Morgunblaðið - 26.10.2019, Side 24

24 FRÉTTIRInnlent
MORGUNBLAÐIÐ LAUGARDAGUR 26. OKTÓBER 2019
ÚR BÆJARLÍFINU
Óli Már Aronsson
Hellu
Bæjarhellan er nafn á skemmti-
legum og fræðandi viðburði sem
stendur yfir eina viku í senn, á
hverju ári í Grunnskólanum á Hellu.
Þetta er nokkurs konar þemavika
sem allir nemendur skólans taka
þátt í og er farið í allskonar verkefni
sem ekki teljast endilega hefðbundin
skólaverkefni. Valið er í bæjarráð og
kosinn bæjarstjóri. Þá er stofnað til
margskonar starfsemi, m.a. kvik-
myndagerðar, fréttastofu, bakarí
sett á laggirnar og margt fleira gert
eins og í venjulegum bæjarfélögum.
Notaður er sérstakur gjaldmiðill
sem nefnist ekki króna, heldur hella.
Á lokadegi Bæjarhellunnar er
haldinn markaðsdagur þar sem af-
rakstur vikunnar er markaðssettur
og hellur notaðar til að kaupa ýmsan
varning og til að greiða fyrir þátt-
töku í ýmsum keppnum og þrautum.
Verkefnið hófst fyrir 7 árum og er
meðal annars ætlað að efla samstarf
foreldra og barna í skólanum.
  
Það er óhætt að segja að
Harpa Rún Kristjánsdóttir hafi
slegið í gegn með sinni fyrstu ljóða-
bók, Eddu, sem kom út í vikunni.
Hún hlaut bókmenntaverðlaun Tóm-
asar Guðmundssonar árið 2019 sem
eru veitt einu sinni á ári fyrir hand-
rit að óútgefinni ljóðabók og eru
verðlaunin þetta árið 800 þúsund kr.
Harpa hefur áður sent frá sér tvær
bækur í samstarfi við ljósmyndara,
On the road in Iceland árið 2016 og
In and out of sight at Þingvellir – í
og úr sjónmáli 2018. Auk þess hafa
textar hennar og smásögur birst í
blöðum, tímaritum og safnritum.
Harpa Rún er fædd og upp alin á
Hólum í Rangárþingi ytra og býr
þar, við Heklurætur. Henni eru
færðar hamingjuóskir með verð-
launin.
  
Framkvæmdir standa nú yfir
við viðbyggingu við Íþróttahúsið á
Hellu. Grunnflötur stækkunarinnar
er 260 fm á tveimur hæðum, 520 fm
alls. Neðri hæðin verður nýtt sem
áhaldageymsla fyrir húsið og verður
tekin í notkun um næstu áramót.
Efri hæðin verður fyrir líkamsrækt-
arsal og jógaaðstöðu og að hluta til
fyrir fundaraðstöðu, en hún verður
tilbúin næsta vor. Íþróttahúsið hefur
verið í mjög góðri nýtingu frá því
það var byggt fyrir 20 árum og mun
þessi stækkun auðvelda og auka alla
starfsemi þar. Kostnaðaráætlun er
upp á 150 milljónir króna, en þess
má geta til gamans að kostnaðurinn
við byggingu hússins fyrir 20 árum
var um 120 milljónir á verðlagi þess
tíma.
  
Oddabrú er vinnuheiti á brú
sem verið er að byggja yfir Þverá
rétt neðan við Odda á Rangár-
völlum. Vinnan hefur gengið hægt
en stöðugt og nú er verið að undir-
búa flutning á stálbitum brúarinnar
á brúarstæðið. Allri stálsmíði er lok-
ið og sér fyrir endann á zinkhúðun,
álhúðun og málun. Stálbitarnir sem
bera munu hina 92 m löngu brú uppi
eru fullunnir hjá Vélsmiðjunni Stál-
stjörnum á Seyðisfirði og fluttir það-
an landleiðina á brúarstæðið við
Þverá. Annað efni til brúarsmíð-
innar er komið á brúarstæðið og
verktakinn og byggingarfélagið
Mikael ehf. á Höfn í Hornafirði er í
startholunum að klára verkið. Það
styttist því verulega í að þessi lang-
þráða samgöngubót og öryggisleið
opnist fyrir almenna umferð.
  
Sameiningarmál sveitarfélaga
eru að komast í brennidepil rétt einu
sinni og að oddviti Mýrdalshrepps
hefði sent sveitarstjórnum Vestur-
Skaftafellssýslu og Rangárvalla-
sýslu tilmæli um að skoða samein-
ingarmál yfir allt svæðið. Þegar
sveitarstjórinn í Rangárþingi ytra
var spurður um málið kvað hann
þessa umræðu hafa komið upp með-
al sveitarstjórnarfólks hér um slóðir
nokkrum sinnum á síðustu árum en
það hefur engin formleg afstaða ver-
ið tekin í okkar sveitarstjórn. „Ég
reikna með því að þetta verði rætt á
næsta sveitarstjórnarfundi nú í nóv-
ember og fyrirfram myndi ég telja
það líklegt að fólk teldi áhugavert að
láta kanna þennan möguleika og
skoða hvaða tækifæri gætu þarna
legið fyrir okkar sveitarfélag.“ Ljóst
er að mjög skiptar skoðanir eru um
sameiningar eins og hefur verið
gegnum árin.
  
Brunavarnir Rangárvallasýslu
hafa keypt fjögur bil í iðnaðarhús-
næði sem nú er að rísa við Dynskála
49 á Hellu. Um er að ræða óinn-
réttað stálgrindarhús sem klætt er
með samlokueiningum. Samtals eru
bilin 319 fm með 111 fm millilofti.
Reiknað er með að húsið verði tilbú-
ið til innréttingar fyrir áramót og
verið er að undirbúa útboð á þeim
verklið en reiknað er með að taka
húsnæðið í notkun á næsta ári.
Morgunblaðið/Óli Már Aronsson
Markaðsdagur Bæjarhellan nefnist þemavika Grunnskólans á Hellu og lokadagur hennar nefnist markaðsdagur.
Oddabrú yfir Þverá í burðarliðnum
SKIPAGÖTU 7 - AKUREYRI - S. 462 4646LAUGAVEGI 24 - REYKJAVÍK - S. 552 0800