Læknablaðið - 01.04.2015, Qupperneq 39

LÆKNAblaðið 2015/101 223
U M F J Ö L L U N O G G R E I N A R
Eftir harðan vetur á friðlandinu góða, Íslandi, er ráð að hita sig
aðeins upp fyrir sumar að fjallabaki og rifja upp hvaða fjörefni er
þar að finna.
Friðland að Fjallabaki var friðlýst árið 1979. Tilgangur friðlýsingar
er að varðveita sérstök landsvæði þannig að komandi kynslóðir hafi
tækifæri til að njóta þeirra á sama hátt og við gerum. Fjölbreytt
landslag, sérstakt en viðkvæmt lífríki, öræfaauðn og kyrrð eru megin-
einkenni Friðlands að Fjallabaki. Litadýrð er mikil, m.a. fyrir líparít
og hrafntinnu í fjöllum.
af vef Umhverfisstofnunar, ust.is
Í Jökulgili að fjallabaki, í suðaustur útfrá Landmannalaugum
að Torfajökli, eru Barmur og Hábarmur austan við gilið en að
vestanverðu eru Grænagil og Brandsgil, hrikaleg og litskrúðug.
Fjöllin þarna eru úr ríólíti og innbökuð með brennisteini og
öðrum jarðfræðilegum kræsingum. Innst í gilinu er fjallið Hattur
og fjær eru Torfajökull, Kaldaklofsjökull og Reykjafjöll. Undir-
leikari er Jökulgilskvísl sem ólmast um gilið þegar verst lætur
og er haldið frá Landmannalaugum með varnargörðum. Hattver
heitir þessi paradís og er sannarlega utan alfaraleiðar og hvers
kyns þjónustusvæðis. Svæðið tekur til kostanna allan skilning
og vitund mannsins , - líka málskilning. Hvað er ver? Húnaver,
eggver, kvikmyndaver, sængurver, Hattver eða álver?
Ólafur Örn Haraldsson skrifaði Árbók Ferðafélags Íslands árið
2010 og hún heitir Friðland að Fjallabaki. Í bókinni er allt sem
einn ferðalangur þarf í veganesti um þessar slóðir.
Védís
Einn algrænasti bletturinn að fjallabaki, þangað komast bara fuglinn fljúgandi og göngumenn á tveimur jafnfljótum. Myndina tók Engilbert Sigurðsson árið 2014.
Friðland að F/fjallabaki - Hattver