Morgunblaðið - 16.05.2011, Qupperneq 9

MORGUNBLAÐIÐ MÁNUDAGUR 16. MAÍ 2011
Inga Rún Sigurðardóttir
ingarun@mbl.is
Harpa var hús barnanna og fjöl-
skyldnanna í gær á sérstökum
barnadegi á opnunarhelgi þessa nýja
tónlistarhúss í Reykjavík. Húsið hef-
ur fyllst af lífi en í kringum 32.0000
manns mættu, 10% þjóðarinnar, til
að fylgjast með fjölbreyttri dagskrá,
þar sem popp, rokk og sígild tónlist
fékk að hljóma. Með gestum opn-
unarhátíðarinnar á föstudagskvöld
og flytjendum lætur nærri að 35.000
manns hafi tekið þátt í opnunarhátíð
hússins þessa þrjá daga.
Á meðal þess sem var í boði á
barnahátíðinni voru Maxímús Mús-
íkús-tónleikar með Sinfóníuhljóm-
sveit Íslands en uppselt var á tvenna
tónleika í Eldborg, stóra sal hússins.
Ljóst er að margir fundu „sér skjól
við feiknarstórt hús“ um helgina líkt
og sungið er í laginu um Maxa. Börn-
in trítluðu líka hugfangin um tónlist-
arhúsið rétt eins og músin og voru
fróðleiksfús.
„Það var svo gaman að sjá salinn
fyllast af börnum og fjölskyldum,“
segir Steinunn Birna Ragnarsdóttir,
tónlistarstjóri Hörpu. „Húsið lifnaði
við á nýjan hátt og maður sá þarna
næstu kynslóð í landinu, þá kynslóð
sem mun þykja sjálfsagt að eiga
þetta hús. Hún tók svo vel á móti
húsinu og þá finnst manni það mark-
mið nást að þetta verði hús okkar
allra og næsta kynslóð komi til með
að gera það að sínum vettvangi,“
segir hún og finnst mikilvægt að
börnin hafi sína eigin ástæðu til að
koma í Hörpu. „Eitthvað sem er
hugsað útfrá þeim og fyrir þau,“ seg-
ir hún og vill að öllum börnum í land-
inu finnist þetta vera sitt hús.
„Það var þetta sem lagt var af stað
með í skipulagningu helgarinnar, að
ná til allra þessara hópa og rétta
þeim húsið á þeim forsendum sem
hæfir hverjum hópi fyrir sig. Það er
mikilvægt að það verði ekki bara
breidd í verkefnavali heldur líka not-
endum hússins.“
Hús á hárréttum tíma
Hún segir að neikvæðu raddirnar
séu að hljóðna. „Ég vissi alltaf að það
yrði ekki fyrr en húsið væri opnað og
maður gæti sýnt hvað raunverulega
stæði til með starfseminni, þá
myndu raddirnar verða rólegri og
jákvæðari, og það er nákvæmlega
það sem hefur gerst,“ segir Steinunn
Birna, sem vill að húsið komi öllum
við, það verði eitthvað sem fólk hugsi
jákvætt til. „Ég lít á það sem mína
áskorun að gefa fólki tilefni til þess
að það verði raunin og það komi
hingað sem oftast,“ segir hún en
opnunarhelgin lofar góðu.
Steinunn Birna er að sjálfsögðu
ánægð með þessa miklu aðsókn að
húsinu um opnunarhelgina. „Þetta
er vonum framar. Þó það hafi verið
svona mikil aðsókn var aldrei of
stappað í húsinu, það tekur svo vel
við fjöldanum. Það er ný upplifun að
sjá svona marga ánægða Íslendinga
undir sama þakinu,“ segir hún og
hlær. „Ég held að þetta komi á hár-
réttum tíma því við þurftum eitthvað
til að verða stolt af á réttum for-
sendum.“
Morgunblaðið/Ernir
Barnahátíð Eldborgarsalurinn fylltist af börnum og fjölskyldum á tvennum Maxímús Músíkús-tónleikum.
Trítluðu hugfangin
um tónlistarhús
 Börn og fjölskyldur áttu daginn í Hörpu í gær  32.000
manns sóttu tónlistarhúsið heim á laugardag og sunnudag
Nestistími Yngsta kynslóðin gat skoðað allt tónlistar-
húsið en þar eru næg sæti til að endurnýja kraftana.
Útsýnissvalir Þessi höfðu gott útsýni og voru svo heppin
að hafa sleikjó með sér á tónleikunum.
Sungið og spilað 420 flytjendur úr tónlistar- og grunnskólum Reykjavíkur
komu fram á barnahátíðinni, sem haldin var í Hörpu í gær.