Læknablaðið - 15.11.1987, Page 66

410
LÆKNABLAÐIÐ
Reksturskostnaður vaktarinnar er um 1.200.000
krónur á mánuði. Framundan eru viðræður við
samninganefnd sjúkratrygginga um hugsanlegan
áframhaldandi rekstur vaktarinnar á vegum
lækna en núgildandi samningur rennur út 15.
nóv. n.k.
Á aðalfundi félagsins, sem haldinn var 29. júní sl.
var m.a. samþykkt að halda rekstri áfram á
vegum sameignarfélagsins að því tilskildu, að
nauðsynlegar breytingar á núgildandi samningi
næðust í þeim viðræðum, sem að ofan greinir.
Núverandi stjórn félagsins skipa: Gunnar Ingi
Gunnarsson, formaður, Leifur N. Dungal,
Halldór Jónsson, Gunnar Helgi Guðmundsson,
Björn Guðmundsson og Sigurður Örn
Hektorsson. Vaktstjóri er Magnús R. Jónasson
og framkvæmdastjóri er Páll Þórðarson.
ORLOFSNEFND
Eins og kunnugt er eiga læknafélögin nú þrjá
sumarbústaði og tvær orlofsíbúðir. Það eru tveir
bústaðir í Brekku i Biskupstungum og einn við
Hreðavatn. íbúðirnar eru á Akureyri og í
Reykjavík. íbúðin í Reykjavík var illa nýtt fyrstu
mánuðina, en nú í sumar er bókað á flestar
vikurnar. íbúðin á Akureyri er vel nýtt eins og
áður.
Nýting á sumarbústaðnum við Hreðavatn er mjög
góð yfir sumarmánuðina en hann var lokaður í
allan vetur þar sem ekki var búið að ganga frá
frostheldum vatnslögnum. Stendur þetta til bóta.
Framkvæmdir hafa verið í kringum bústaðinn í
vor og búist er við að innan örfárra ára verði
kominn þarna sælureitur.
í Fréttabréfi lækna nr. 6/1987 skrifaði ritstjóri
Fréttabréfsins ítarlega lýsingu á öllum
bústöðunum og eru væntanlegir leigjendur hvattir
til að lesa þær. Ekki eru í bígerð kaup á nýjum
bústöðum að sinni, þótt ýmsar hugmyndir hafi
verið á lofti.
NÁMSKEIÐS- OG FRÆÐSLUNEFND
Haustnámskeið var haldið í Domus Medica
dagana 24.-28. sept. 1986. Að þessu sinni skiptist
námskeiðið í tvo hluta. Annars vegar var fjallað
um slys og ofnæmi en hins vegar var haldið
sérstakt 2ja daga stjórnunarnámskeið fyrir
lækna.
Fyrri hluta námskeiðsins sóttu um 50 læknar. Var
að nokkru leyti brugðið út af hefðbundnu
fyrirlestraformi og fjallað um verkefnin í hópum.
Gaf það góða raun og ýtti undir umræður. Níu
læknar fluttu fyrirlestra eða stjórnuðu
umræðum, og kann nefndin þeim bestu þakkir
fyrir.
Takmarka varð þátttakendafjölda á
stjórnunarnámskeiðið við 25 manns og komust
því færri að en vildu. Námskeiðið var því
endurtekið í nóvember og aftur í marsmánuði.
Fjórða stjórnunarnámskeiðið var svo haldið á
Akureyri á vordögum í samvinnu við Læknafélag
Akureyrar. Var almenn ánægja með þessi
námskeið en umsjón þeirra var í höndum
Höskuldar Frímannssonar, viðskiptafræðings og
læknanna Högna Óskarssonar og Guðjóns
Magnússonar. Gæti orðið framhald á þessum
námskeiðum síðar.
í marsmánuði stóð Fræðslunefndin að málþingi á
Hótel Loftleiðum um einkenni alnæmis í
samvinnu við Tannlæknafélag íslands. Auk
íslenskra fyrirlesara var dönskum lækni, dr.
Pindborg, boðið til þingsins, og flutti hann erindi
um munnholseinkenni alnæmis. Um 100 manns
sóttu þingið.
í maímánuði voru staddir hér á landi 2 helstu
forsvarsmenn Svía í alnæmisvörnum. Af því
tilefni boðaði Fræðslunefnd heilsugæslulækna í
Reykjavík og fleiri aðila til fundar með þeim í
Domus Medica. Um 20 manns mættu.
Af öðrum störfum nefndarinnar má nefna
úthlutun styrkja til fræðslustarfsemi á vegum
svæða- og sérgreinafélaga en fé til þess fær
nefndin frá Námsjóði lækna. í ár var nokkuð
fleiri styrkjum úthlutað en undanfarin ár og
bendir það til grósku í starfi þessara félaga. Eins
og endranær eru það þó einkum stærri
svæðafélögin, sem notfæra sér þennan stuðning
Námsjóðsins.
SIÐANEFND
Hjá Siðanefnd liggur óafgreidd frá fyrra ári kæra
heilsugæslulæknis á hendur starfsbróður vegna
ósanninda í tengslum við mál, sem Siðanefnd
hafði fjallað um.
Einnig er Siðanefnd með til umfjöllunar erindi frá
hæstaréttarlögmanni hér í borg um, hvort
umsagnir tiltekins læknis um tvö vottorð séu í
samræmi við siðareglur félagsins.
GERÐARDÓMUR
Þann 29. apríl sl. kvað Gerðardómur skv. Codex
Ethicus L.í. upp sinn fyrsta úrskurð, eftir að
lögum L.í. var breytt 1978 og hann varð eingöngu
áfrýjunardómstóll vegna úrskurða Siðanefnar.