Skessuhorn - 13.04.2016, Blaðsíða 16
MIÐVIKUDAGUR 13. APRÍL 201616
Til eru ýmsar útfærslur af alls kyns
góðgæti úr döðlum. Döðlur eru sæt-
ar á bragðið og eru þar af leiðandi oft
notaðar í stað sætu í uppskriftum af
ýmsum toga. Döðlugóðgæti líkt og
þetta sem við birtum hér er bæði til
í hollari kantinum sem og óhollari.
Við birtum þó óhollari uppskriftina
að þessu sinni. Hollari útgáfan er þó
svipuð þessari, púðursykrinum er
einfaldlega sleppt og örlítið hunang
sett í staðinn. Uppskriftin er feng-
in frá hópi mæðra sem hittast reglu-
lega með börnin sín og segja þær
að góðgætið sé hrikalega gott, með
karamellubragði. Uppskriftin hefur
gengið manna á milli og klárast sæl-
gætið yfirleitt upp til agna á skömm-
um tíma.
Döðlunammi
500 gr döðlur
150 gr púðursykur
250 gr smjör
5 bollar Rice Krispies morgunkorn
Súkkulaði
Aðferð:
Döðlur, smjör og púðursykur soð-
ið saman í potti þar til döðlurnar
eru mjúkar. Rice Krispies er sett út
í síðast og hrært varlega saman við.
Smyrjið blöndunni á plötu með bök-
unarpappír, þannig að þykktin verði
um einn til einn og hálfur cm. Látið
kólna. Bræðið því næst dökkt súkk-
ulaði, smyrjið því yfir og látið kólna.
Skerið í teninga eða tígla og ber-
ið fram.
Döðlunammi með karamellukeim
Freisting vikunnar
Hér má sjá sambærilegt döðlugott. Ljósm. Eldað & Bakað.
Trésmiðjan Gráborg stendur í
ströngu þessa dagana við að skipta
um gler á vesturgafli Grundarfjarð-
arkirkju. Það þarf traustar hendur
til verksins en innri gluggarnir eru
listaverk eftir Eirík Smith sem sett
var saman á þýsku glersverkstæði
Oidtman bræðra árið 1984. Iðnað-
armenn frá Gráborg sýndu af sér
mikla natni þegar ljósmyndari kíkti
á þá á dögunum og ljóst að lista-
verkið er í öruggum höndum.
tfk
Gráborgarmenn skipta um gler á vesturhlið kirkjunnar.
Listaverkin eru eftir Eirík Smith.
Skipt um gler
í Grundar-
fjarðarkirkju
Nú styttist í að Ar-
ion banki og Póst-
urinn í Búðardal
flytji starfsemi sína
yfir í fasteignina að
Miðbraut 13. Und-
anfarið hefur fjöl-
mennt lið unnið að
framkvæmdum en
eins og gengur og
gerist þegar farið er
í endurbætur á eldri
húsum hafa einhver
óvænt verkefni þurft
úrlausnar við. Auk
þess hefur verið tek-
in ákvörðun um að
betrumbæta svæð-
ið að utan og hellu-
leggja stétt. Áætl-
að er að flutningur
verði í maímánuði.
sm
Endurbætur fyrir banka og póst
Samkvæmt reglugerð um stjórn
makrílveiða íslenskra fiskiskipa, sem
gefin var út fyrr í mánuðinum, verð-
ur leyfilegur heildarafli íslenskra
skipa í makríl á þessu ári tæp 148
þúsund tonn, þar með talin 20 þús-
und tonn á samningssvæði NEAFC,
utan lögsögu ríkja. Þá er úthlutað
3.825 tonnum sem ekki veiddust af
óskiptum potti smábáta í fyrra. Auk
þess geymdu sum skip talsvert af
heimildum sínum milli ára og mega
veiða nú en geymsluheimild milli
ára var aukin í 30% í kjölfar við-
skiptabanns Rússa. Fari heildarafli
umfram þetta magn ákveður ráð-
herra hvort veiðar á makríl verði
bannaðar. Úthlutun síðasta árs nam
rúmlega 170 þúsund tonnum. Evr-
ópusambandið, Noregur og Fær-
eyjar hafa gert með sér samning
um makrílveiðar og ákváðu þessi
strandríki 896 þúsund tonna afla-
mark samkvæmt veiðireglu. Leyfi-
legur afli íslenskra skipa er svipaður
og verið hefur síðustu ár, um 16,5%
af heildinni.
