Morgunblaðið - 25.02.2019, Side 15

FRÉTTIR 15Erlent
MORGUNBLAÐIÐ MÁNUDAGUR 25. FEBRÚAR 2019
Smiðjuvegi 4C | 200 Kópavogur | Sími 587 2202 | hagblikk@hagblikk.is | hagblikk.is
HAGBLIKK
Álþakrennur
& niðurföll
Þakrennurnar eru frá GRÖVIK VERK í Noregi
Þær eru einfaldar í uppsetningu
HAGBLIKK
Ryðga ekki
Brotna ekki
Litir á lager:
Svart, hvítt, ólitað, rautt
silfurgrátt og dökkgrátt
Stefán Gunnar Sveinsson
sgs@mbl.is
Að minnsta kosti fjórir létust og 300
særðust þegar til átaka kom á landa-
mærum Venesúela, þar sem vörubíl-
ar með vestrænni neyðaraðstoð
reyndu að fara yfir með aðstoð
stuðningsmanna stjórnarandstöð-
unnar. Þjóðvarðliðar og skæruliða-
hópar á vegum ríkisstjórnar landsins
og Nicolas Maduro, sitjandi forseta,
beittu hins vegar hörku til þess að
koma í veg fyrir að neyðaraðstoðin
kæmist sína leið.
Evrópusambandið og Bandaríkin
fordæmdu bæði ríkisstjórn Maduro í
gær fyrir ofbeldið og að hafa beitt
fyrir sig vopnuðum skæruliðahópum
til að koma í veg fyrir að neyðar-
aðstoðin bærist til landsins. Juan
Guaidó, leiðtogi stjórnarandstöð-
unnar, kallaði eftir því að ríki heims-
ins myndu íhuga „alla valmöguleika“
til að „frelsa“ Venesúela eftir atburði
helgarinnar. Þá sagði Guaidó að
hann myndi sækja fund svonefnds
Lima-hóps í Bógóta, höfuðborg Kól-
umbíu, í dag, en þar verður ástandið
í Venesúela á dagskrá. Mike Pence,
varaforseti Bandaríkjanna, verður
einnig á fundinum.
Tekist á um neyðaraðstoð
Mike Pompeo, utanríkisráðherra
Bandaríkjanna, sagði í gær að hann
væri sannfærður um að almenningur
í Venesúela myndi tryggja að „dagar
Maduros“ væru „taldir“ eftir ofbeldi
helgarinnar, og sagði það vera mark-
mið Bandaríkjanna að styðja við
framgang lýðræðis í Venesúela.
Trump Bandaríkjaforseti hafði áður
tekið fram að hernaðaríhlutun af
hálfu Bandaríkjanna væri ekki úti-
lokuð.
Federica Mogherini, utanríkis-
málastjóri Evrópusambandsins, for-
dæmdi í gær að ríkisstjórn Vene-
súela beitti fyrir sig „óreglulegum“
skæruliðahópum til þess að reyna að
kúga óbreytta borgara og aftra þeim
frá því að dreifa neyðaraðstoð. Sagði
Mogherini að Evrópusambandið
væri reiðubúið til að senda enn meiri
neyðaraðstoð til landsins, en Maduro
hefur hafnað henni með þeim rökum
að aðstoðin sé yfirvarp fyrir innrás
Bandaríkjahers. Guaidó hefur á móti
sagt að um 300.000 Venesúelabúar
séu í brýnni þörf fyrir matvæli og lyf,
og að þeir muni láta lífið ef ekki verði
gripið fljótt til aðgerða.
Tilraunir stjórnarandstöðunnar til
þess að dreifa aðstoðinni voru því
stöðvaðar á laugardaginn með mikilli
hörku. Meðal annars kveiktu stuðn-
ingsmenn sósíalistastjórnarinnar í
tveimur vörubílum með neyðar-
aðstoð, og skutu þjóðvarðliðar tára-
gasi og gúmmíkúlum á mótmælend-
ur í landamærabæjunum Urena og
San Antonio. Verstu átökin áttu sér
þó stað við Santa Elena de Uairen,
sem er á landamærum Venesúela og
Brasilíu, en þar var skotið á óbreytta
borgara með þeim afleiðingum að að
minnsta kosti tveir létust. Annar
hinn látnu var 14 ára drengur.
Meira en hundrað liðhlaupar
Ríkisstjórn Kólumbíu tilkynnti í
gær að meira en eitt hundrað her-
menn og þjóðvarðliðar úr her Vene-
súela hefðu flúið yfir landamærin um
helgina, en Guaidó hefur heitið öllum
hermönnum sakaruppgjöf, láti þeir
af stuðningi sínum við Maduro-
stjórnina. Að minnsta kosti tveir
hermenn flúðu yfir landamærin til
Brasilíu. Hétu ríkisstjórnir Kólumb-
íu og Brasilíu því báðar að þær
myndu beita Maduro þrýstingi til að
hann léti af völdum.
Maduro fordæmdi hins vegar Kól-
umbíustjórn fyrir stuðning sinn við
Guaidó, og sleit stjórnmálasambandi
við landið í gær. Gaf hann erindrek-
um Kólumbíu 24 klukkustundir til
þess að yfirgefa landið. „Ég mun
aldrei bugta mig né beygja, ég mun
aldrei gefast upp. Ég mun verja land
okkur með lífi mínu ef þörf krefur,“
sagði Maduro við hóp stuðnings-
manna sinna, sem söfnuðust saman í
höfuðborginni Caracas í gær.
