Fréttatíminn - 06.05.2016, Síða 28

Listahátíð Sonur Helga Tómassonar myndar ballettinn
Vildi ekki feta í fótspor pabba
Erik Tomasson, sonur Helga
Tómassonar ballettdansara
og listræns stjórnanda San
Fransisco ballettsins, hefur
verið ljósmyndari balletts­
ins í tólf ár. Hann gat ekki
hugsað sér að feta í fótspor
foreldranna þrátt fyrir að
dást að starfi dansarans.
Halla Harðardóttir
halla@frettatiminn.is
„Þar sem ég hef verið í kringum
ballett alla ævi er kannski auðveld­
ara fyrir mig en aðra að ná réttu
augnablikunum. Ég reyndi samt
eins mikið og ég gat að komast frá
ballettinum en hérna er ég,“ segir
Erik Tomasson ljósmyndari, sonur
Helga Tómassonar, eins þekktasta
ballettdansara heims og listræns
stjórnanda San Fransisco balletts­
ins. Erik hefur verið hirðljósmynd­
ari San Fransisco ballettsins síðast­
liðin tólf ár en þar áður skapaði
hann sér nafn í auglýsingagerð og
vann fyrir risafyrirtæki á borð við
Google, Coca Cola, Aveda, Kellog ś
og Toyota, svo nokkur séu nefnd.
Alltaf á tánum
Í starfi sínu ferðast Erik heims­
horna á milli en næsta ferðalag
verður til Íslands þegar ballettinn
sýnir á Listahátíð Reykjavíkur.
„Ég sé um að taka allar myndir
fyrir bæklinga og auglýsingar, auk
þess að útvega myndir til fjölmiðla
þegar þess er þörf. En svo fylgist
ég með flokknum á æfingum, í
búningsklefanum og á sýningum.
Einn skemmtilegasti og mest krefj­
andi hluti þessa starfs er að taka
myndir í myrkrinu baksviðs þegar
dansararnir bíða þess að fara á
svið. Þegar ég svo tek myndir af
dansinum sjálfum, á æfingu eða
sýningum, skiptir rétta augnablik­
ið öllu máli. Ætli þetta snúist ekki
um að vera alltaf tilbúinn, alltaf á
tánum.“
Ekkert grín að vera dansari
Erik stundaði framan af íþróttir
af kappi en ákvað snemma að
feta ekki í fótspor foreldra sinna,
en móðir hans, Marlene, er líka
dansari. Hann íhugaði þó listnám
og eftir að bróðir hans gaf honum
myndavél í tvítugsafmælisgjöf
ákvað hann að læra ljósmyndun.
„Ég hef alltaf kunnað að meta
dansinn og mun seint þreytast á
því að dást að starfi dansarans.
Þetta er ótrúlega krefjandi starf
sem tekur yfir líf þeirra sem það
stunda, þetta eru listamenn og
íþróttamenn á sama tíma. Sjálfur
gat ég samt ekki hugsað mér
að fara þessa leið og ég held að
aðalástæðan hafi verið vegna
allra meiðslanna sem pabbi fór í
gegnum á ferlinum. Það er ekkert
grín að velja þessa leið og ég var
hreinlega ekki tilbúinn til þess,
þrátt fyrir að hafa alltaf gengið vel
í íþróttum.“
„Ég ólst upp í New York en við
fluttum til San Fransisco þegar
pabbi tók við ballettinum þar, þá
var ég þrettán ára. Við vorum samt
alltaf á ferðalagi og það var frekar
ótrúlegt að fá að heimsækja alls­
konar magnaða staði frá unga aldri
og vera alltaf í hringiðu dansins.
Ætli það hafi ekki haft nokkuð
mikil áhrif á mig því ég elska að
ferðast og er alltaf þakklátur þegar
ég fer á nýja staði vegna vinn­
unnar,“ segir Erik sem kemur til
Íslands innan tíðar. „Það er alltaf
jafn gaman að koma til Íslands en
þetta verður í fyrsta sinn sem ég
kem með ballettinum. Mér finnst
einna skemmtilegast að taka
myndir af dönsurunum á nýjum
stöðum og vonandi verður tími til
þess í þessari ferð.“
„Sem ljósmyndari er auðvitað mjög
áhugavert og krefjandi að vinna
með dönsurum. Þetta eru lista­
menn sem eru alltaf til í að ganga
langt til að ná góðri mynd svo það
er í raun algjör draumur að fá að
vinna með þeim.“ Erik Tomasson.
Myndir | Erik Tomasson.
 Fleiri myndir Eriks á
frettatiminn.is
28 | FRÉTTATÍMINN | 6. MAÍ 2016