Eins og áður fer stærsti hluti afla-
marksins í ár, eða 106 þúsund lest-
ir til uppsjávarflotans. Það eru þau
skip sem veiddu makríl í flottroll og
nót á árunum 2007 - 2009. Skipt er
hlutfallslega miðað við aflareynslu
þeirra á árunum 2007, 2008 og til og
með 11. júlí 2009 miðað við land-
aðan afla. 6.160 lestum skal ráðstaf-
að til skipa sem hafa veitt makríl á
línu eða handfæri á grundvelli afla-
reynslu þeirra á almanaksárunum
2010 - 2014 og 8.128 lestum skal
ráðstafað til skipa sem ekki frysta
afla um borð og er aflaheimildum
skipt á milli stærðarflokka. Þá verður
31.498 lestum ráðstafað til vinnslu-
skipa eftir sérstökum reglum og er
skipunum skipt eftir stærð. Skylt er
að ráðstafa 70% af makrílafla ein-
stakra skipa til vinnslu til manneldis
á árinu 2016. Í fyrra fóru um 26,8%
af makrílaflanum í bræðslu og hafði
innflutningsbann Rússa á sjávaraf-
urðir frá Íslandi mikil áhrif á vinnslu
makríls. Árið 2014 fóru einungis
11,1% í bræðslu. grþ
Leyfa veiðar á um 150
þúsund tonnum af makríl
Kjördæmisráð Samfylk-
ingarinnar í Norðvestur-
kjördæmi hélt aðalfund
sinn í Landnámssetrinu
í Borgarnesi síðastliðinn
laugardag. Á fundinum
voru nokkrar ályktanir samþykkt-
ar, þar sem meðal annars var kraf-
ist kosninga strax, endurreisn vel-
ferðarkerfis, gjaldfrjálsa heilbrigð-
isþjónustu, traust í samfélaginu, að
unnið verði gegn fátækt og mis-
munun, stofnun auðlindasjóðs,
breytt fiskveiðistjórnunarkerfi og
nýja stjórnarskrá.
„Samfylkingin í Norðvesturkjör-
dæmi telur að það samrýmist ekki
hugsjónum jafnaðarmanna að starf-
rækja eignarhaldsfélög á lágskatta-
svæðum. Það grefur undan velferð-
arkerfinu og sanngjarnri skiptingu
á byrðum samfélagsins.“ Þá telur
flokkurinn að verkefni stjórnmálanna
á komandi mánuðum og misserum sé
að endurreisa velferðarkerfið, tryggja
samfélagslegan arð af auðlindum
landsins og endurvekja traust í samfé-
laginu eftir áföll í efnahags- og stjórn-
málalífi frá efnahagshruninu 2008 og
fram á þennan dag. „Eftir þriggja ára
stjórnartíð Framsóknar- og Sjálfstæð-
isflokks hefur ójöfnuður aukist í sam-
félaginu, velferðarkerfið er stórlask-
að og mikilvægir innviðir á borð við
samgöngukerfið vanræktir. Því er nú
knýjandi þörf fyrir grunngildi jafnað-
arstefnunnar við stjórnun landsins.
Nú er mikilvægara en nokkru sinni
að vinna gegn fátækt og mismun-
un og auka jöfnuð milli einstaklinga,
þjóðfélagshópa, landshluta
og atvinnuvega. Fyrstu
skref þurfa vera leiðrétt-
ing á kjörum aldraðra og
öryrkja; stórátak í hús-
næðismálum og umbætur í
skattamálum sem miða að því m.a. að
burðugar atvinnugreinar leggi auk-
inn skerf til samfélagslegra verkefna.
Nauðsynlegt er að á Íslandi starfi öfl-
ugur, óháður og ríkisrekinn fjölmið-
ill.“
Þá er krafan sterk meðal félags-
manna um lýðræðisumbætur og að
krafan um auðlindir í þjóðareigu með
nýrri stjórnarskrá er enn í fullu gildi.
„Gera þarf breytingar á fiskveiði-
stjórnunarkerfinu með almennum,
sanngjörnum leikreglum sem nýtast
samfélaginu ekki síður en atvinnu-
greininni. Mikilvægt er að á Íslandi
fái þrifist öflugt atvinnulíf sem legg-
ur drjúgan skerf af mörkum til sam-
neyslunnar. Sjálfbærni og virðing fyr-
ir náttúru og umhverfi eiga að vera
forsenda við nýtingu auðlinda lands-
ins og grundvöllur heildstæðrar auð-
lindastefnu. Stefna ber að stofnun
auðlindasjóðs og eðlilegri gjaldtöku
fyrir auðlindanýtingu til að fjármagna
samfélagsleg verkefni, uppbyggingu
innviða og rannsóknir í þágu atvinnu-
vega. Trúverðugleiki og heilindi eru
forsenda heilbrigðra stjórnarhátta.
Jafnaðarmenn eiga nú að fylkja
sér um velferðina, samneysluna og
ábyrgð í stjórnmálum undir merkjum
Samfylkingarinnar,“ segir meðal ann-
ars í ályktun fundarins.
mm
Samfylkingarfólk hélt fund í kjördæmisráði:
Krafan er um endurreisn
velferðarkerfisins