Skólavarðan - 01.02.2008, Blaðsíða 16

16
dAGUR LEIKSKÓLANS 6. FEBRÚAR
SKÓLAVARÐAN 1.TBL. 8. ÁRG. 2008
Dagur leikskólans var í fyrsta sinn haldinn
hátíðlegur þann 6. Febrúar sl. og það er meira
en nægt tilefni til að vekja duglega athygli
á leikskólastiginu í Skólavörðunni að þessu
sinni. Það voru Félag leikskólakennara,
menntamálaráðuneytið, Samband íslenskra
sveitarfélaga og Heimili og skóli sem tóku
höndum saman um að stuðla að því að
beina sérstakri athygli að leikskólanum
og því góða og fjölbreytta mennta- og
uppeldisstarfi sem þar fer fram.
Sagt er frá einni af gjöfulum mennta-
stefnum leikskólans, Reggio Emilia, og
samstarfsdegi kennara sem vinna í þeim
anda á næstu síðum eftir að hafa staldrað
stuttlega við dag leikskólans og inntak
leikskólamenntunar.
Markmiðið með degi leikskólans er
einkum að gera þegna samfélagsins betur
meðvitaða um þýðingu leikskóla fyrir börn,
skapa jákvæða ímynd um leikskólakennslu og
auka áhuga fólks á því að starfa í leikskólum.
Í tilefni dagsins var gefið út kynningarrit sem
afhent var öllum leikskólabörnum á Íslandi
og fjölskyldum þeirra. Að þessu sinni vildi
svo skemmtilega til að daginn bar upp á
Öskudag. Aðstandendum fannst takast
vel til með þennan fyrsta dag leikskólans,
greinar birtust í dagblöðum og fréttir
um daginn voru á heimasíðum nær allra
sveitarfélaga. Þá brugðu ýmsir leikskólar
á leik í tilefni dagsins og meðal annarra
viðburða má nefna að efnt var til sýninga
á verkum leikskólabarna. Í Kópavogi var
gefið út veglegt veggspjald í tilefni dagsins.
Spennandi verður að fylgjast með hvernig til
tekst 6. febrúar á næsta ári og víst er að
dagur leikskólans er kominn til að vera.
Við bjóðum góðan dag – alla daga
Í tilefni af degi leikskólans 6. Febrúar
sl. skrifuðu Björg Bjarnadóttir formaður
Félags leikskólakennara og Þröstur
Brynjarsson varaformaður grein sem birtist
í Morgunblaðinu. Þar sögðu þau meðal
annars:
„Það er eftir því tekið hversu leikskóla-
starfsemi hefur aðlagað sig breyttum
þjóðfélagsháttum. Þjónustan er góð og
fagmennska eykst í takt við auknar kröfur...
Það hefur komið fram í fjölmörgum
könnunum að starfsánægja mælist hvergi
meiri en í leikskólum... Í leikskólum er mikið
faglegt svigrúm og því er hugmyndafræðin
mismunandi og áherslur frá leikskóla til
leikskóla geta verið mjög ólíkar. Í leikskólanum
fer fram einstaklingsmiðað nám og gengið
er út frá því að börn búi yfir getu og vilja til
að læra svo fremi að umhverfið sé áhugavert
og hvetjandi og viðmót hinna fullorðnu
einkennist af virðingu og alúð... Ef börn hafa
ögrandi efnivið eða eitthvað skemmtileg að
fást við eru þau ánægð. Glöð einlæg börn
sem hrífast af viðfangsefninu eru miklir
gleðigjafar og eiga án efa mikinn þátt í því
að starfsánægja mælist há... Til að auka
jákvæða umræðu og varpa ljósi á mikilvægi
leikskólans í samfélaginu hefur verið ákveðið
að tileinka honum einn dag á ári, 6. febrúar.
Að þessu verkefni standa ásamt Félagi
leikskólakennara menntamálaráðuneytið,
Samband íslenskra sveitarfélaga og Heimili
og skóli. Þessum aðilum eru færðar þakkir
fyrir áhugann sem verkefninu var sýnt
og þess vænst að það verði mikilvægur
hlekkur í áframhaldandi góðu samstarfi
þessara hagsmunaaðila. Við bjóðum góðan
leikskóladag – alla daga.“
Dagur leikskólans haldinn
hátíðlegur í fyrsta sinn
í tilefni af degi leikskólans leituðu kennarar í
leikskólum Grafarholts í Reykjavík eftir samvinnu
við fyrirtæki í hverfinu og fengu að setja upp
myndlistarsýningu á verkum leikskólabarna. Verk
barnanna í Reynisholti, Geislabaugi og Maríuborg
glöddu dögum saman gesti og viðskiptavini
Húsasmiðjunnar, Blómavals, Landsbankans
og fyrirtækjanna á háholtinu við Kirkjustétt.
Auk listaverkanna var bæklingurinn um dag
leikskólans hengdur upp á þessum stöðum.