Bókasafnið - 01.07.2017, Blaðsíða 56

56 Bókasafnið
Elísabet Halldórsdóttir fæddist á Akureyri 1. ágúst 1947. Hún ólst upp á Akureyri, í
Hafnarfirði og Reykjavík.
Hún lauk stúdentsprófi frá Menntaskólanum í Reykjavík árið 1968 og BA prófi í bóka-
safnsfræði og sögu frá Háskóla Íslands 1977. Veturinn 1992-1993 stundaði hún nám
við Danmarks Biblioteksskole í Kaupmannahöfn.
Elísabet var í hlutastarfi á Borgarbókasafni Reykjavíkur á árunum 1970-1977 að einum
vetri undanskildum en þá vann hún á Landsbókasafni. Að námi loknu var hún ráðin
bókasafnsfræðingur á Borgarbókasafn sem varð hennar starfsvettvangur í áratugi. Hún
var gjarnan leiðandi í innleiðingu nýjunga, svo sem við gerð efnisorðaskrár yfir safn-
kost Borgarbókasafns, uppbyggingu upplýsingaþjónustu og tölvuvæðingar safnsins.
Hún var í vinnuhópi um Dobis/Libis bókasafnskerfið 1986-1987. Kerfið var tekið í
notkun á Borgarbókasafni og á fleiri söfnum árið 1989 og var Elísabet ein af þeim sem
leiddu vinnu við innleiðingu kerfisins sem síðar fékk íslenska nafnið Fengur. Hún var
fulltrúi starfsmanna í stjórn Borgarbókasafns 1978-1986.
Elísabet sat í flokkunarnefnd bókasafna 1981-1989 á vegum samstarfsnefndar um upplýsingamál og Bókafulltrúa ríkis-
ins en nefndin annaðist ritstjórn og þýddi stytta og staðfærða útgáfu flokkunarkerfis Dewey fyrir íslensk bókasöfn 1987.
Hún átti sæti í nefndum á vegum menntamálaráðuneytis til að gera tillögur um hagkvæmustu leiðina til að tengja bóka-
söfn landsins í stafrænt upplýsinganet. Þar var grunnurinn lagður að Gegni, sameiginlegu upplýsinga- og rekstrarkerfi
flestra bókasafna landsins. Eftir mikla undirbúningsvinnu var Gegnir tekinn í notkun á árunum 2003-2004. Elísabet
átti sæti í efnisorðaráði Gegnis frá upphafi en það hefur það hlutverk að samræma notkun efnisorða til að létta notend-
um upplýsingaleit í Gegni og leitir.is. Hún var fagmaður fram í fingurgóma og hafði afar ríka tilfinningu fyrir íslensku
máli sem nýttist vel í störfum hennar.
Hún var einstaklega félagslynd og hafði gaman af að gleðjast í góðra vina hópi. Hún var mikill vinur vina sinna og rækt-
aði fjölskyldu sína og vini vel. Hún var framtakssöm og hafði gjarnan frumkvæði að því að hóa fólki saman, halda veislur
og gleðjast á annan hátt.
Það er ekki hægt að segja að Elísabet hafi verið heppin með heilsuna. Alltof snemma varð hún að draga úr vinnu og að
lokum hætta alveg. Eldmóðurinn og áhuginn fyrir samvinnu og samstarfi íslenskra bókasafna var þó ætíð fyrir hendi
og hélt hún góðum tengslum við samstarfsfólk í bókasafnasamfélaginu. Við vorum saman í hópi sem kallar sig „Kjarna-
konur“ og er eins konar saumaklúbbur sérfræðinga sem láta sig gæði bókfræðiupplýsinga og efnisorða í Gegni varða.
Elísabet lést 13. júlí 2016. Við kveðjum kæra samstarfs- og vinkonu með virðingu og þökk.
Sigrún Hauksdóttir og Þóra Sigurbjörnsdóttir
Minning
Elísabet Halldórsdóttir 1947 - 2016