Fréttablaðið - 19.09.2013, Qupperneq 62

19. september 2013 FIMMTUDAGUR| SPORT | 54
KÖRFUBOLTI Að fylgjast með
íþróttakappleikjum í Banda-
ríkjunum fer í taugarnar á mörgum.
Ástæðan er fjöldi auglýsingahléa en
hann þykir oft meiri en góðu
hófi gegnir.
Nú hefur NBA-liðið
Sacramento Kings ákveðið
að brjóta sig út úr þessu
formi og mun vera með
beina útsendingu frá leik
án auglýsingahléa. Það
þykir afar fréttnæmt.
Sacramento var næst-
um búið að missa liðið til
Seattle í sumar en hélt því
á endanum. Því ætla menn í
Sacramento að fagna meðal
annars með þessum auglýsinga-
lausa leik.
Í stað auglýsinga verður
sýnt frá áhorfendunum
og því sem er að gerast í
höllinni. Eigendur Kings
eru að reyna að koma
til móts við stuðnings-
menn, sem eðli málsins
samkvæmt eru ekkert
sérstaklega ánægðir með
eigendurna því þeir íhuguðu
að flytja liðið.
- hbg
Körfuboltaleikur án sjónvarpsauglýsinga
HANDBOLTI „Þetta gerðist mjög
snemma í leiknum. Ég fiskaði
ruðning og fékk þá olnboga í and-
litið. Ég ligg aðeins á vellinum
en þegar ég stend upp finnst mér
tennurnar í mér vera skakkar. Þá
ákvað ég að fara af velli,“ segir
Arnór Þór Gunnarsson þar sem
hann lá á sjúkrabeði í Þýskalandi.
Þar þarf hann að liggja fram að
helgi enda þurfti hann að fara í
aðgerð eftir að hafa kjálka brotnað
í leik gegn Wetzlar.
„Læknar Bergischer sögðu mér
að það væri allt í fínu lagi með
tennurnar á mér. Þá spurði ég af
hverju bitið væri svona vitlaust? Á
spítalanum sást brotið ekki á rönt-
genmyndum. Það var ekki fyrr en
þeir tóku sneiðmynd sem brotið
sást. Þetta er í innanverðum kjálk-
anum og er talsvert brot.“
Mjög svekkjandi
Þessi meiðsli munu gera það
að verkum að Arnór Þór mun
ekki geta leikið með liði sínu,
Bergischer, í tvo og hálfan mánuð.
Hann má þó fara að hlaupa og lyfta
strax í næstu viku.
„Það er gríðarlega leiðinlegt að
detta svona út. Í fyrra vorum við
tveir að skipta með okkur horna-
mannsstöðunni en ég hef átt hana
í vetur og verið að spila vel. Það er
ekki síst leiðinlegt þar sem liðinu
hefur gengið gríðarlega vel. Ég
vonast samt til þess að byrja að
spila fyrr en læknarnir segja.“
Þar hitti Arnór naglann á höfuðið
en lið hans hefur komið allra liða
mest á óvart í deildinni í vetur.
Það tapaði með tíu marka mun
gegn meisturum Kiel í fyrstu
umferð og hefur síðan unnið fjóra
leiki í röð. Þar af var sannfærandi
sjö marka sigur gegn Meistara-
deildarmeisturum Hamburg.
Björgvin alveg frábær
Bergischer er nýliði í þýsku úrvals-
deildinni en liðið vann B-deildina
nokkuð sannfærandi síðasta vetur.
„Við erum með hörkulið. Þetta
var eiginlega nýtt lið í fyrra og
nú þekkjumst við betur og spilum
betur. Þetta hefur svo eiginlega allt
gengið upp það sem af er vetri,“
segir Arnór en hann hrósar félaga
sínum Björgvini Páli Gústavs syni,
sem virðist vera að finna sitt fyrra
form.
„Bjöggi er búinn að vera virki-
lega góður og það hefur heldur
betur munað um frammistöðu
hans. Við erum að spila frábæra
vörn og Bjöggi hefur verið í stuði
þar fyrir aftan. Fyrir vikið erum
við að fá auðveld hraðaupphlaups-
mörk.“
Lykilleikmaður liðsins er þó
hinn ólseigi Austurríkismaður
Viktor Szilagyi. Hann hefur farið
algjörlega á kostum og er að skora
sjö til átta mörk í leik.
„Hann hefur verið algjörlega frá-
bær. Hann stjórnar öllu hjá okkur
og kann þetta allt saman. Það
munar um svona menn. Svo erum
við líka með fleiri góða menn. Það
er fín blanda í þessu liði og allir eru
að ná virkilega vel saman.“
Þrátt fyrir gott gengi í upphafi
móts eru leikmenn liðsins ekkert
að missa sig.
„Markmiðið hjá okkur er enn það
sama og áður. Það er að halda sæti
okkar í deildinni. Þessir punktar
sem eru komnir verða ekki teknir
af okkur og gætu vegið þungt. Við
erum líka bjartsýnir enda eigum
við góða möguleika í næstu leikjum
sem eru gegn Melsungen, Minden
og Balingen. Þetta eru allt leikir
sem við getum unnið,“ segir Arnór
en lið hans er í fjórða sæti deildar-
innar með jafnmörg stig og lið
Dags Sigurðssonar, Füchse Berlin.
„Það er mikil stemning í bænum
og við leikmenn fáum ekki eins
marga miða til þess að gefa nú og
í fyrra. Það var uppselt bæði gegn
Kiel og Eisenach hjá okkur og
verður líklega þannig áfram.“
Arnór sló eftirminnilega í gegn
með landsliðinu á HM í janúar.
Hann segir að eitt af því jákvæða
við meiðslin væri að þau hefðu
komið núna. Hann væri því búinn
að jafna sig talsvert fyrir EM í
Danmörku.
