Strandapósturinn - 01.06.1985, Qupperneq 99

Hann sást einnig frá bænum á Melum. Þarna sat hann grafkyrr og
sýndi ekki á sér neitt fararsnið.
Við fréttum frá Gjögri, að einhverjir hefðu farið á mótorbát út
að jakanum, og þeir höfðu m.a. athugað dýpið, og komist að
þeirri niðurstöðu, að það væri um 80 faðmar (144 metrar). Þessi
jaki var því ekkert smásmíði. Nú er vitað að aðeins 1/10 hluti af
rúmmáli ísjaka stendur upp úr sjó.
Þessi jaki var þarna aleinn á ferð. Engir ísjakar aðrir, hvorki
smáir eða stórir. Hér var því hreinn sjór að öðru leyti.
Nokkrum dögum síðar, vorum við enn í mó, upp undir Fossa-
brekkunum, og gátum ekki að okkur gert, að gefa jakanum gætur,
við og við. Þá varð ég vitni að skyndilegri brottför þessa mikla
borgarísjaka. Ég sá að údit hans breyttist allt í einu. Það var eins
og hann byltist um koll, og hann tók á sig aðra lögun en áður. Þar
með tók hann á rás austur á við, og hvarf undir Reykjaneshyrn-
una á skammri stundu.
Hann hefur losnað af grunni og var nú aftur frjáls ferða sinna.
Inn flóann hefur leið hans legið fyrst í stað, og svo hefur það lík-
lega átt fyrir honum að liggja að leysast upp smátt og smátt, verða
minni og minni og hverfa svo að lokum fyrir fullt og allt.
Ekki fréttum við neitt meira af þessum mikla jaka, en vafalaust
hefur hann verið ógnvaldur sæfarendum, á meðan hann hefur
verið að flækjast á siglingaleiðum.
97