Bændablaðið - 15.12.2022, Blaðsíða 100

100 Bændablaðið | Fimmtudagur 15. desember 2022
Það ber til um þessar mundir að
fyrstu eintökin af Volkswagen
ID.Buzz eru byrjuð að berast til
landsins.
Mikil eftirvænting hefur verið
eftir þessum bílum frá því fyrstu
ljósmyndirnar af þeim sáust í
fjölmiðlum. Þeir ættu að taka þennan
strumpastrætó til skoðunar sem eru
að leita að sjarmerandi bíl sem fer
vel með fimm fullorðna – eða allt
dótið sem fylgir ungum börnum. Ef
bera á ID.Buzz saman við aðra bíla á
markaðnum er Peugeot e-Traveller sá
sem kemur helst til greina.
Tvílitar smárúturnar, með hvítan
topp og bjarta liti að neðan, sem hafa sést
í kynningarefni frá framleiðandanum,
höfða mikið til nostalgíunnar – enda
greinilegt að hönnuðir bílsins horfðu
til gömlu rúgbrauðanna frá sjötta,
sjöunda og áttunda áratugnum. Bíllinn
sem blaðamaður fékk í hendurnar
var silfurgrár að lit, sem gerir hann
lágstemmdari en þá tvílitu. Það fer þó
ekki á milli mála að hér er um eitthvað
nýtt og ferskt að ræða. Örstutt húddið,
stórt VW merkið á nefinu og ferkantað
formið leiða hugann að forveranum,
en samt sem áður er allt yfirbragðið
nútímalegt.
Þegar stigið er um borð er ekkert
sem minnir á fortíðina. Innrarýmið
er mjög opið og stórir gluggar á
öllum hliðum gefa óhindrað útsýni
og hleypa inn mikilli birtu. Viðarlíki á
mælaborðinu ásamt plasti með áláferð
gefur fágun. Gólfið í bílnum er svo
gott sem flatt sem býður upp á mikla
möguleika. Sé þess til dæmis óskað er
auðvelt að fjarlægja miðjustokkinn og
klöngrast á milli sætaraða án mikilla
erfiðleika.
Framsæti eins og skrifborðsstólar
Framsætin eru ein sterkasta hlið
bílsins. Sætisstaðan er há og upprétt
og eru stillanlegar armhvílur til
beggja hliða, sem minnir um
margt á vandaða skrifborðsstóla.
Ökumaðurinn fær afbragðs yfirsýn
yfir veginn vegna hárrar stöðu
og stutts húdds og er hægt að
líkja tilfinningunni við að sitja í
vörubíl, nema hér er um mjög lipurt
farartæki að ræða.
Tveir skjáir eru í mælaborðinu og
þveröfugt við marga bílaframleiðendur
hefur Volkswagen farið þá leið að
hafa þá litla. Skjárinn sem gefur allar
akstursupplýsingarnar er á stærð við
stærstu iPhone símana og er áfastur
stýrissúlunni. Í miðju mælaborðsins
er skermur á stærð við spjaldtölvu
og í gegnum hann er öllu stýrt sem
viðkemur eiginleikum bílsins, ásamt
útvarpi, miðstöð og leiðsögukerfi.
Einfalt er að tengja símann þráðlaust
í gegnum Android Auto eða Apple
CarPlay til að stjórna Spotify, Storytel,
Google Maps og öðrum öppum.
Volkswagen hefur sætt mikilli
gagnrýni fyrir að fjarlægja nær alla
efnislega hnappa úr nýjustu bílunum
sínum. Hins vegar eru hnappar í
stýrinu fyrir helstu skipanir sem gera
ökumanninum lífið með snertiskjá
auðveldara – farþegann munar ekkert
um að beita örlítið meiri einbeitingu
við að skipta um útvarpsstöð eða stilla
hitann. Sjálft stýrikerfið er þannig að
flestir ættu að ná tökum á því með
markvissu fikti – ef það bregst er alltaf
hægt að sækja ungling sér til aðstoðar.
Nóg pláss í öllum sætum
Bíllinn í þessum prufuakstri var
fimm sæta, en lengri útgáfu með
sjö sætum er að vænta eftir einhver
misseri. Þó svo að þetta sé svokölluð
styttri útgáfa – þá er alls enginn
skortur á plássi. Þrír fullorðnir geta
hæglega vel við unað í aftursætunum
þremur og er miðjusætið líklegast
besta sætið í bílnum – því þegar
áðurnefndur miðjustokkur hefur
verið fjarlægður er fótaplássið
ótakmarkað. Rennihurðirnar á
hliðunum opnast vel þannig að
auðvelt er að athafna sig í kringum
barnabílstóla.
