Glóðafeykir - 01.11.1977, Side 5

GLÓÐAFEYKIR
Félagstíðindi Kaupfélags Skagfirðinga
1S. HEFTI - NÓVEMBER 1977
Ritstjóri og ábyrgðarmaður:
Gísli Magnússon í Eyhildarholti.
Ljósmyndun:
Stefán Pedersen.
Bóka' og Héraðsskjalasafti Skagfirðinga
Þetta 18. hefti Glóðafeykis er að verulegu leyti helgað Bóka- og
Héraðsskjalasafni Skagfirðinga. Safnið — eða öllu heldur söfnin —
er ein gagnmerkasta stofnun þessa héraðs og að vísu þótt víðar væri
leitað. Söfnin bæði, bókasafnið og skjalasafnið, sem mun vera eitt hið
stærsta og fjölbreyttasta safn sinnar tegundar utan Reykjavíkur, eru fyrir
nokkru flutt í ný og vegleg húsakynni. Þar er einnig vísir að listasafni.
Skagafjarðarsýsla og Sauðárkróksbær stóðu saman að því að koma
upp Safnahúsinu og sýndu þar mikinn stórhug. Söfnin eru sameign þessara
aðilja. Glóðarfeykir mun koma á flest heimili sýslunnar. Því má þykja
við hæfi, að ritið flytji sem flestum Skagfirðingum nokkurn fróðleik
um þessa mestu og fjölbreyttustu menningarstofnun héraðsins. Hafa og
til þess valizt menn, sem fyrir sakir starfa sinna við söfnin máttu
teljast manna hæfastir til þeirra hluta. En þótt eigi sé teygður lopinn í
rítgerðum þeirra félaga, hljóta þær að taka nokkurt rúm í Glóðafeyki.
Fyrir því verður ýmist að stytta eða fella niður að þessu sinni vissa þætti,
er verið hafa fastir liðir í hverju hefti að undanförnu.
Stjórn Bóka- og Héraðsskjalasafns Skagfirðinga skipa: Kári Jónsson,
formaður, Rögnvaldur Gíslason, ritari, Kristmundur Bjarnason, Gunnar
Helgason og Gísli Magnússon.
G. M.