Skólavarðan - 01.05.2007, Síða 3

3
FORMANNSPISTILL
SKÓLAVARÐAN 4.TBL. 7. ÁRG. 2007
Formaður og varaformaður KÍ og formenn aðildarfélaga KÍ skiptast á um
að skrifa formannspistla í Skólavörðuna. Félögin á bak við formannspistlana
eru: Félag framhaldsskólakennara (FF), Félag grunnskólakennara (FG),
Félag leikskólakennara (FL), Félag stjórnenda í framhaldsskólum (FS), Félag
tónlistarskólakennara (FT), Skólastjórafélag Íslands (SÍ).
Skömmu fyrir alþingiskosningarnar birti KÍ yfirlit yfir
forgangsverkefni nýrrar ríkisstjórnar í menntamálunum undir
heitinu „Skóli morgundagsins - ný menntastefna á grunni tíu
punkta samkomulagsins“. Menntastefnan felst í framsæknum
tillögum um aukið jafnrétti til náms, um raunverulega aukningu
á fjölbreytni í námi og tryggingar um rétt og aðgengi nemenda
að námi, tillögum um góðan aðbúnað í skóla og betri stöðu
heimila til að koma börnum og ungmennum til mennta. Og
síðast en ekki síst: Tillögum um að festa ábyrgð stjórnvalda á
þessum mikilvægu velferðarmálum í lögum með mun meiri
skuldbindingu en við eigum að venjast. Tilgangur KÍ var að fá
viðbrögð allra stjórnmálaflokka við menntastefnunni og vitneskju
um raunverulegan vilja frambjóðenda þeirra til að hrinda henni
í framkvæmd að kosningum loknum. Því miður voru viðbrögð
bæði fá og rýr.
Ársfundur KÍ sem haldinn var á svipuðum tíma lýsti yfir ánægju
sinni með tillögurnar og veitti fulltrúum KÍ í laganefndum
umboð til áframhaldandi vinnu að málinu samkvæmt stefnu
sambandsins um fjölbreytt og jafngilt nám, breytilegan námstíma
og lokapróf allt eftir inntaki náms og viðtökumiðun þess. Um
leið var varað við öllum hugmyndum um skerðingu á námi. Á
ársfundi skólamálaráðs KÍ sem var haldinn í beinu framhaldi af
ársfundi KÍ, eftir hádegi sama dag, var farið yfir tillögur einstakra
starfshópa um tíu punkta samkomulagið. Kom m.a. skýrt fram í
máli fulltrúa KÍ í laganefndum skólastiga að vinnan þar er mjög
misjafnlega fram skriðin og komin hvað styst á veg í laganefnd
framhaldsskólans.
Nú þegar kosningar eru að baki liggur fyrir að útfæra
menntastefnuna í laganefndum skólastiganna. Í því sambandi
er m.a. mjög mikilvægt að byrjað verði með „hreint borð“ í
laganefnd framhaldsskólans til að skapa einhug og samstöðu
um yfirvegað og vandað verklag, nemendum og skólastarfi til
hagsbóta. Kennarar og samtök þeirra ætlast til þess að stjórnvöld
taki fyrirliggjandi tillögur um endurskoðun náms og skólastarfs
til efnislegrar meðferðar og taki afstöðu til framkvæmdar þeirra
og fjármögnunar. Allir aðilar sem málið varðar geri þessa nýju
menntastefnu að sinni, þannig að hún komi til meðferðar alþingis
og nái alla leið inn í ríkisfjármálin.
Á þessu ári verður þess minnst með ýmsum hætti að 100 ár
eru frá setningu fyrstu alþýðufræðslulaganna á Íslandi og frá
upphafi kennaramenntunar. Á þessum tímamótum er fyllilega
ástæða til að spyrja: Hvenær var síðasta tilhlaupið tekið sem
jók raunverulega jafnrétti til náms á Íslandi? Hér er ekki átt
við endurritun námskráa og því um líkt heldur raunverulegar
aðgerðir sem bættu og jöfnuðu stöðu einstaklinga og hópa til
að komast til mennta. Er nokkuð meira viðeigandi á þessu ári en
víðtæk samstaða um heildarniðurstöðu í endurskoðun náms og
skólastarfs sem nemendur, kennarar og samfélagið allt getur vel
við unað?
Aðalheiður Steingrímsdóttir.
Stóru verkefnin í menntamálunum
Skömmu fyrir alþingiskosningarnar birti KÍ yfirlit yfir forgangs-
verkefni nýrrar ríkisstjórnar í menntamálunum. Tilgangurinn
var að fá viðbrögð allra stjórnmálaflokka við menntastefnunni
og vitneskju um raunverulegan vilja frambjóðenda þeirra til að
hrinda henni í framkvæmd að kosningum loknum. Því miður
voru viðbrögð bæði fá og rýr. Kennarar og samtök þeirra ætlast
til þess að stjórnvöld taki fyrirliggjandi tillögur um endurskoðun
náms og skólastarfs til efnislegrar meðferðar og taki afstöðu til
framkvæmdar þeirra og fjármögnunar.
Aðalheiður Steingrímsdóttir
formaður Félags framhaldsskólakennara