Skottið er sá hluti sem skilur þennan
bíl frá öllum jepplingunum sem eru
ráðandi á fjölskyldubílamarkaðnum
– enda á ID.Buzz margt skylt með
sendibílnum ID.Cargo. Skotthlerinn
opnast upp og þurfa hávaxnir ekki
að beygja sig til að komast að. Gólfið
er alveg flatt og flúttir við hlerann.
Hliðarnar eru lóðréttar, þannig að
hægt er að stafla búslóð í kössum án
vandræða – farminn væri jafnvel hægt
að hafa á euro-bretti. Hægt er að kaupa
falskt gólf sem flúttir við við aftursætin
þegar þau eru lögð niður – þar með
kemur alveg flatt gólf sem er svipað
stórt og lítið hjónarúm.
Áreynslulaus akstur
Í akstri er fátt sem kemur á óvart.
Þar sem þetta er rafmagnsbíll er
ekkert ónæði frá sprengihreyfli og
allt viðbragð er snöggt. Bíllinn er
með 150 kW (204 hö) mótor sem
knýr afturhjólin. VW hefur gefið
fyrirheit um fjórhjóladrifna útgáfu
síðar, en gott stöðugleikakerfi gerði
afturdrifinn akstur í hálku auðveldan.
Þar sem rafmagnsbílar eru þyngri en
hefðbundnar bifreiðar þarf að koma
fyrir stífari fjöðrun ella. Því er hægt
að segja að ID.Buzz sé hastur úti á
þjóðvegum – en ekki þannig að af
því hljótist óþægindi. Þar sem mest
öll þyngdin er í rafhlöðunum undir
gólfinu er bíllinn nokkuð stöðugur
á hlykkjóttum vegum.
Þessi bíll var útbúinn skynvæddum
hraðastilli sem gerir meira en að fylgja
hraða bílsins fyrir framan. Bifreiðin veit
þegar ekið er að kröppum beygjum,
gatnamótum og hringtorgum og
hægir sjálfkrafa á sér. Einnig getur
hann lesið hámarkshraðann á skiltum
og stillt aksturshraðann samkvæmt
því. Síðarnefndi eiginleikinn hefur
þó þann ókost að bíllinn ruglast oft í
ríminu og heldur að skilti á afreinum
eigi við um stofnbrautina. Eftir að
vera nokkrum sinnum kominn niður
í 50 þar sem hámarkshraðinn er 80
slökkti blaðamaður á skiltalesaranum.
Samkvæmt upplýsingum frá Heklu
stendur þetta til bóta.
Tölur
Grunnverð Volkswagen ID.Buzz er
8.490.000 krónum m. vsk. Helstu
mál eru: lengd 4.712 mm, breidd
(m. speglum) 2.212 mm og hæð
1.932 mm. Eigin þyngd er 2.481
kíló og heildarþyngd með 3.000.
Rafhlaðan er 77kWst og á að gefa
allt að 420 kílómetra drægni sk.
framleiðanda. Eins og alltaf má
taka þeim tölum með fyrirvara, en í
þessum prufuakstri gaf rafhlaða með
80% hleðslu möguleika á rúmlega
300 kílómetra akstri.
Enga stund tekur að hlaða, en
blaðamaður fyllti á bílinn úr 20%
upp í 70% hleðslu á 23 mínútum á
öflugustu hleðslustöð landsins.
Í stuttu máli: Rafmagnaða
rúgbrauðið stendur undir þeim miklu
væntingum sem til þess eru gerðar.
VÉLABÁSINN
– Hið rafmagnaða rúgbrauð er komið
Volkswagen ID.Buzz er nýr rafmagnsbíll sem beðið hefur verið eftir. Við hönnun bifreiðarinnar hefur verið horft til rúgbrauðanna sem Volkswagen framleiddi
um miðja öldina. Með smekklegu útliti og praktísku innrarými er líklegt að þessi bíll höfði til margra. Myndir / ÁL
Innréttingin er mínímalísk og fáguð. Nær engir hnappar eru sjáanlegir, heldur
er öllu stjórnað í gegnum snertiskjá og hnappa í stýri. Sætin fram í eru há
og upprétt með tveimur armpúðum – svipað og skrifborðsstólar.
ID.Buzz á margt skylt með sendibílnum Volkswagen ID.Cargo sem einnig er
byrjaður að berast til landsins. Ferkantað formið skilar sér í miklu rými fyrir
fimm farþega og allan þeirra farangur.
Gott aðgengi er að afturbekknum í gegnum rennihurðir.
Ástvaldur Lárusson
astvaldur@bondi.is