Morgunblaðið - Sunnudagur - 27.01.2013, Blaðsíða 9
27.1. 2013 MORGUNBLAÐIÐ SUNNUDAGUR 9
Rannsóknir sýna að notkun sykurlauss Extra eykur
munnvatnsframleiðslu, jafnar sýrustig, heldur
tönnunum hreinum og stöðvar sýklaárásir á þær.
Extra minnkar upptöku hitaeininga og dregur
það úr streitu í amstri hversdagsins.
Blær og Blær
NAFNIÐ BLÆR HLJÓMAR NÚ KUNNUGLEGA Í EYRUM EFTIR AÐ DÓMSMÁL BLÆVAR
BJARKARDÓTTUR UM AÐ FÁ AÐ BERA NAFNIÐ KOMST Í HÁMÆLI. SUNNUDAGSBLAÐ
MORGUNBLAÐSINS FÉKK PILTINN BLÆ OG STÚLKUNA BLÆ OG TIL AÐ SEGJA FRÁ NAFN-
INU SÍNU. FRÆG ER KVENPERSÓNAN BLÆR Í BREKKUKOTSANNÁL EN MANNANAFNA-
NEFND TELUR NAFNIÐ ÞÓ HÆFA KARLI EN EKKI KONU. ORÐIÐ BLÆR VARÐ Í 7.SÆTI YFIR
FEGURSTU ORÐ ÍSLENSKRAR TUNGU Í SAMKEPPNI SEM EFNT VAR TIL Á NETINU 2007.
FIMM EINSTAKLINGAR BERA NAFNIÐ Í ÞJÓÐSKRÁ OG 101 HEFUR ÞAÐ SEM SÍÐARA NAFN.
AÐ MINNSTA KOSTI NÍU KONUR NOTA NAFNIÐ EN FÁ ÞAÐ EKKI SKRÁÐ Í ÞJÓÐSKRÁ.
Það var enginn vafi í huga
hjónanna Elíasar
Georgssonar og Birnu Ýrar
Thorsdóttir þegar kom að
skírn fyrsta sonarins. Þeim
fannst orðið blær bæði
merkilegt orð og flott nafn.
Blær Elíasson er næstelstur fjögurra systkina sem öll
heita fornum íslenskum einsatkvæðisnöfnum. Elst er
Mist og yngri eru tvíburarnir Gnýr og Gná.
Blær stundar nú nám í Fjölbrautaskóla Suðurnesja.
Hann er sá eini á Suðurnesjum sem hefur Blær sem
einnefni eða fyrra nafn, en í skólanum þekkir Blær
nemanda sem hefur Blær sem seinna nafn.
Blær segist ákaflega stoltur af nafninu sínu. „Mér
finnst gott að það er einstakt,“ segir Blær sem alltaf
hefur verið sá eini í sínu samfélagi sem hefur borið
nafnið. „Þetta er líka stutt nafn og það er fallega bor-
ið fram.“ Hann segir fólk þó stundum hvá við fyrstu
kynni og að það sé ekki óalgengt að hann þurfi að
segja nafnið sitt aftur þegar hann er spurður að
nafni.
Þótt kostirnir séu fleiri telur hann til þann galla á
nafninu hversu mörg orð ríma við það, sennilega fleiri
en gengur og gerist með mannanöfn, og það hafi
skólafélagar hans í grunnskóla nýtt sér óspart. „Ég
myndi segja að það væri eini gallinn við nafnið.
Krakkarnir voru svolítið mikið að láta nafnið mitt
ríma við hin ýmsu orð,“ segir Blær.
Við snúum samtali okkar að Blævi Bjarkardóttur
sem nú stendur í málaferlum vegna nafns síns, þar
sem mannanafnanefnd hafði úrskurðað nafnið karl-
mannsnafn þegar hún var skírð og gefið nafn. Blær
segist reyndar ekki hafa fylgst mikið með málinu.
„En mér finnst ekki sanngjarnt að fólk þurfi að berj-
ast fyrir nafni sínu. Ég hef ekkert á móti því að
stelpur beri þetta nafn, en mér finnst blær samt vera
karlkynsorð,“ segir Blær.
Morgunblaðið/Svanhildur Eiríksdóttir
Karlmannsnafn
Hér er Blær
Um Blæ
Frá Blæ
Til Blæs
Ekki sanngjarnt að
þurfa að berjast
fyrir nafni sínu
Blær Bjarkardóttir heitir
eftir Blævi í Brekkukots-
annál eftir Halldór Lax-
ness, þeirri ægifögru snót.
Hún segir móður sína,
Björk Eiðsdóttur, hafa
heillast af Blævar nafninu
og verið búna að ákveða að eignaðist hún dóttur myndi
hún skíra hana því nafni – löngu áður en Blær kom í
heiminn.
Blær, sem er 15 ára, kveðst lítið hafa velt nafninu fyr-
ir sér framan af ævinni en hún bjó í Bandaríkjunum frá
sex til tíu ára aldurs. „Þetta var lítið til umræðu þar en
þó þurfti ég alltaf að muna, þegar við vorum að ferðast,
að ég hét „Stúlka“ í vegabréfinu. Einu sinni lentum við í
hálfgerðum vandræðum á flugvelli í Bandaríkjunum,
starfsmaður í vegabréfsskoðun vildi vita hver í hópnum
væri „Stulka“ og ég svaraði engu þar til mamma hnippti
í mig. Það hefur eflaust vakið grunsemdir, eftir það var
mér kennt að svara ef „Stulka“ var nefnd.“
Blær kveðst aldrei hafa orðið fyrir óþægindum hér
heima vegna nafnsins. Henni er ljóst að það er algeng-
ara karlmannsnafn en það truflar hana ekki. „Flestum
sem ég þekki þykir nafnið mjög kvenlegt og finnst fá-
ránlegt að ég fái það ekki staðfest í þjóðskrá,“ segir
Blær sem fundið hefur fyrir miklum stuðningi við bar-
áttu sína fyrir því að fá að heita Blær í opinberum plögg-
um. Niðurstöðu er að vænta fyrir lok mánaðarins og
verði hún óhagstæð munu Blær og móðir hennar fara
með málið lengra. „Ég ætla að heita Blær áfram!“
Blær kannast við einn ungan dreng sem heitir Blær
og með henni í Hlíðaskóla er piltur sem heitir Birkir
Blær. Blær er mun algengara seinna en fyrra nafn hjá
drengjum. Hún hefur fyrir vikið litla reynslu af því að
umgangast nafna sína af hinu kyninu. Spurð hvort hún
gæti hugsað sér að eiga síðar meir kærasta að nafni
Blær skellir Blær upp úr. „Nei, ég vona að það gerist
ekki. Það yrði bæði skrítið og vandræðalegt.“
Kvenmannsnafn
Hér er Blær
Um Blæ
Frá Blævi (eða Blæ)
Til Blævar (eða Blær)
Morgunblaðið/Kristinn
Vonandi verður
kærastinn ekki
nafni minn!