„Aron landsliðsþjálfari er búinn
að hringja í mig og athuga með
stöðuna. Ég hef auðvitað mikinn
metnað fyrir því að halda mér í
landsliðinu. Það var frábært að
spila á HM og það er mesti heiður
sem manni getur hlotnast að spila
fyrir Ísland. Vonandi fæ ég tæki-
færi til þess að spila með liðinu á
EM.“
henry@frettabladid.is
Fannst tennurnar vera skakkar
Landsliðsmaðurinn Arnór Þór Gunnarsson mun ekki geta leikið með spútnikliði þýsku úrvalsdeildarinnar í
handknattleik, Bergischer, næstu mánuði þar sem hann kjálkabrotnaði í leik um síðustu helgi. Mikið áfall
fyrir norðanmanninn sem hafði verið að spila frábærlega í sínum fyrstu leikjum í bestu deild í heimi.
MIKIL AÐGERÐ Arnór fer heim af spítalanum á morgun. Á meðan verður hann að
ligga í rúminu og nærast á súpum. MYND/AÐSEND
FRAMTÍÐARMAÐUR Arnór hefur bætt leik sinn mikið síðustu ár. Hann fékk tækifæri með landsliðinu á HM á Spáni þar sem
hann átti eftirminnilegar innkomur. FRÉTTABLAÐIÐ/VILHELM
FÓTBOLTI Eftir nokkuð magurt gengi
í atvinnumennskunni undanfarin ár
er Guðlaugur Victor Pálsson á mikilli
uppleið.
Hann hefur farið á kostum með
liði sínu, NEC, í hollensku úrvals-
deildinni upp á síðkastið og í tvígang
verið valinn í lið umferðarinnar í
deildinni.
Hann hefur einnig skorað í
tveimur leikjum í röð og er marka-
hæstur í liði NEC ásamt öðrum leik-
manni liðsins.
Þrátt fyrir þetta góða gengi upp
á síðkastið hefur Guðlaugur Victor
ekki hlotið náð fyrir augum lands-
liðsþjálfarans, Lars Lagerbäck, en
Lagerbäck hefur aldrei valið Guðlaug
í hóp hjá sér.
„Ef ég á að vera heiðarlegur þá
finnst mér það skrítið að hafa ekki
fengið kallið. Ég spilaði með öllum
yngri landsliðum Íslands og er núna
að spila með góðu liði í sterkri
deild,“ sagði Guðlaugur í viðtali við
NEC Today.
„Að sjálfsögðu er þetta alltaf
ákvörðun þjálfarans en það er
draumur minn að spila fyrir lands-
liðið. Ég mun halda áfram að gera
mitt besta og það væri frábært ef ég
fengi kallið.“ - hbg
Finnst skrýtið að hafa ekki verið valinn í landsliðið
GUÐLAUGUR VICTOR PÁLSSON
FÓTBOLTI KR getur með sigri á
Blikum orðið Íslandsmeistari
í knattspyrnu karla í kvöld.
Leikurinn er hluti af 16. umferð
Pepsi-deildarinnar en liðin mætt-
ust 18. ágúst á Kópavogsvelli.
Flauta þurfti leikinn af eftir að
Elfar Árni Aðalsteinsson, leik-
maður Blika, rotaðist eftir aðeins
þriggja mínútna leik.
KR er í efsta sæti deildarinnar
með 46 stig, fimm stigum á undan
FH-ingum. Takist KR-ingum að
vinna Blika í kvöld verður liðið
með 49 stig þegar liðin í öðru og
þriðja sæti deildarinnar eiga bara
tvo leiki eftir af tímabilinu.
KR varð síðast Íslandsmeistari
árið 2011 en FH-ingar náðu í titil-
inn á síðustu leiktíð. Leikmenn
KR ætla sér eflaust að klára
mótið á Kópavogsvelli í kvöld en
leikurinn hefst klukkan 17.00.
KR getur því landað sínum 26.
Íslandsmeistaratitli í kvöld.
- sáp
KR meistari
í 26. sinn?
FIMLEIKAR Fimleikasamband
Íslands mun flytja stúku til
landsins vegna Evrópumeistara-
mótsins í hópfimleikum sem fer
fram hér á landi eftir 389 daga.
Mótið verður haldið í frjáls-
íþróttahöll Laugardalshallar þar
sem stúkunni verður komið fyrir.
Hún mun rúma 4.280 manns í
sæti. Reiknað er með um eitt þús-
und keppendum frá tuttugu lönd-
um. Fimleikasambandið reiknar
þess utan með um 2.000 erlendum
gestum vegna mótsins.
„Þar sem viðburðurinn fer
fram í október er hann frábær
viðbót við ferðamannaiðnaðinn
á Íslandi, sem hefur verið í stöð-
ugri sókn undanfarið, og er til
þess fallinn að brúa bilið frá
sumar lokum fram að Airwaves-
tónlistarhátíðinni,“ segir í til-
kynningu frá FSÍ.
Kvennalandslið Íslands vann
gullverðlaun í Svíþjóð 2010 og
Danmörku 2012 og á því titil
að verja. Í keppnunum tveimur
á undan vann liðið til silfur-
verðlauna.
Vinna við skipulagningu móts-
ins er á áætlun og á dögunum
lauk vinnu við merki mótsins.
Merkið hefur skírskotun til
náttúru Íslands; eldfjalla, norður-
ljósa og hafsins sem umlykur
landið. Það er hannað af Rakel
Tómasdóttur og má sjá hér að
neðan. - ktd
Risastúka
til landsins
EVRÓPUMEISTARAR Kvennalandsliðið
í hópfimleikum. FRÉTTABLAÐIÐ/ANTON
SPORT