Skessuhorn - 11.10.2017, Blaðsíða 22

MIÐVIKUDAGUR 11. OKTÓBER 201722
Nýverið var tekinn grunnur fyr-
ir nýju húsi þar sem áður stóð Gils-
bakki á Hellissandi. Á þennan grunn
á svo að flytja nýtt hús sem hef-
ur reyndar verið í byggingu frá því
haustið 2012. Að framkvæmdinni
standa hjónin Lúðvík Ver Smárason
og Anna Þóra Böðvarsdóttir. Að-
spurður um hvernig hugmyndin að
þessu húsi hafi komið, segir Lúð-
vík að það hafi svo sem ekkert verið
planað í upphafi hvert hlutverk húss-
ins yrði.
„Þegar ég lauk námi í bygginga-
fræði árið 2010 datt mér í hug að
teikna hús og í framhaldi af því fannst
mér ég verða að smíða það og hófst
byggingin haustið 2012. Framhaldið
var ekkert ákveðið, bara að smíða og
ákveða svo hvort ætti að selja, leigja
eða að við myndum sjálf nýta hús-
ið. Ég sagði í gríni við vin minn að
ég ætlaði að eyða jafnmiklum tíma í
húsið og hann í að spila golf.“
Byggingarstjóri hússins er faðir
Lúðvíks, Smári Lúðvíksson og sagði
Lúðvík að hann hefði aldrei farið út
í þetta verkefni ef hans hefði ekki
notið við, ómetanleg hjálp. Föður-
bróðir Lúðvíks, Ómar Lúðvíks-
son er svo meistari að húsinu. Hef-
ur Lúðvík ekkert verið að flýta sér
að byggja húsið heldur unnið að því
jafnt og þétt með öðru. Hafa þeir
feðgar unnið allt sjálfir. Þessa dag-
ana er Lúðvík að vinna í grunnin-
um og stefnir á að koma húsinu á
grunninn fyrir jól. Vonast þau hjón
til að hægt verði að taka það í notkun
næsta sumar. En hvað stendur til að
gera við húsið? Þau segjast ekki vera
alveg búin að komast að niðurstöðu
um það en eru með margar metn-
aðarfullar og skemmtilegar hug-
myndir. Þau eru þó búin að ákveða
að þetta á að verða fjölnotahús með
einhvers konar greiðasölu sem opin
verður fyrri hluta dags þar sem hægt
er að koma inn, fá sér kaffi og með
því, súpu og jafnvel taka með sér
prjónana eða aðra handavinnu. Vilja
þau reyna að hafa opið allt árið en
ætla að láta öðrum stöðum eftir að
vera með kvöldopnun. Einnig lang-
ar Önnu Þóru að hafa aðstöðu fyrir
jóga og ýmis konar námskeiðshald á
efri hæðinni enda er hún jógakenn-
ari. Eins og áður segir er stefnan sett
á að koma húsinu á grunninn fyrir jól
og vonast Anna Þóra til að það gangi
eftir og að jafnvel verði hægt að hafa
smá jólamarkað í húsinu fyrir jól.
þa
Nýtt hús brátt flutt á lóð Gilsbakka á Hellissandi
Lúðvík Ver í grunninum. Húsið stendur nú tilbúið til flutning á lóð Gilsbakka á Hellissandi.
Safnahús Borgarfjarðar í Borgar-
nesi verður að venju með öflugt
menningarstarf í vetur. Á heima-
síðu þess kemur fram að dagskrá-
in hefst nú í lok október með fyr-
irlestrum á sviði arkitektúrs og
sagnfræði. „Fimmtudaginn 26.
október n.k. flytur Sigursteinn
Sigurðsson arkitekt erindi sem
hann nefnir „Mannvirkin og sag-
an: Húsahönnun í héraði.“ Nokkr-
um vikum síðar eða 16. nóvember,
verður fyrirlestur Heiðars Lind
Hanssonar sagnfræðings á dag-
skrá með efni úr sögu Borgarness.
Sýningin Tíminn gegnum lins-
una mun standa til áramóta, en
þar eru sýndar ljósmyndir fjög-
urra ljósmyndara sem mynduðu
mannlíf og umhverfi í Borgarnesi
á 20. öld. Örsýning í minningu
Dr. Selmu Jónsdóttur mun einnig
standa til áramóta.“
Þá segir í fréttinni að árið 2018
verði viðburðaríkt. „Skal fyrst telja
að þá verða opnaðar fjórar list-
sýningar í Hallsteinssal. Sýnend-
ur eru listakonur úr héraði: Guð-
rún Helga Andrésdóttir (janúar),
Christina Cotofana (mars), Áslaug
Þorvaldsdóttir (apríl) og Steinunn
Steinarsdóttir (sept.). Ennfremur
verða fyrirlestrar á dagskrá. Guð-
rún Bjarnadóttir náttúrufræðingur
fjallar um jurtalitun 18. janúar og
Már Jónsson sagnfræðingur um
Jón Thoroddsen 15. febrúar. Fyr-
irlestrarnir eru styrktir af Upp-
byggingarsjóði Vesturlands.“
Á sumardaginn fyrsta (19. apríl)
kl. 15.00 verða lokatónleikar verk-
efnisins Að vera skáld og skapa,
sem er samstarfsverkefni Tónlist-
arskóla Borgarfjarðar og Safna-
húss. Þar vinna nemendur skól-
ans að tónsmíðum á grunni valdra
texta borgfirskra skálda. Verkefnið
er nú haldið í sjötta sinn. Í árslok
verður 90 ára afmælis Hvítárbrú-
arinnar minnst í samvinnu við
Helga Bjarnason blaðamann.
Auk ofangreinds verður um
ýmis smærri verkefni að ræða s.s.
framsetningu fróðleiks um fólk og
staði á heimasíðu hússins, þátt-
töku á landsvísu í verkefnum inn-
an fagsviða s.s. Bókasafnsdegi,
Skjaladegi og Safnadegi. Sýningin
um Pourquoi-pas strandið (1936)
fær að standa enn um sinn og
lestrarátakið Sumarlestur verður á
sínum stað með tilheyrandi upp-
skeruhátíð í ágúst. Grunnsýningar
Safnahúss, Börn í 100 ár og Æv-
intýri fuglanna eru hönnunarverk
Snorra Freys Hilmarssonar. Var
sú fyrri opnuð í júní 2008, en sú
síðari vorið 2013. Hafa þær báðar
fengið góðar umsagnir í erlendum
ferðahandbókum.
Í Safnahúsi eru fimm söfn starf-
rækt og eru þau öll í eigu Borgar-
byggðar: Byggðasafn Borgarfjarð-
ar, Héraðsbókasafn Borgarfjarðar,
Héraðsskjalasafn Borgarfjarðar,
Náttúrugripasafn Borgarfjarðar
og Listasafn Borgarness.
mm/ Ljósm. Safnahús.
Safnahús Borgarfjarðar kynnir starfið framundan
Eitt þeirra verkefna sem unnið var að á þessu ári var að flokka og greina steinasafn náttúrusafnsins. Hér eru jarðfræðingar
að störfum, Unnur Þorsteinsdóttir (fyrir miðju) ásamt samstarfsmönnum sínum.
Talsvert er um heimsóknir á skjalasafnið. Hér rýnir Jóhann á Kálfalæk í pappíra,
honum til hægri handar er tengdasonur hans Guðmundur á Skiphyl og fjær sjást
Jóhanna Skúladóttir skjalavörður og Ragnheiður Kristófersdóttir á Gilsbakka sem
unnið hefur í sjálfboðavinnu í þágu safnanna um margra ára skeið.
Frá tónleikunum í verkefninu „Að vera skáld og skapa“ síðastliðið vor.
Sýningin Ævintýri fuglanna er sótt af nemendum allra skólastiga.