Húnavaka - 01.05.1981, Blaðsíða 93

HÚNAVAKA
91
fjöri um árabil. Þar þreyttu menn mælskulist af miklu kappi og ræddu
margs konar mál svo sem ýmis þjóðmál, sveitarmálefni og fleiri
hugðarefni. Félagið gaf út handskrifað blað, sem nefndist Ingimundur
gamli, og var margt merkilegt þar að finna bæði í bundnu og óbundnu
máli. Fjöldi manna skrifaði í blaðið og var það lesið upp á fundum
félagsins. Seinna var félaginu breytt í ungmennafélag, sem nefndist
Umf. Vatnsdælingur. Tók það við útgáfu Ingimundar gamla og hélt
uppi málfundum í svipuðum stíl og fyrirrennari þess. Starfaði það
með prýði um áratuga skeið.
Ungmennafélagið lét mörg framfara- og menningarmál sveitar-
innar til sín taka, þar á meðal byggingu samkomuhúss. Var í fyrstu
deilt hart um staðsetningu þess, en niðurstaðan varð að húsið skyldi
byggt að Ásbrekku. Hreppurinn lagði til verulegt fjármagn, en stór
hiuti verksins var unninn í sjálfboðavinnu.
Húsið var byggt sumarið 1935 og vígt sunnudaginn í 15. viku
sumars. Var það síðan venja í fjöldamörg ár að halda aðalskemmtun
sumarsins að Ásbrekku á 15. helginni. Það er verslunarmannahelgin,
sem í þá daga náði lítið eða ekkert út fyrir raðir verslunarmanna. Þetta
voru mjög eftirsóttar skemmtanir og fólkið beið þeirra með mikilli
eftirvæntingu, ekki aðeins Vatnsdælingar heldur þyrptist fólk að úr
öllum áttum. Stundum tók húsið ekki allan þann fjölda, en þá var
dansað úti á palli, ef veður var gott, og svo var fólkið úti um allt. Þarna
var fagurt um að litast og umhverfið hafði upp á margt að bjóða.
Allir helstu fundir í sveitinni voru haldnir í samkomuhúsinu og
farskólinn var þar einnig oft til húsa þangað til Húnavallaskólinn
leysti hann af hólmi. Eftir að veiðimannahúsið Flóðvangur var byggt
1964 voru skemmtisamkomurnar færðar þangað og þá í samvinnu við
Þingbúa. Sama er að segja um mörg meiriháttar veisluhöld og fleira.
Nú er svo komið að flestar skemmtisamkomur fara fram í hinum stóru
og fullkomnu félagsheimilum svo sem á Blönduósi og í Húnaveri. Það
er nýi tíminn í öllu sínu veldi.
En þrátt fyrir miklar og hraðfara breytingar spila menn enn í
Vatnsdal og ég vona að það haldist um ókomin ár.