Skírnir - 01.04.2012, Page 191

SKÍRNIR HVER FJARLÆGÐI LÍK STAÐARBRÆÐRA? 189
framburð að þeir hafi farið austur fyrir hraun og ekki komið nálægt
óhappastaðnum Beinhól.
Á leiðinni norður þarf Björn að sjá til þess að áð verði í Eystri
Svartárbotnum — það hefur varla verið erfitt verk þar sem Eystri
Svartárbotnar henta vel sem áningastaður. Hann hefur tekið fyrstu
vakt yfir ánum og um leið og ró færist yfir ferðafélagana hefur hann
riðið sem skjótast að Beinhól en þangað eru aðeins um fjórir kíló-
metrar frá Eystri Botnum. Þar hefur hann haft hraðar hendur án
þess að vita að líkin voru þegar fundin, flutt þau í góða fjarlægð frá
Beinhól og grafið þau vendilega niður í mel svo engin ummerki sæj-
ust. Allt ferðalagið þarf ekki að hafa tekið meira en þrjá klukku-
tíma. Ferðafélögunum hefur því verið ókunnugt um ferðir hans og
því veitt honum ágæta fjarvistarsönnun.
Þessi greftrunarstaður líkanna er nú týndur. En sú staðreynd að
um mel hafi verið að ræða þrengir möguleikana. Annaðhvort hefur
Björn flutt líkin í vestur um 1,5 km upp í rætur Kjalfells, sem telja
má ólíklegri kost, eða suðaustur um 3,5 km leið uns komið er í mel-
inn fyrir austan hraun. Eins og fyrr segir var staðurinn merktur með
vörðu og hugsanlega sjást einhver ummerki enn.
Ef Björn urðaði líkin, hvers vegna dró hann þau þá út úr hraun-
inu og út á mel? I Kjalhrauni er síst skortur á góðum felustöðum,
gjám og gjótum sem mætti auðveldlega hylja með grjóti þar á
staðnum. Því er erfitt til að svara en ljóst er að sá sem flutti líkin
hefur gert ráð fyrir þeim möguleika að þeirra yrði leitað. Það gæti
verið örðugra en í fyrstu virðist að ganga það tryggilega frá líkum í
gjótum að ekki sæjust ummerki. Líklega hefur hann verið búinn að
velja staðinn áður en hann lagði af stað til að sækja líkin. Ljóst er að
þau hafa verið grafin grunnt því annars hefði ekki blásið ofan af
þeim.
Það eina sem bregst í þessari ráðagerð er að Tómas Jónsson á
Flugumýri og samferðamenn hans hafa þegar fundið tjaldið og séð
a.m.k. þrjú lík í því vikuna áður.
Litlar líkur voru á að þeir yrðu missaga við yfirheyrslur því að
allir hafa þeir sagt rétt og satt frá nema hvað Björn hefur haldið eftir
ferð sinni að Beinhól til að bjarga lífi sínu. Menn kunna að spyrja sig
hvers vegna Grafar-Jón sagði ekki frá því við réttarhöld að þeir