Skólavarðan - 01.02.2008, Blaðsíða 17

17
REGGIO EMILIA
SKÓLAVARÐAN 1.TBL. 8. ÁRG. 2008
Nýverið fréttum við hjá Skólavörðunni
af skólaþróunardegi um Reggio Emilia
hugmynda- og aðferðafræðina í skólastarfi.
Þessi aðferð og hugmyndir henni tengdar
er mörgu leikskólafólki að góðu kunn en
ef til vill síður þekkt á öðrum skólastigum.
Við fengum tvo skólastjóra sem áttu veg
og vanda af skipulagi dagsins ásamt
samstarfsfólki sínu til að segja frá Reggio
Emilia skólaþróunardeginum og nýstofnuðu
félagi áhugafólks um skólastarf í þessum
anda. Gefum Eddu Valsdóttur og Hólmfríði
K. Sigmarsdóttur orðið.
Leikskólastarf í anda Reggio Emilia á rætur
sínar að rekja til samnefnds bæjar á norður
Ítalíu. Starfið byggist á virðingu fyrir börnum
sem sjálfstæðum einstaklingum, trú á getu
þeirra, hæfileika og sköpunarmátt. Mikil
áhersla er lögð á sjálfstæðar ákvarðanir
barna og lýðræðisleg vinnubrögð og að
börn og starfsfólk vinni að námsleiðum
sínum í sameiningu, séu samverkamenn.
Allri tjáningu og tungumáli barna ber mikil
virðing og lagt er upp úr því að hver og einn
sé viðurkenndur eins og hann er. Starfið er
sprottið úr grasrót foreldra og aðalhug-
myndasmiður vinnuaðferðarinnar er Loris
Malaguzzi, sálfræðingur og kennari.
Til Íslands barst starfsaðferðin fyrir tilstilli
nýútskrifaðra leikskólakennara um það leyti
sem leikskólinn Marbakki í Kópavogi opnaði.
Leikskólakennarar sem réðu sig til starfa á
Marbakka við opnun hans árið 1986 fengu
fljótlega styrk frá menntamálaráðuneyti til
að þróa og innleiða þessa kennsluhætti.
Síðan hefur starfið í leikskólanum Marbakka
ætíð tekið mið af Reggio Emilia aðferðinni.
Liðin eru rúmlega tuttugu ár og starfs-
aðferðin hefur hægt og bítandi skapað sér
virðingu og fastan sess í leikskólastarfi.
Í Kópavogi starfa nú þrír leikskólar í anda
Reggio Emilia en þeir eru, auk Marbakka,
leikskólinn Fagrabrekka og nýjasti leikskólinn
í Kópavogi, Baugur.
Í leikskólanum Fögrubrekku hefur á
síðustu árum verið unnið að því að samþætta
tónlistarstarf og hreyfingu við starfsaðferðir
Reggio Emilia með mjög góðum árangri.
Margir leikskólar víðsvegar um landið
hafa tileinkað sér starfsaðferðina og enn
aðrir styðjast að hluta við hana í starfi sínu.
Leikskólar sem starfa í anda Reggio Emilia á
Íslandi eru nú um þrjátíu talsins, víðsvegar
um landið. Þess má geta að á undanförnum
árum hefur Háskólinn á Akureyri og
Kennaraháskóli Íslands kynnt og kennt um
Reggio Emilia í leikskólakennaradeildum
sínum.
Stofnfundur Samtaka áhugafólks um starf í
anda Reggio Emilia - SARE
Þann 13. september 2007 stofnaði hópur
fólks, sem hefur lengi starfað með börnum í
anda Reggio Emilia, samtök sem hlutu heitið
SARE. Nafnið stendur fyrir „Samtök áhuga-
fólks um skólastarf í anda Reggio Emilia“. Það
fólk sem starfar í anda þessarar hugmynda-
og aðferðarfræði leggur gagnrýna hugsun
og skapandi starf barna til grundvallar í öllu
starfi leikskólans. Ofuráhersla er lögð á áhrif
barna, kennara og umhverfis á hvert annað
og er markmið samtakanna m.a. að stuðla
að uppeldi lýðræðissinnaðra frumkvöðla,
ekki fylgjenda.
Í drögum að markmiðum samtakanna segir:
Markmiðum sínum hyggjast samtökin ná
með því að:
• Standa fyrir málþingum, námskeiðum,
ráðstefnum og samstarfsdögum um
starf í anda Reggio Emilia.
• Taka þátt í og hafa frumkvæði að verk-
efnum þar sem hugmyndafræði Reggio
Emilia er lögð til grundvallar.
• Halda úti heimasíðu þar sem félagar
samtakanna geta skipst á upplýsingum
og hugmyndum um allt það er varðar
markmið félagsins.
• Hvetja til og standa að útgáfu um starf í
anda Reggio Emilia eftir því sem efni og
aðstæður leyfa.
• Stuðla að samfélagslegri umræðu um
starf í anda Reggio Emilia.
Íslenskir skólar með ítölskum keim Leikskólastarf í anda Reggio Emilia
Mikil áhersla er lögð á sjálfstæðar ákvarðanir barna og
lýðræðisleg vinnubrögð og að börn og starfsfólk vinni að
námsleiðum sínum í sameiningu, séu samverkamenn. Allri
tjáningu og tungumáli barna ber mikil virðing og lagt er upp úr
því að hver og einn sé viðurkenndur eins og hann er.
LJósmyndir frá höfundum