Skírnir - 01.04.2012, Side 177

SKÍRNIR HVER FJARLÆGÐI LÍK STAÐARBRÆÐRA? 175
fréttu þeir að Staðarmenn og meðreiðarmenn þeirra hefðu lagt á
Kjöl löngu áður og þótti einsýnt að þeir hefðu farist á fjöllum. Þeir
Jón og Björn dvöldu syðra þangað til í fyrstu viku þorra. Þá riðu þeir
norður aftur, fóru dagfari og náttfari á fjórum dægrum (tveimur sól-
arhringum) milli byggða, en frá Hamarsholti, efsta bæ í Hruna-
mannahreppi, að Gilhaga í Tungusveit eru um 155 km. Almennt var
talað um að Kjölur væri sex þingmannaleiðir. Þingmannaleið er um
37 km en hver áfangi milli sæluhúsa hefur verið nokkru styttri á Kili
eða að meðaltali 26 km.
Á norðurleið fundu þeir 20 kindur norður af Hveravöllum og
komu þeim norður í Svartárbuga að Aðalmannsvötnum en þangað
voru þær síðan sóttar af Tungusveitungum. Nokkrar kindur fleiri
slæddust ofan að Stafni í Svartárdal og sagt er að hundur hafi komið
niður að Rugludal í Blöndudal. Snemma um vorið var hrossum
safnað í Staðarrétt og kom þá grár graðhestur norðan að hneggjandi
og staðnæmdist þar nærri. Kenndu menn þar einn af hestum þeim
sem hafði verið í förinni.
5. Leit að vori
Farin var leitarferð um vorið að undirlagi Halldórs á Reynistað. Svo
virðist að sú ferð hafi verið farin mjög snemma, í apríl eða byrjun
maí, og er Jón Egilsson á Reykjum á Reykjaströnd nefndur sem
einn leitarmanna. Á Seyluþingi um haustið kom fram að fallið hefði
í hans hlut að leita næst staðnum þar sem tjald þeirra Staðarmanna
fannst síðar. Þá ályktun um að leitað hafi verið snemma vors má
draga af því að Jón fór suður yfir Kjöl seinna um vorið ásamt
öðrum, áður en færð fór að spillast vegna leysinga, til að kaupa fé
eins og síðar verður getið.
Einnig er líklegt að enn verið miklir skaflar í syðri hluta Kjal-
hrauns þegar þessi leit stóð yfir og því hafi óhappastaðurinn verið
snævi þakinn.
Guðmundur Jósafatsson (1966) frá Brandsstöðum, sem skrifað
hefur um afdrif Jóns Austmanns af hvað mestu hyggjuviti og stað-
góðri þekkingu á Kili og norðurheiðum, segir auðsætt af veðurlýs-
ingum Hannesar biskups í Skálholti og sr. Jóns í Möðrufelli, að