Ljósmæðrablaðið - 15.12.2003, Blaðsíða 4

Ritstjórnarspjall
Síðustu misseri hefur umræðan um aukið val
verðandi foreldra orðið háværari. Umræðan
hefur gegnum tíðina m.a. tengst þáttum eins
og val á fæðingastað sem verður eflaust hitamál
um ókomna tíð. í dag snýst umræðan um aukna
tíðni keisaraskurða og hvort keisaraskurður
skuli vera val verðandi foreldra. Ástæður
þessarar aukningar eru flóknar og umdeildar
en ljósmæður þurfa að blanda sér í umræðuna
sem ábyrgir fagaðilar. Við leggjum áherslu á
að styrkja konur á meðgöngu í því að geta
tekist á við meðgöngu og fæðingu.
En hvað með okkur? Okkar styrkur felst meðal
annars í því að sýna samstöðu og láta í okkur
heyra varðandi þessa þróun. Við verðum að
velta því fyrir okkur og hafa söguna að
leiðarljósi í því sambandi hvernig starfssvið
okkar hefur breyst gegnum tíðina og hvernig
breytingar á hugmyndafræði hafa mótað stöðu
ljósmæðra. Vissulega mun áframhaldandi
aukning keisaraskurða sem sumir hafa líkt við
faraldur hafa áhrif á okkar starfsvettvang og
sjálfstæði. Utkoma og mat á árangri í meðgöngu
og fæðingu er órjúfanlegur þáttur í nútíma
heilbrigðisþjónustu sem þarf að vera í stöðugri
endurskoðun. Árangur og útkoma eru hins
vegar hugtök sem þarf að skoða í víðu samhengi
bæði á grundvelli huglægra og hlutlægra þátta.
Einnig þurfum við í okkar litla samfélagi að
horfa á lengri tímabil en ár í senn þegar þessi
umræða á sér stað þar sem hvert einstakt tilvik
getur breytt heildarmynd í tölffæðilegri túlkun
á niðurstöðum.
Þessar vangaveltur tengjast nýafstaðinni
ráðstefnu sem haldin var á vegum
fræðslunefndar félagsins í samvinnu við nám
í ljósmóðurfræði. Þar var aðalfyrirlesari Ina
May Gaskin ljósmóðir. Áhersla hennar á að
styrkur ljósmóðurinnar felist m.a í innsæi og
næmni hvetur okkur til að huga að þeirri
hugmyndafræði sem hefur verið grunnur í
starfi ljósmóðurinnar. Það efni sem nú birtist
í blaðinu tengir okkur einmitt við söguna en
nú birtist ritrýnd grein urn tvíburafæðingar þar
sem sótt er í viskubrunn Þórunnar Á.
Björnsdóttur sem einmitt byggði færni sína á
þessum þáttum. Við látum hugann reika út
fyrir landsteinana og kynnumst störfum
íslenskrar ljósmóður í Súdan. Einnig verður
vaffað um vefinn því kynnt verður til sögunnar
ljósmóðirin á veraldarvefnum þ.e. ljosmodir.is
Þar sem senn líður að jólum er vel við hæfi að
ein greinin sé frásögn ljósmóður á
landsbyggðinni um minnisstæðar fæðingar á
jólum og í framhaldi af því óskum við
ljósmæðrum gleðilegrar hátíðar og velfamaðar
á komandi ári.
F.h. ritnefndar,
Helga Gottfreðsdóttir og
Anna Sigríður Vernharðsdóttir
QLjósmæðrablaðið
Desember 2003