Börn og menning - 2018, Blaðsíða 36

„Okkar Astrid Lindgren
og Tove Jansson“
IBBY fréttir
Ingibjörg Ösp Óttarsdóttir
Starfsemin hjá Íslandsdeild IBBY var lífleg í vor. Síð-
ustu mánuðir hafa einkennst af miklu samstarfi við hin
ýmsu samtök og stofnanir þar sem IBBY hefur unnið að
ólíkum verkefnum á sviði barnamenningar. IBBY hef-
ur reyndar átt mjög gott samstarf við marga í gegnum
tíðina. Mér var það sérstaklega hugleikið þegar ég settist
niður og fór að punkta hjá mér öll þau ólíku og stóru
verkefni sem IBBY hefur staðið að eða tekið þátt í að
undanförnu.
Pissupása á degi barnabókarinnar
Í byrjun apríl flutti Ævar Þór Benediktsson sögu sína,
Pissupásu, á Rás 1 í tilefni dags barnabókarinnar og
hlaut hún góðar undirtektir. Sagan í ár var skemmtileg
saga um samskipti hundar og kattar þegar sá fyrrnefndi
flytur í hverfi kattarins.
Sögur – verðlaunahátíð barnanna
Síðar í mánuðinum, 22. apríl, var Sögur – verðlauna-
hátíð barnanna haldin hátíðleg í fyrsta skipti í Hörpu.
Undirbúningurinn hófst síðasta haust þegar við Ragn-
heiður Gestsdóttir, þáverandi formaður IBBY á Íslandi,
settumst að borði fyrir hönd IBBY með einvala liði
fólks sem á það sameiginlegt að vilja gera barnamenn-
ingu hátt undir höfði. Markmiðið var að virkja sköp-
unarkraft barnanna og gefa þeim vettvang til að koma
verkum sínum á framfæri, gefa þeim tækifæri til þess að
kjósa um það sem þeim þætti best á sviði barnamenn-
ingar og síðast en ekki síst, að ýta undir sagnagleðina
með því að hvetja þau til lestrar og skrifta.
Að hátíðinni stóðu SÖGUR – samtök um barna-
menningu, í samstarfi við KrakkaRÚV, SÍUNG,
IBBY á Íslandi, Barnamenningarhátíð Reykjavíkur-
borgar, Reykjavík Bókmenntaborg UNESCO, Borgar-
bókasafnið, Borgarleikhúsið, Menntamálastofnun,
skóla- og frístundasvið Reykjavíkur, Hörpu og Miðstöð
skólaþróunar við HA.
Afrakstur samstarfsins var glæsilegur og vorum við í
stjórn IBBY sérstaklega stolt af því að afhenda Guðrúnu
Helgadóttur Sögustein IBBY á hátíðinni. Það var for-
seti Íslands, Guðni Th. Jóhannesson, sem afhenti hann
fyrir hönd IBBY. Sögusteinninn var afhentur á heimili
Guðrúnar og tóku liðsmenn KrakkaRÚV upp eftir-
minnilegt myndskeið af afhendingunni sem snerti mig
djúpt. Með forseta Íslands voru börnin Birta Hal og
Ingvar Wu sem tóku skemmtilegt viðtal við Guðrúnu
og ræða forseta var alveg einstaklega falleg þar sem hann
lét þessi fögru orð falla: „Þú ert okkar Astrid Lindgren
og Tove Jansson.“
Vorvindar IBBY
Vorvindar IBBY voru afhentir 13. maí við hátíðlega
athöfn í Gunnarshúsi. Að þessu sinni beindi stjórnin
sjónum sínum sérstaklega að lestrarhvatningu til að
velja það sem okkur fannst blása ferskum vindum um
barnamenninguna. Vorvindahafarnir í ár voru fjórir: