19. júní - 19.06.2010, Page 37

Ertu sammála því að rétt sé að setja upp kynjakvóta?
Já, ég er sammála því. Ég var það ekki lengi framan af en eftir
því sem ég eldist og sé meira hugnast mér kynjakvótar betur. Sem
dæmi var verið að kjósa vígða þjóna á kirkjuþing Þjóðkirkjunnar
í maí, en það er svona ákvarðana- og framkvæmdarvald
kirkjunnar. Það voru ekki færri konur sem gáfu kost á sér en
karlar en það voru valdir 9 karlprestar og 3 kvenprestar. Þá var
mín ekki sátt. Ég myndi t.d. styðja kynjakvóta á kirkjuþingi. Ég
vil að það séu jafn margar konur og karlar sem tilheyra yfirstjórn
kirkjunnar sem ég þjóna.
Hvernig hefur konum gengið að feta sig í því fagfélagi sem
þú ert í?
Það hafa tvær konur orðið formenn Prestafélags Íslands, önnur
þeirra var kjörin á síðustu prestastefnu. Það er auðvitað jákvætt.
Núna eru þrjár konur í aðalstjórn og tveir karlar sem er óvenjulegt.
Þannig að það hafa orðið jákvæðar breytingar þar á síðustu
tíu árum.
Hver var fyrsta konan í þínu embætti og hvernær hóf hún
störf?
Sr. Auður Eir Vilhjálmsdóttir var fyrsta konan til að gegna
prestsembætti á Íslandi en hún var þó ekki fyrsta konan sem
las guðfræði og lauk prófi. Hún var vígð árið 1974 og hóf þá
störf á Vestfjörðum og það var stórkostlegt skref innan íslensku
Þjóðkirkjunnar. Auður Eir hefur rutt brautina fyrir okkur hinar og
oft þurft að heyja mikla baráttu enda fordómarnir magnaðir í
upphafinu. Þar að auki hefur sr. Auður verið á undan sinni
samtíð í því að þora að fara nýjar leiðir t.d. í helgihaldinu eins og
hægt er að upplifa og taka þátt í innan Kvennakirkjunnar. Ég ber
mikla virðingu fyrir henni, hún er mikil baráttukona sem hefur
kennt okkur þjónum kirkjunnar ótal margt.
37
32-41 Eg er kona5styrk.indd 7 6/1/10 2:13:31 PM