Dagar Maduros taldir?
 Evrópusambandið fordæmir ofbeldisverk skæruliða ríkisstjórnar Venesúela
 Guaidó kallar eftir að ríki íhugi „alla möguleika“ til að koma Maduro frá völdum
AFP
Mótmæli Átök milli mótmælenda og þjóðvarðliða héldu áfram í gær, sunnudag, á Simon de Bolivar-brúnni milli
Venesúela og Kólumbíu. Að minnsta kosti fjórir mótmælendur létu lífið og um 300 manns særðust um helgina.
Frans páfi hét
því í gær að hann
myndi taka á öll-
um ásökunum
um að kaþólskir
prestar hefðu
misnotað börn.
Líkti hann
barnaníði við
mannfórnir og
hét því að Vatík-
anið myndi beita sér af alefli gegn
þeim prestum sem stunduðu það.
Ummæli páfa féllu í lok fjögurra
daga ráðstefnu biskupa í Vatíkan-
inu þar sem kynferðisbrotamál
innan kirkjunnar voru rædd, en
þau hafa varpað mikilli rýrð á
orðstír kaþólskunnar á síðustu
misserum.
Francesco Zanardi, forvígis-
maður samtaka ítalskra fórnar-
lamba kynferðisbrota innan kirkj-
unnar, gagnrýndi hins vegar páfa
fyrir aðgerðaleysi í fortíðinni og
sagði að Vatíkanið hefði misst trú-
verðugleika sinn.
Heitir baráttu gegn
misnotkun barna
Frans páfi
VATÍKANIÐ
Sérsveitir úr her Bangladess felldu
í gær mann sem gerði tilraun til
þess að ræna flugvél á leiðinni til
Dúbaí. Vélinni var í staðinn lent í
Chittagong, þar sem farþegum og
áhöfn vélarinnar var hleypt út.
Yfirvöld í Bangladess reyndu að fá
manninn til að gefast upp en hann
neitaði því og hegðaði sér með ógn-
andi hætti. Sérsveitarmenn gerðu
þá áhlaup á vélina þar sem hún stóð
úti á flugbrautinni og felldu hann.
Skammbyssa fannst á manninum
við leit eftir að aðgerðum lauk. Var
hins vegar ekki ljóst í gærkvöldi
hvort byssan var ekta eða eftirlík-
ing.
Um borð voru 134 farþegar og 14
áhafnarmeðlimir, og reyndust allir
heilir á húfi, en fyrstu fréttir af
flugráninu hermdu að einn úr
áhöfninni hefði orðið fyrir skoti
þegar maðurinn reyndi að ræna
vélinni. Sögðu yfirvöld að svo virt-
ist sem maðurinn hefði verið veikur
á geði.
Felldur eftir áhlaup
sérsveitarmanna
BANGLADESS
Theresa May forsætisráðherra bað í
gær um meiri tíma til þess að
tryggja lagalega bindandi breyting-
ar á samkomulagi Breta við Evrópu-
sambandið um útgöngu þeirra úr
sambandinu, svonefnt brexit. Sagði
hún jafnframt að mögulegt væri að
neðri deild breska þingsins myndi
ekki fá að kjósa um endanleg örlög
samkomulagsins fyrr en 12. mars, en
þá verða 17 dagar til stefnu áður en
Bretar eiga að yfirgefa sambandið.
Mæltist sú töf illa fyrir í Bretlandi,
þar sem þess hafði verið krafist að
hægt yrði að ganga til atkvæða um
breytingar á samkomulaginu í þess-
ari viku. Sagði May hins vegar að
viðræður við forkólfa Evrópusam-
bandsins stæðu enn yfir og að það
væri enn mögulegt að Bretar yfir-
gæfu ESB 29. mars líkt og gert er
ráð fyrir.
Keir Starmer, talsmaður Verka-
mannaflokksins í brexit-málum,
sagði hins vegar að yfirlýsing May
væri til marks um algjört ábyrgðar-
leysi hennar og viðurkenning á því
að henni hefði mistekist. „Theresa
May er að tefja tímann í örvænting-
arfullri tilraun til þess að fá þing-
menn til að velja á milli hennar
samnings og samningslausrar út-
göngu,“ sagði Starmer.
Verður brexit frestað?
Þrír ráðherrar í ríkisstjórn May
stigu fram fyrir skjöldu á laugardag
og gáfu til kynna að ef ekki yrði kom-
in niðurstaða í viðræður hennar við
sambandið í vikunni myndi þingið
þrýsta á um að útgöngunni yrði
frestað um nokkra mánuði. Sögðu
þau Greg Clark viðskiptaráðherra,
Amber Rudd atvinnu- og lífeyris-
málaráðherra og David Gauke dóms-
málaráðherra í grein í blaðinu Daily
Mail að það yrði einfaldlega ekki
nægur tími til að samþykkja alla
meðfylgjandi lagasetningu fyrir út-
göngu 29. mars ef ekkert lægi ljóst
fyrir í þessari viku.
May biður um
meiri tíma
 Mögulega ekki
kosið um brexit
fyrr en 12. mars
AFP
Brexit Ekki eru allir sáttir við hug-
myndir um að fresta brexit.