Litli Bergþór - 01.06.1993, Blaðsíða 8

Kórastarf
Landsmót barnakóra 24.-25. apríl 1993
Þann 24. apríl s.l. var haldið Landsmót barnakóra
í Laugardagshöllinni. í mótinu tóku þátt alls 32
kórar, flestir af höfuðborgarsvæðinu en 6 voru utan
af landi. Barnakór Biskupstungna, nemendur 4., 5.
og 6. bekkjar, tók þátt í mótinu og fylgdu þeim 3
mæður auk Hilmars.
Fyrir mótið voru mæðurnar búnar að skipuleggja
vel og vandlega þá dagskrá sem skyldi vera báða
dagana sem kórinn var í Reykjavík og var mjög gott
að hafa alla hluti sem snéru að börnunum algerlega
Frá landsmóti barnakóra.
á hreinu og fyrirfram ákveðna. Því fór ekkert
úrskeiðis nema, að heldur seinkaði að börnin kæmu
heim á sunnudeginum.
Undirrituð mætti í Laugardalshöll rétt fyrir
tónleikana og náði því að komast í nálægð við
börnin greiða þeim og dást að þeim.
Á slaginu 15 byrjuðu tónleikarnir, og þvílíkur
unaður að fá að njóta þeirra.
Þarna voru saman komin 1000 grunnskólabörn frá
10 ára aldri og sungu sig inní hjörtu þeirra sem
viðstaddir voru og einnig þeirra sem hlustuðu á
útvarpið því tónleikunum var útvarpað beint á rás 1.
Ég hef aldrei verið á eins fallegum og hrífandi
tónleikum og þessum og mér finnst það synd að
hinir foreldrarnir 12 héðan úr Biskupstungum sem
áttu börn þarna skyldu missa af því að njóta
áhrifanna sem við hin fengum.
Því hvet ég alla, til að koma næsta ár þegar
haldið verður samskonar Landsmót barnakóra.
Börnin sungu í fyrsta sinn með Sinfóníuhljómsveit
íslands undir stjórn Jóns Stefánssonar. Þeim var
skipt upp í þrjú getu og aldursstig og sungu því fyrst
í þremur hópum, en í hverjum voru um 350 börn og
söng hver hópur 4 lög. Að lokum sungu allir
hóparnir saman fjögur lög og var það hápunktur
skemmtunarinnar.
Eftir tónleikana var haldin skemmtun fyrir kórana.
Ég vil geta þess að börnin okkar voru sjálfum sér,
Hilmari og okkur foreldrum til sóma. Þau héldu
hópinn á meðan nauðsyn var, og þau hlýddu öllum
reglum og skipunum sem komu frá stjórnendum
skemmtunarinnar. Þau komu líka með mjög gott
skemmtiatriði, en ekki voru margir hópar sem gerðu
það. Reyndar voru þeir fáir. En auðvitað átti
Hilmar mestan þátt í því hve vel tókst til með
sönginn og skemmtiatriðið.
Ég vil líka geta þess að okkar kór var sá eini í
salnum sem var hrósað fyrir það hve stillt þau voru
og var reglulega gaman að fá slíkt hrós.
Það var líka gaman að fylgjast með því hve vel
krakkarnir héldu saman og hvernig þau sáu til þess
að allir hefðu gaman af því sem var að gerast, hvort
sem það var söngur dans eða leikur.
Á sunnudeginum sungu börnin í Perlunni og voru
þar í beinni útvarpsútsendingu. Þá sungu þau ein
undir eigin kórnafni og gerðu það mjög vel.
Það var gaman að taka á móti börnunum í
Reykholti þegar þau komu þreytt en glöð og stolt
heim. Á þessari helgi sá ég mikilvægi þess að
halda áfram á þeirri braut sem Hilmar Örn hefur rutt
með því að koma hingað í Biskupstungurnar til
starfa með börnunum. Það starf má ekki letja eða
skemma hvorki með úrtölum né ósætti. Gerum allt
sem hægt er til að halda áfram að styrkja tónlistarlíf
hér í Tungunum.
D.K.
Raflagnir - Viðgerðir
Sumarbústaðaeigendur athugið að ég sæki
um öll leyfi fyrir heimtaug að
sumarhúsum og lagningu raflagna.
Tek að mér nýlagnir, hönnun raflagna og alla
almenna rafvirkjavinnu ásamt tækjaviðgerðum.
Efnissala og varahlutaþjónusta.
Fljót og góð vinna.
Jens Pétur Jóhannsson
LÖGGILTUR RAFVERKTAKI
LAUGARÁSI, BISKUPSTUNGUM
Merki
Heimasími 98-68845
Verkstæði sími 98-68984
Bílasími 985-37101
LitTi - bergþór 8