Rit Mógilsár - 2019, Blaðsíða 4

Fylgt úr hlaði

Hin árlega Fagráðstefna skógræktar er nú haldin í 20. skipti. Upphafið má rekja til ráð-
stefnu sem haldin var á vegum Skógræktar ríkisins í tengslum við opnun Kalstofunnar
á Möðruvöllum árið 2000. Þótti sú ráðstefna takast svo vel að ákveðið var að halda
aðra á Egilsstöðum árið 2001 og svo þá þriðju á Kirkjubæjarklaustri árið 2002. Síðan
hefur ráðstefnan farið hringinn um landið. Allt frá 2001 var ráðstefnan haldin í
samstarfi Landshlutaverkefna í skógrækt og Skógræktar ríkisins, sem árið 2016 urðu að
Skógræktinni, og síðar komu Skógræktarfélag Íslands, Landbúnaðarháskóli Íslands,
Landssamtök skógareigenda og Skógfræðingafélag Íslands að skipulagningu. Í ár
bætist Landgræðslan í hóp þeirra sem standa að ráðstefnunni. Fulltrúar þessara
stofnana mynda fagnefnd Fagráðstefnu, en hlutverk hennar er að kalla eftir erindum
og setja saman dagskrá. Í ár sátu í nefndinni, auk undirritaðrar: Brynja Hrafnkelsdóttir
frá Skógfræðingafélaginu, Einar Gunnarsson frá Skógræktarfélagi Íslands, Hlynur G.
Sigurðsson frá Landssamtökum skógareigenda, Þórunn Pétursdóttir frá Landgræðsl-
unni og Bjarni D. Sigurðsson frá Landbúnaðarháskólanum, sem einnig sat í ritnefnd
þessa rits.
Undirbúningsnefnd ráðstefnunnar hefur haft veg og vanda af því að redda öllu sem
þarf að redda og á skilið þakkir. Í nefndinni sitja Aðalheiður Bergfoss, Anna Pálína
Jónsdóttir, Bergrún Arna Þorsteinsdóttir og Björg Björnsdóttir, allar frá Skógræktinni.
Þá hefur Pétur Halldórsson, kynningarstjóri Skógræktarinnar, haft veg og vanda af
kynningarmálum, uppsetningu heimasíðu, auk þess að sjá um ritstjórn og frágang
ritsins.
Allt frá upphafi hefur skipulag ráðstefnunnar verið með svipuðu sniði, tveggja daga
ráðstefna þar sem lögð er áhersla á tiltekið málefni fyrri daginn og fjölbreyttir fyrir-
lestrar seinni daginn. Í ár er yfirskrift ráðstefnunnar: „Öndum léttar – landnotkun og
loftslagsmál“, með áherslu á aðgerðir til kolefnisbindingar. Vil ég þakka öllum fundar-
stjórum, fyrirlesurum, sem og þeim sem kynna efni á veggspjöldum kærlega fyrir
framlag þeirra.
Árið 2011 var fyrst gefið út Rit Mógilsár eftir Fagráðstefnu þar sem höfundum gafst
kostur á því skrifa stuttgreinar með efni af ráðstefnunni. Í ár var ákveðið að sameina í
eitt rit útdrætti og stuttgreinar og gefa út fyrir ráðstefnu. Afraksturinn sést hér, stutt-
greinar og útdrættir frá fyrirlesurum og veggspjaldahöfundum, alls ríflega 30 talsins
Fagráðstefna skógræktar er fyrir löngu orðin einn af föstu punktunum í lífi skógræktar-
fólks með um og yfir 100 þátttakendur á hverju ári. Fyrir hönd allra þeirra sem komu
að skipulagningu Fagráðstefnu 2019 óska ég ykkur ánægjulegrar ráðstefnu.

Edda Sigurdís Oddsdóttir