ingu Kristneshælis.
Segja má að ég hafi stundað hér
alla vinnu, nema Bretavinnu. í
hana fór ég aldrei.
Rætt við Lorenz
Halldórsson, sjómann,
sem sat 20 ár í
sjómannadagsráði Akureyrar.
Fór til sjós 11 ára og í
siglingar út í heim 14 ára.
?
Þetta er mynd af Lorenz, þegar hann var í langfartinni (siglingum). Myndin er tekin
árið 1923 í Stokkhólmi. Á myndinni cr hann með tveim skipsfélögum sínum, Lorcnz
er til hægri á myndinni.
SJÓMANNADAGSBLAÐIÐ 33