Árbók Hins íslenzka fornleifafélags - 01.01.2009, Side 61

60 ÁRBÓK FORNLEIFAFÉLAGSINS
Reykjavík og var athöfn í Alþingishúsinu eftir á einnig útvarpað. Þar
að auki var komið fyrir tveimur gjallarhornum á Alþingishúsinu, en
mikill mannfjöldi hafði safnast saman fyrir utan kirkjuna og í næsta
nágrenni.115 Samdægurs var ýtarlega greint frá jarðarförinni í fréttum
Ríkisútvarpsins en ekki var tekið fram að það væri í fyrsta skipti sem
slík athöfn var send út.116 Þá var jarðarför Tryggva Þórhallssonar banka-
stjóra og fyrrverandi forsætisráðherra útvarpað 10. ágúst sama ár. Sent
var frá Dómkirkjunni, þinghúsinu og Búnaðarfélagshúsinu.117
Jónas Þorbergsson átti frumkvæði að því að fyrsta jarðarförin var
send út og að það væri á vegum útvarpsins. Í bréfi til útvarpsráðs,
dagsett 26. mars 1935, segir hann meðal annars: „Tel eg einsætt að
Ríkisútvarpinu beri að sýna slíka sæmd minningu þess manns, sem svo
mjög var þjóðkunnur og hefir tekið svo mikinn þátt í stjórnmálum og
starfi þjóðarinnar“.118 Ennfremur lagði Jónas til í bréfi sínu að mótaðar
yrðu reglur um hvenær bæri að útvarpa jarðarförum þjóðkunnra
einstaklinga. Ráðið taldi sér hins vegar ekki fært að setja neinar slíkar
reglur heldur yrði það að fara eftir því sem við ætti í hvert skipti.119
5. mynd. Útför Jóns Þorlákssonar fyrrv. forsætisráðherra frá Dómkirkjunni í Reykjavík
28. mars 1935. Þetta var fyrsta útvarpsjarðarförin. Hljóðnemi hangir niður úr himni
prédikunarstólsins. Ljósmyndasafn Íslands. JK5-56. Ljósmyndari Jón Kaldal.